U Kalifornii pierad mitynham Trampa zatrymali mužčynu z drabavikom i pistaletam

U Kalifornii pierad mitynham kandydata ŭ prezidenty ZŠA Donalda Trampa zatrymali ŭzbrojenaha mužčynu, paviedamiła palicyja. Incydent adbyŭsia ŭ horadzie Kaačeła ŭviečary ŭ subotu, piša Bi-bi-si.

Pa słovach šeryfa akruhi Ryviersajd Čada Bjanka, 49-hadovaha žychara Łas-Viehasa Vema Milera zatrymali za hadzinu da vystupleńnia Trampa na adnym z kantrolnych pastoŭ na pierakryžavańni. Jon znachodziŭsia za rulom čornaha ŭsiodarožnika i mieŭ pry sabie drabavik, zaradžany pistalet i mahazin pavyšanaj źmiaščalnaściu.

Ułady taksama śćviardžajuć, što ŭ mužčyny byli z saboj niekalki pašpartoŭ i vadzicielskich paśviedčańniaŭ. Jak paviedamlajecca, mužčynu aryštavali pa abvinavačańni ŭ niezakonnym zachoŭvańni zbroi i bojeprypasaŭ, a potym adpuścili pad zakład u pamiery 5 tysiač dalaraŭ. Słuchańnie pa jaho spravie pryznačana na 2 studzienia nastupnaha hoda.

Ułady zajavili, što incydent nie paŭpłyvaŭ na biaśpieku Trampa ci ŭdzielnikaŭ mitynhu. Miascovy šeryf adznačyŭ, što palicyjantam, vidać, udałosia praduchilić mahčymuju sprobu zamachu na Donalda Trampa, ale šmat pytańniaŭ adnosna incydentu zastajucca biez adkazu.

Čad Bjanka pryznaŭ, što niemahčyma daznacca, što było ŭ dumkach padazravanaha, i što dakazać namiery mužčyny moža być składana. Jon paviedamiŭ, što va ŭsiodarožnika padazravanaha byŭ padrobleny numarny znak, a ŭnutry aŭtamabila byŭ biesparadak. Pavodle infarmacyi Bjanka, tam znajšli niekalki pašpartoŭ i vadzicielskich paśviedčańniaŭ na roznyja imiony.

Pavodle jaho słoŭ, padazravany taksama paviedamiŭ uładam, što źjaŭlajecca členam hrupy «Suvierennyja hramadzianie». «Ja b nie skazaŭ, što heta militantnaja hrupa. Heta prosta hrupa, jakaja nie vieryć u ŭrad i dziaržaŭny kantrol», — skazaŭ jon.

Čad Bjanka, jaki źjaŭlajecca respublikancam i raniej vykazvaŭsia ŭ padtrymku Trampa, źjaŭlajecca taksama davieranaj asobaj kandydata ŭ Kalifornii.

Televizijnaja kampanija CBS News sa spasyłkaj na pradstaŭnika fiederalnych pravaachoŭnych orhanaŭ paviedamlaje, što na dadzieny momant niama prykmiet taho, što rychtavaŭsia zamach na žyćcio Trampa.

Fiederalnyja ŭłady zajaŭlajuć, što praciahvajuć rasśledavańnie. Sakretnaja słužba i FBR paćvierdzili, što viedajuć pra aryšt i ŭdziačnyja miascovym palicyjantam, ale incydent nie paŭpłyvaŭ na zabieśpiačeńnie biaśpieki Trampa.

• 0
• 0
• 1
• 0
• 0
• 1
• 0
• 0