Bajden u raźvitalnym zvarocie da nacyi papiaredziŭ ab mahčymym zachopie ŭłady aliharchijaj, jakaja pahražaje demakratyi
Džo Bajden vystupiŭ z raźvitalnym zvarotam da nacyi. Jon papiaredziŭ ab farmavańni ŭ ZŠA aliharchii, jakaja pahražaje demakratyi. Jon zaklikaŭ źmianić Kanstytucyju ZŠA, kab nivodny prezident nie byŭ abaronieny ad kryminalnaha pieraśledu za złačynstvy, učynienyja na pasadzie.
Ułada ŭ ZŠA kancentrujecca «ŭ rukach vielmi nievialikaj kolkaści zvyšbahatych ludziej», heta niebiaśpiečnaja tendencyja, zajaviŭ prezident Džo Bajden u raźvitalnym zvarocie da krainy.
«Siońnia ŭ Amierycy farmujecca aliharchija nadzvyčajnaha bahaćcia, ułady i ŭpłyvu, jakaja litaralna pahražaje ŭsioj našaj demakratyi, našym asnoŭnym pravam i svabodam, a taksama spraviadlivamu šancu atrymać pośpiech kožnamu», — skazaŭ Bajden.
Jon dadaŭ, što niepakoj vyklikaje «patencyjny rost technałahična-pramysłovaha kompleksu, jaki moža ŭjaŭlać realnuju niebiaśpieku dla našaj krainy».
«My pavinny refarmavać padatkovy kodeks, nie dajučy miljarderam samyja vialikija padatkovyja lhoty, a prymušajučy ich pačać płacić svaju spraviadlivuju dolu», — skazaŭ jon.
Prezident ZŠA vykazaŭ zaniepakojenaść u dačynieńni da łaviny dezynfarmacyi, adsutnaści pravierki faktaŭ u sacsietkach.
«Amierykancy akazvajucca pachavanymi pad łavinaj dezynfarmacyi i niedakładnych źviestak, što dazvalaje złoŭžyvać uładaj», — dadaŭ jon.
Jon zaklikaŭ źmianić Kanstytucyju, kab nivodny prezident nie zmoh paźbiehnuć adkaznaści za złačynstvy, učynienyja padčas kiravańnia.
Inaŭhuracyja Donalda Trampa adbudziecca 20 studzienia. Jaho bahaćcie składzie ciapier $7 młrd.
Adnym z hałoŭnych sponsaraŭ Trampa staŭ miljarder Iłan Mask, jaki doŭhi čas zastajecca najbahaciejšym čałaviekam śvietu z bahaćciem $450 młrd. Padtrymku Trampu vykazali i inšyja najbahaciejšyja ludzi płaniety — kiraŭnik Meta Mark Cukierbierh i kiraŭnik Amazon Džef Biezas.
Ciapier čytajuć
«Ja skazaŭ na videa, što mianie nie katujuć — na toj momant heta było praŭdaj. A paśla mianie bili dźvie hadziny». Ukrainski žurnalist dva hady pravioŭ u rasijskim pałonie — voś što jon pieražyŭ1
Kamientary