Viktar Babaryka sustrakaje dzień naradžeńnia ŭ nieviadomaści — kali jon žyvy
Pretendentu na pasadu prezidenta siońnia spoŭniŭsia 61 hod. Ź im niama absalutna nijakaj suviazi z 25 krasavika 2023 hoda.
U źniavoleńni Viktar Babaryka sustrakaje ŭžo piaty dzień narodzinaŭ. Stolki sama ŭ zakładnikach trymajuć jahonaha syna Eduarda.
Adnak što ź im, dzie jon i navat ci žyvy, a kali žyvy, to čaho ad jaho dabivajucca izalacyjaj — nijakaj infarmacyi niama.
Bolš za paŭtara hoda z palitykam nie było nijakaj suviazi.
Pa infarmacyi ad byłoha źniavolenaha kałonii, viaźni apošni raz bačyli Viktara Babaryku ŭ pamiaškańni kamiernaha typu navapołackaj kałonii № 1 u listapadzie 2023 hoda, heta značyć hod nazad. Jon užo tady byŭ u poŭnaj izalacyi ad inšych źniavolenych.
Palitźniavolenych ranhu Babaryki i tak utrymlivajuć u katavalnych umovach. Viadoma, što ŭ niejki momant jaho pasprabavali prymusić prybirać prybiralni. Kali admaŭlaješsia, heta žorstkaje niepadparadkavańnie režymu. I heta padstava, kab ciabie začynili ŭ ŠIZA abo ŭ PKT. Kali zhadžaješsia — dajuć papieru pra pieravod ciabie ŭ nizki status. Naturalna, myć prybiralni Viktar Babaryka admoviŭsia, i jaho začynili ŭ PKT, a potym u ŠIZA.
Pry hetym umovy, pavodle śviedčańniaŭ byłych palitviaźniaŭ, u PK № 1 zdolnyja stvaryć sapraŭdy niečałaviečyja. Vokny ŭ štrafnym izalatary nie začyniajucca ŭvieś hod, navat kali na vulicy minus 30 °S. Źniavolenyja vymušanyja zaviešvać ich ručnikami abo anučami, ale za heta ich taksama mohuć pakarać dadatkovym terminam.
A kamanda źvierchu zrabić režym utrymańnia maksimalna strohim pryjšła adnosna Babaryki prykładna ŭ lutym 2023 hoda. Da jaho pierastali puskać advakata.
25 krasavika 2023 hoda Viktara Babaryku z kałonii pavieźli ŭ špital. Pavodle infarmacyi, pieradadzienaj žurnalistam pracaŭnikami bolnicy, 27 krasavika palityk byŭ u chirurhičnym adździaleńni ŭ stanie siaredniaj ciažkaści. Paźniej pravaabaroncam stała viadoma, što Babaryku pieraviali ŭ turemny špital pry SIZA № 1 u Minsku. Paźniej Viktara Babaryku viarnuli ŭ kałoniju.
Pavodle śviedčańnia byłoha palitviaźnia, viasnu i leta 2023 hoda Babaryka pravioŭ u kałonii ŭ PKT, u poŭnaj izalacyi ad inšych viaźniaŭ. Śled Viktara Babaryki zhubiŭsia ŭ listapadzie 2023-ha, kali jaho bačyli ŭ kalidory PKT.
«U pačatku 2024 hoda da mianie dajšła nie stoadsotkavaja infarmacyja, što ŭ kałonii Viktara Babaryki niama. Nibyta pryjechali ludzi ŭ maskach, biez apaznavalnych znakaŭ, pahruzili jaho i pavieźli. Pryčym kali vieźli, ja źbiraŭsia vychodzić sa stałoŭki, ale ŭsim zabaranili. My stajali i nie razumieli, što adbyvajecca. U jakim kirunku jaho pavieźli, ci viarnuli, dzie jon, nichto nie viedaje», — adznačaje eks-palitviazień. Ale heta niapeŭnaja infarmacyja.
Viktar Babaryka naradziŭsia ŭ Minsku ŭ 1961 hodzie. Jon doŭhi čas uznačalvaŭ Biełhazprambank, byŭ adnym z samych ščodrych miecenataŭ krainy. U 2020 hodzie pryniaŭ rašeńnie bałatavacca ŭ prezidenty, sabraŭ rekordnuju kolkaść podpisaŭ u padtrymku svajoj kandydatury i adrazu ŭznačaliŭ pieradvybarčyja rejtynhi. Łukašenkaŭcy tut ža paśla hetaha, u červieni 2020-ha, jaho aryštavali. U źniavoleńni apynulisia i jahony syn Eduard, a taksama kiraŭnica jahonaj inicyjatyŭnaj hrupy Maryja Kaleśnikava.
Kamientary