Nou-chau amierykanskaj sudovaj sistemy — hladzim na złačynstva vačyma abvinavačanaha praz VR-šlem
Mahčyma, heta pieršy vypadak u historyi amierykanskaj sudovaj sistemy, kali ŭ jakaści dokazu pryniali rekanstrukcyju złačynstva ŭ virtualnaj realnaści (VR). Adbyłosia heta pa prośbie samoha abvinavačanaha.
Sudździa ŭ štacie Fłaryda pahadziŭsia vykarystać VR-šlem dla vyvučeńnia spravy ab uzbrojenym napadzie. Vypadak užo pryciahnuŭ uvahu jurystaŭ i ekśpiertaŭ pa ŭsim śviecie, paviedamlaje vydańnie Gizmodo sa spasyłkaj na miascovy telekanał Local10 News.
U sudzie razhladaŭsia kanflikt, jaki adbyŭsia ŭ 2023 hodzie na adnoj ź viasielnych placovak u Fłarydzie. Ułaśnik placoŭki Mihiel Albisu byŭ abvinavačany ŭ napadzie z vykarystańniem śmiarotna niebiaśpiečnaj zbroi paśla taho, jak nibyta razmachvaŭ pistaletam padčas svarki z haściami. Pavodle viersii abarony, Albisu pryjechaŭ na miesca paśla taho, jak jaho žonku i syna atakavali ŭdzielniki mierapryjemstva, a žonka atrymała traŭmu ruki.
Abarona Mihiela Albisu pajšła na niestandartny krok, kab dakazać, što jon nie ździajśniaŭ anijakaha złačynstva i dziejničaŭ vyklučna ŭ jakaści samaabarony. Advakat mužčyny źviarnuŭsia da prahramista, kab stvaryć VR-simulacyju kanfliktu z dapamohaj harnitury Oculus Quest 2. Hałoŭnaja meta — pakazać sudździ i prysiažnym situacyju «z vačej» abvinavačanaha, kab jany mahli lepš zrazumieć jaho dziejańni ŭ toj momant.
«My nadzieli VR-harnituru na sudździu, prakuroraŭ i śviedak, kab jany zmahli ŭbačyć situacyju vačami majho klijenta. Na jaho napali pjanyja ŭdzielniki viečaryny, schapili jaho, i jon adčuŭ, što pavinien vykarystać zbroju dla abarony žyćcia i majomaści», — patłumačyŭ advakat Mihiela Albisu.
Padčas niadaŭniaha papiaredniaha sudovaha słuchańnia telekanał Local10 News pakazaŭ kadry, dzie sudździa i inšyja ŭdzielniki pracesu nazirali za animacyjaj u virtualnaj realnaści. Niahledziačy na toje, što sudździa ŭžo ŭklučyŭ simulacyju ŭ pieralik rečavych dokazaŭ, jon jašče pavinien vyznačyć, ci budzie sprava zakrytaja albo pieradadzienaja na razhlad prysiažnych. Vynik spravy moža stać precedentam dla dalejšaha vykarystańnia VR u pravasudździ, padkreślivaje Gizmodo.
Gizmodo taksama adznačaje, što vykarystańnie roznych pieradavych technałohij u sudach — nie novaja źjava. Z dapamohaj virtualnaj realnaści moža być praściej zrazumieć składanuju situacyju, asabliva kali ŭbačyć jaje na svaje vočy byccam by ŭ sam momant złačynstva. Ale ŭźnikaje pytańnie: nakolki dakładnymi źjaŭlajucca takija rekanstrukcyi i ci nie mohuć jany padmanuć sud?
Jurysty i ekśpierty ŭ halinie technałohij aścierahajucca, što paŭsiudnaje ŭviadzieńnie VR u sudach moža adkryć «skryniu Pandory» — moža ŭźniknuć spakusa manipulavać virtualnymi danymi dla stvareńnia patrebnaj karciny padziej.
«U virtualnaj rekanstrukcyi zaŭsiody prysutničaje čałaviečy faktar. Navat kali sceny stvarajucca na asnovie faktaŭ, ich interpretacyja moža być subjektyŭnaj», — adznačajuć ekśpierty.
Ciapier čytajuć
Paśla pajezdki za miežy ES tajamniča źnik Anatol Kotaŭ, byłaja pravaja ruka Paŭła Łatuški33
Kamientary