Na adzinym uroku 1 vieraśnia školniki buduć słuchać cytaty Łukašenki i pisać list pijanieram 2075 hoda

Ministerstva adukacyi daručyła pravieści 1 vieraśnia va ŭsich škołach krainy adziny ŭrok na temu «Estafieta pakaleńniaŭ: zachoŭvajučy minułaje, stvarajem budučyniu». Dla nastaŭnikaŭ padrychtavali prykładny płan uroka.

Stvarać budučyniu dzieciam prapanujuć u savieckim styli. Tolki zamiest cytaty Lenina ŭrok u biełaruskich škołach pačniecca z cytaty Łukašenki: «Biez tradycyj niama nacyi, niama dziaržavy. Heta pytańnie bieśpierapynnaści historyi naroda i zachavańnia kulturnaha koda. Heta pytańnie našaj śviaščennaj suviazi z papiarednimi pakaleńniami i tymi, chto pryjdzie paśla nas».

Tradycyju i historyju biełaruskaha naroda aŭtary ŭroka viaduć nie z hłybini viakoŭ, a tolki ad kanca Druhoj suśvietnaj vajny. Naprykład, dzieciam prapanujecca napisać na došcy vobłaka słoŭ, jakoje adlustroŭvaje kaštoŭnaści i dasiahnieńni niekalkich pakaleńniaŭ biełarusaŭ.

Heta vobłaka viartaje dziaciej niezaležnaj Biełarusi ŭ časy SSSR, jakoha niama ŭžo 34 hady. Školnikam prapanujuć takija varyjanty: Vialikaja Pieramoha, histaryčnaja pamiać, pracoŭny podźvih naroda, zavody, harady, udarnaja budoŭla, asvajeńnie kosmasu, navuka, adukacyja, moładź, kamsamoł, BRSM, pijanier, kastryčnik, budaŭničy atrad, Respublika Biełaruś, Hod dobraŭparadkavańnia, siamiejnyja kaštoŭnaści, ciahnik Pamiaci.

Starejšym školnikam daviadziecca składać z hetych słoŭ łancužki. Adzin z prykładaŭ: Vialikaja Pieramoha — BRSM — budaŭničy atrad — udarnaja budoŭla — zachavańnie histaryčnaj pamiaci.

Potym nastaŭniki na ŭroku 1 vieraśnia 2025 hoda pračytajuć dzieciam listy ŭ budučyniu ad savieckich akciabrat, pijanieraŭ i kamsamolcaŭ. Budzie ŭ školnikaŭ i praktyčnaje zadańnie — napisać taki ž list akciabratam, pijanieram i kamsamolcam 2075 hoda. Vidać, u Ministerstvie adukacyi ŭsio jašče spadziajucca bližej da kanca vieku pabudavać kamunizm.

Naprykancy školnikam nahadajuć, što «nacyjanalnaja biaśpieka zabiaśpiečana tymi mierapryjemstvami, jakija byli praviedzieny pad kiraŭnictvam Alaksandra Łukašenki». I prapanujuć narešcie karysnaje zadańnie: skłaści vialiki turystyčny maršrut pa Biełarusi.

U dadatku dla nastaŭnikaŭ zrabili šparhałku ab dasiahnieńniach Biełarusi. Siarod ich čynoŭniki prapanujuć nazyvać piacihodku jakaści, Hod dobraŭparadkavańnia, «Vachtu pamiaci», stvareńnie BRSM, raspracoŭku prasa «Aresa» i vypusk šakaładki «Prezident» ad «Kamunarki». U hetym dadatku proźvišča Łukašenka zhadvajecca piać razoŭ.

• 0
• 0
• 1
• 12
• 0
• 0
• 3
• 0