U Biełastoku źbili dvuch biełarusaŭ. Jany «abmianialisia vietlivaściami» ź nieznajomkaj, a taja paskardziłasia dvum chłopcam

Padyšli nieznajomcy, pavalili na ziamlu i pačali źbivać

Incydent adbyŭsia 20 lipienia 2025 hoda na vulicy Mickieviča ŭ Biełastoku. Pavodle słoŭ paciarpiełych, uviečary jany pravodzili siabra i źbiralisia vyklikać taksi. Mima prachodziła dziaŭčyna z sabakam i razmaŭlała pa telefonie.

Biełarusy śćviardžajuć, što nieznajomka skazała niešta abraźlivaje ŭ ich adras, a jany joj adkazali.

Dziaŭčyna pajšła, ale praź niekalki chvilin da maładych ludziej (adzin ź ich na toj momant byŭ niepaŭnaletnim) padyšli nieznajomcy, pavalili ich na ziamlu i pačali źbivać. Paciarpiełyja miarkujuć, što dziaŭčyna paviedamiła kamuści pa telefonie, što jaje abrazili.

Kali napadniki pačuli, što chłopcy havorać z akcentam, jany pačali kryčać: «S***dalaj na Ukrainę» («Pravalvaj va Ukrainu»). U adnaho z chłopcaŭ sprabavali adabrać telefon, ale ŭ momant napadu jon raźbiŭsia.

Pačuŭšy huk sireny palicejskaj mašyny, jakaja ŭ hety momant prajazdžała dzieści niepadalok, napadniki ŭciakli. Źbityja biełarusy nie stali telefanavać u palicyju — jany vyklikali taksi i pajechali dadomu.

Źniali zapis z kamiery videanazirańnia i źviarnulisia da miedykaŭ

Na ranicu Vieranika ŭbačyła, u jakim stanie syn viarnuŭsia dadomu, i pryniała rašeńnie źviartacca ŭ palicyju. Jana źviazałasia z mamaj Marka. Žančyny pajechali na miesca, dzie było napadzieńnie. Niepadalok znachodzicca krama, na jakoj ustanoŭleny kamiery videanazirańnia. Žančyny paprasili ŭładalnika handlovaha abjekta dać im pahladzieć zapisy. Na ich vidać, jak na chłopcaŭ napadajuć nieviadomyja.

Tady ž maładyja ludzi źviarnulisia ŭ balnicu. Tam u adnaho ź ich dyjahnastavali pierałom skuły, u druhoha — traŭmy siaredniaj ciažkaści.

Palicyja pieradała spravu ŭ prakuraturu

Z sabranymi dokazami žančyny źviarnulisia ŭ adździaleńnie palicyi.

24 lipienia 2025 hoda prakuratura zaviała kryminalnuju spravu. U aficyjnym paviedamleńni havorycca pra «pryčynieńnie cialesnych paškodžańniaŭ na hlebie nacyjanalnaj prynaležnaści dvum hramadzianam Biełarusi». Spravu kvalifikavali pavodle dvuch artykułaŭ kryminalnaha kodeksa Polščy: art. 158, p. 1 — udzieł u źbićci, ździejśnienym hrupaj asob, i art. 119, p. 1 — złačynstva, ździejśnienaje z matyvaŭ nacyjanalnaj nianaviści.

Siamji paciarpiełych naniali advakata. Adnak na momant zvarotu ŭ redakcyju, 9 lutaha, u ich nie było infarmacyi ad pravaachoŭnych orhanaŭ pra chod rasśledavańnia spravy.

Dvum udzielnikam pradjaŭleny abvinavačańni

MOST nakiravaŭ zapyt u rajonnuju prakuraturu Biełastoka. Jany paprasili ŭdakładnić, na jakim etapie znachodzicca rasśledavańnie, ci ŭstanoŭleny ŭsie ŭdzielniki napadu i jaho pryčyny, ci pradjaŭleny abvinavačańni i jakija śledčyja dziejańni ŭžo praviedzieny.

U redakcyi jość adkaz prakuratury. U im ukazana, što «ŭ ciapierašni momant dvum udzielnikam incydentu pradjaŭleny abvinavačańni» pavodle artykułaŭ pra źbićcio hrupaj asob i hvałt na hlebie nacyjanalnaj nianaviści. Paviedamlajecca, što pravodziacca «pracesualnyja dziejańni, nakiravanyja na poŭnaje vyśviatleńnie abstavinaŭ zdareńnia, u tym liku pravierka tłumačeńniaŭ padazravanych. Rašeńnie pra zaviaršeńnie rasśledavańnia i termin jaho zakančeńnia zaležać ad vynikaŭ hetych dziejańniaŭ». Inšyja padrabiaznaści spravy prakuratura nie raskryvaje.

Taksama MOST stała viadoma, što spravu ŭziała pad nahlad Akruhovaja prakuratura Biełastoka.

• 4
• 0
• 2
• 3
• 0
• 2
• 9
• 0