Vybary ŭ Rumynii: u pieršym tury lidziruje kandydat, jaki krytykavaŭ NATO i dapamohu Ukrainie

Pa vynikach pieršaha tura prezidenckich vybaraŭ u Rumynii niečakana lidziruje niezaležny kandydat Kełyn Džeardžesku, jaki raniej uvachodziŭ va ŭltrapravy «Aljans za abjadnańnie rumynaŭ» (AUR) i vykazvaŭsia z krytykaj ES i NATO. Na druhim miescy znachodzicca dziejny premjer-ministr, lidar Sacyjalistyčnaj partyi (PSD) Marčeł Čałaku, jaki ličyŭsia favarytam vybarčaj honki, piša Bi-bi-si.

Paśla padliku bolš za 99% hałasoŭ Džeardžesku nabiraje 22,8%, Čałaku — 19,3%. Abodva kandydaty projduć u druhi tur, jaki adbudziecca 8 śniežnia.

Pieršapačatkova hałoŭnym kankurentam Čałaku ličyŭsia lidar AUR Džordže Simijon, jaki, pavodle papiarednich danych, zaniaŭ čaćviortaje miesca.

Aficyjnyja vyniki nie supadajuć z danymi ekzitpołaŭ, pavodle jakich na druhoje miesca vychodziła pradstaŭnica Libieralna-kansiervatyŭnaj partyi Elena Łaskoni. Urešcie jana zaniała treciaje miesca.

Džeardžesku apytańni pradkazvali 16-17% i maksimum treciaje miesca.

Kančatkovyja vyniki buduć abvieščany ŭ paniadziełak paśla padliku hałasoŭ u Buchareście i na ŭčastkach za miažoj.

U vybarach udzielničała 13 kandydataŭ. Dla pieramohi ŭ pieršym tury nieabchodna było nabrać bolš za 50% hałasoŭ.

Čałaku zajaŭlaŭ, što ŭ jaho jość «peŭny płan pa stvareńni bolš raźvitaj Rumynii, jakaja nie pakinie nikoha biez uvahi, unutrany płan, zasnavany na ekanamičnym roście i inviestycyjach, i płan pa ŭmacavańni ŭpłyvu i aŭtarytetu Rumynii za miažoj».

Jon taksama nazvaŭ «palityčnymi ekstremistami» palitykaŭ, jakija vystupajuć suprać členstva krainy ŭ ES i NATO, i zajaviŭ, što jany pavinny być «palityčna izalavanyja».

Kełyn Džeardžesku byŭ abjektam krytyki za prarasijskija vykazvańni, a taksama za svaju pazicyju adnosna adnosin Rumynii z NATO i ES.

U 2021 hodzie jon zajaŭlaŭ, što Paŭnočnaatłantyčny aljans nie budzie abaraniać nivodnaha sa svaich členaŭ u vypadku napadu Rasii, nahadvaje Reuters.

Džeardžesku taksama krytykavaŭ vajennuju dapamohu Ukrainie z boku ZŠA.

Svaju vybarnuju kampaniju 62-hadovy palityk pieravažna vioŭ u tyktoku, dzie atrymaŭ papularnaść.

«Paśla 34 hadoŭ błukańnia rumynski narod upieršyniu pieramoža na hetych vybarach. Maja partyja — rumynski narod», — zajaviŭ Džeardžesku.

Lidar «Aljansa za abjadnańnie rumynaŭ» Džordže Simijon, jaki ličyŭsia asnoŭnym kankurentam Čałaku, padčas vybarčaj kampanii nie raz zhadvaŭ vajnu va Ukrainie, ź jakoj miažuje Rumynija.

U 2022 hodzie i paźniej jon nieadnarazova nazyvaŭ Uładzimira Pucina vajennym złačyncam, ale pry hetym vystupaŭ suprać pastavak zbroi Ukrainie. Jaho taksama abvinavačvali ŭ suviaziach z rasijskimi śpiecsłužbami, na što Simijon adkazvaŭ, što jon uznačalvaje «samuju rusafobskuju partyju Rumynii».

Prezident Rumynii — kiraŭnik dziaržavy i hałoŭnakamandujučy ŭzbrojenymi siłami krainy. Jon abirajecca na 5 hadoŭ i vałodaje značnymi paŭnamoctvami ŭ pytańniach nacyjanalnaj biaśpieki i źniešniaj palityki.

• 0
• 0
• 0
• 1
• 0
• 0
• 0
• 0