Chto zachoča stvaryć svaju jadziernuju zbroju, kali amierykancy zdradziać Ukrainie

Pra heta na staronkach The Wall Street Journal piša Kiejsi Mišel, aŭtar knihi «Zamiežnyja ahienty: jak amierykanskija łabisty i zakanadaŭcy pahražajuć demakratyi va ŭsim śviecie».

Jak adznačaje analityk, pakul novaja administracyja Trampa adnaŭlaje pošuki miru va Ukrainie, asnoŭnaja ŭvaha kamientataraŭ zasiarodžanaja na tym, čym daviadziecca achviaravać Kijevu dziela spynieńnia vajny. Adnak značna mienš uvahi nadajecca hłabalnym nastupstvam takich prapanoŭ ZŠA — u pryvatnaści tamu, jak jany mohuć stvaryć stymuł dla raspaŭsiudžvańnia jadziernaj zbroi.

Na pohlad aŭtara, navat sam fakt cisku na Ukrainu z metaj pieradačy častki jaje terytoryj padšturchnie niajadziernyja dziaržavy da pierahladu svaich stratehij biaśpieki. Krainy, jakija nie majuć jadziernaha arsienała, usio čaściej zadajucca pytańniem, ci varta daviarać amierykanskamu «jadziernamu parasonu».

Mišel nahadvaje, što mienavita Złučanyja Štaty ŭ 1990‑ia hady prymusili Ukrainu admovicca ad jadziernaj zbroi ŭ abmien na harantyi biaśpieki, jakija z taho času razvalilisia. Ekśpiert padkreślivaje, što słabaja reakcyja prezidenta Baraka Abamy na ŭvarvańnie Rasii ŭ Krym u 2014 hodzie tolki zaachvociła Maskvu da dalejšaj ahresii. Jak zaŭvažaje aŭtar, paradaksalna, ale Abama, jaki imknuŭsia pazbavić śviet ad jadziernaj zbroi, faktyčna padrychtavaŭ hlebu dla jaje najbolšaha raspaŭsiudžvańnia za apošnija dziesiacihodździ.

Amierykanskija intaresy va Ukrainie, pavodle mierkavańnia Mišela, vychodziać daloka za miežy terytaryjalnaj cełasnaści adnoj krainy. Hałoŭnaje pytańnie palahaje ŭ tym, ci dazvolać jadziernaj dziaržavie biespakarana rasčlaniać niajadziernaha susieda, i jak na heta adreahujuć ZŠA.

Całkam zakanamierna, što za apošnija hady va Ukrainie rezka ŭzrasła ŭnutranaja padtrymka idei viartańnia jadziernaha statusu. Adnak hetaja tendencyja nie abmiažoŭvajecca adnoj krainaj: pa ŭsim śviecie sajuźniki ZŠA pačynajuć pieraasensoŭvać svaju admovu ad zbroi masavaha źniščeńnia.

Najbolš vostra dyskusija razharnułasia va Uschodniaj Azii. Sajuźniki Vašynhtona ŭ rehijonie nazirali, jak kamunistyčny Kitaj pahłynuŭ Tybiet i Hankonh, a ciapier skiravaŭ pozirk na Tajvań.

Pravodziačy pramyja paraleli pamiž rasijskaj ahresijaj i kitajskimi ambicyjami, Paŭdniovaja Kareja i Japonija ŭzvažvajuć metazhodnaść stvareńnia ŭłasnych arsienałaŭ. Charakterna, što ŭ Karei praktyčna lubyja razmovy na hetuju temu siońnia niepaźbiežna zvodziacca da prykładu Ukrainy.

Chvala sumnievaŭ u nadziejnaści Amieryki dakaciłasia i da Aŭstralii, dzie ŭsio čaściej hučyć pytańnie: ci nie varta Kanbiery mieć svaju bombu? Nie zastałasia ŭ baku navat Kanada, jakaja vymušanaja razhladać navat scenary patencyjnaha amierykanskaha ekspansijanizmu.

Asablivuju ŭvahu aŭtar źviartaje na Kazachstan. Hetaja kraina, jakaja taksama admoviłasia ad savieckaj jadziernaj zbroi, znachodzicca ŭ takim ža ŭraźlivym stanoviščy pierad rasijskaj ahresijaj, jak i Ukraina. Uličvajučy najaŭnaść u Kazachstanie adnych z najbujniejšych zapasaŭ płutoniju, prydatnaha dla vyrabu jadziernaj zbroi, Mišel ličyć całkam vierahodnym, što Astana moža zadumacca pra adnaŭleńnie svajoj prahramy.

U Jeŭropie dyskusii pra jadzierny status viartajucca ŭ Hiermaniju i Polšču. Aŭtar nahadvaje: ustupleńnie Polščy ŭ NATA ŭ 1990‑ch častkova razhladałasia jak sposab praduchilić stvareńnie Varšavaj ułasnaj bomby. Jak uspaminaŭ adzin amierykanski čynoŭnik, palaki kazali prama:

«Kali vy nie puścicie nas u NATA, my stvorym jadziernuju zbroju. My nie daviarajem ruskim».

Na dumku Kiejsi Mišela, Polšča mieła racyju, nie daviarajučy Rasii. Ale ciapier, kali Amieryka padšturchoŭvaje Ukrainu da sastupak terytoryj dziela chistkaha miru, uźnikaje novaje pytańnie: ci varta daviarać samim amierykancam? U takich umovach, padsumoŭvaje aŭtar, sajuźniki mohuć pryjści da vysnovy: adzinaja nadziejnaja abarona ad jadziernaha impieryjalizmu — heta ŭłasny jadzierny arsienał.

• 21
• 0
• 0
• 0
• 1
• 2
• 0
• 0