«U paniadziełak vam budzie vielmi viesieła hladzieć televizar». Tramp vystupiŭ pierad prychilnikami napiaredadni inaŭhuracyi
Abrany prezident ZŠA Donald Tramp vystupiŭ na mitynhu svaich prychilnikaŭ u kompleksie Capital One Arena u Vašynhtonie napiaredadni svajoj inaŭhuracyi, paabiacaŭšy ŭ pieršy ž dzień znachodžańnia na pasadzie kiraŭnika dziaržavy padpisać mnostva ŭkazaŭ.
«My pieramahli!» — skazaŭ Tramp u pačatku vystupu pad kryki natoŭpu.
Jon zajaviŭ, što novaja administracyja źbirajecca «pakłaści kaniec panavańniu pravalnaha isteblišmientu ŭ Vašynhtonie» i «zrabić Amieryku znoŭ vialikaj».
«U paniadziełak apoŭdni [a 20-j pa Minsku — NN] začynicca zasłona čatyroch doŭhich hadoŭ amierykanskaha zaniapadu, i my pačniem zusim novuju hłavu dla amierykanskaj siły i roskvitu, hodnaści i honaru. Viarniem usio heta raz i nazaŭsiody», — skazaŭ Tramp.
Jon taksama paabiacaŭ spynić «uvarvańnie» nielehalnych mihrantaŭ na amierykanskaj miažy, paabiacaŭšy ahučyć kankretnyja miery ŭ inaŭhuracyjnaj pramovie ŭ paniadziełak.
Ekśpierty kažuć, što jaho abiacańnie departavać miljony nielehalnych mihrantaŭ sutykniecca ź vielizarnymi łahistyčnymi ciažkaściami i moža abyścisia ŭ dziasiatki abo sotni miljardaŭ dalaraŭ.
Pa słovach Trampa, u paniadziełak jon źbirajecca padpisać mnostva ŭkazaŭ, jakija «vielmi paradujuć» amierykancaŭ.
«Usio pačniecca ŭ paniadziełak. U paniadziełak vam budzie vielmi viesieła hladzieć televizar», — paabiacaŭ Donald Tramp.
Čakajecca, što ŭ paniadziełak jon padpiša bolš za 200 dakumientaŭ, u tym liku vykanaŭčyja ŭkazy i inšyja prezidenckija rasparadžeńni.
«Kožny radykalny i durny ŭkaz administracyi Bajdena budzie admienieny na praciahu niekalkich hadzin paśla taho, jak ja pryniasu prysiahu», — dadaŭ Tramp.
Vystupleńnie Trampa było davoli praciahłym i bolš nahadvała jaho pieradvybarčyja pramovy. Hledačam demanstravali videaroliki, na scenu vychodziŭ biźniesmien Iłan Mask, Tramp taksama pradstaŭlaŭ klučavych supracoŭnikaŭ svajoj novaj administracyi.
U svajoj pramovie Tramp zakranuŭ pahadnieńnie ab pieramirji ŭ Hazie i situacyju z sacyjalnaj sietkaj TikTok, a taksama znoŭ paabiacaŭ skončyć vajnu va Ukrainie, ale nie ŭdakładniŭ, jak mienavita.
«Hetaje pahadnieńnie mahło być dasiahnuta tolki ŭ vyniku našaj histaryčnaj pieramohi ŭ listapadzie», — skazaŭ jon. Tramp, u pryvatnaści, padziakavaŭ svajmu śpiecpasłańniku na Blizkim Uschodzie Styva Vitkofa za dapamohu ŭ dasiahnieńni pahadnieńnia.
«My dabilisia bolš, nie budučy prezidentami, čym jany dabilisia za čatyry hady z prezidentam», — zajaviŭ Tramp.
Abrany prezident taksama zajaviŭ, što jamu padabajecca sacyjalnaja sietka TikTok, jakaja adnaviła pracu ŭ niadzielu paśla abiacańnia Trampa dać servisu adterminoŭku na try miesiacy da zabarony, i skazaŭ, što «ciktok nieabchodna zachavać».
«Ź siońniašniaha dnia TikTok viartajecca ŭ ZŠA», — skazaŭ Tramp.
«Ščyra kažučy, u nas niama vybaru, my pavinny jaho zachavać. Vielmi šmat pracoŭnych miescaŭ. My nie chočam addavać naš biznes Kitaju, my nie chočam addavać naš biźnies inšym ludziam», — dadaŭ jon.
Ciapier čytajuć
U Ofisie Cichanoŭskaj pracuje vykładčyk z Danii. Jon raskazaŭ, čamu kinuŭ kamfortnaje žyćcio i zaniaŭsia biełaruskaj spravaj4
Kamientary