Dziaŭčyna arandavała na dzień narodzinaŭ zamak pad Minskam — i ŭzarvała tyktok
Kamientatary žartujuć, što tak zvyčajna pačynajucca filmy žachaŭ: «Kampanija siabroŭ pajechała ŭ stary zamak adśviatkavać dzień narodzinaŭ…».
Što i kazać: nazvać arandavany dom prosta katedžam nie vypadaje — heta zamak. Ale nie staražytny, kaniečnie — źjaviŭsia jon u postsavieckija hady. U vioscy Prymorje, što la Minska, sučasnych zamkaŭ ažno niekalki.
Uvohule, u vioskach Prymorje, Siomkava i Siomkaŭ Haradok, jakija adnosiacca da Papiarnianskaha sielsavieta, samaja vysokaja kancentracyja ŭ Biełarusi zamkaŭ postsavieckaj epochi. Niekatoryja ź ich tak i zastalisia stajać niedabudavanymi, inšyja hod za hodam stračvajuć prezientabielny vyhlad (utrymlivać zamak — vielmi darahoje chobi). Jość i budynki, u jakija ŭkłali značnyja sumy hrošaj i praviali rekanstrukcyju.
Adzin z takich zamkaŭ, jakija pamiatajuć dobryja časy žyćcia svaich uładaroŭ, i arandavała praz «Kufar» minčanka, kab adśviatkavać dzień narodzinaŭ. Jana pažartavała, što praviadzie razam siabrami 24 hadziny ŭ kampanii miascovych pryvidaŭ.
Źniešni vyhlad zamka ŭraziŭ šmat kaho. Za dzień rolik dziaŭčyny ŭ tyktoku nabraŭ 750 tysiač prahladaŭ i 80 tysiač łajkaŭ. U kamientaryjach žartavali, što z takich videa časta pačynajucca filmy žachaŭ: «Potym niechta z tvaich siabroŭ źnikaje. Vy pačynajecie jaho šukać, i ŭ pracesie vyjaŭlajecie dziŭnyja rečy. I razumiejecie, što nie adny ŭ hetym domie».
Dziaŭčynie raili pamiatać hałoŭnaje praviła takoha kino: pa zakonach žanru apieratary nie pamirajuć nikoli. To-bok kali pačynaje adbyvacca niešta dziŭnaje, lepš być nie ŭ kadry, a z kamieraj.
«Naša Niva» adšukała na «Kufary» abjavu ab zdačy ŭ arendu hetaha samaha doma.
Unutry jon vyhladaje našmat bolš ścipła, čym zvonku. Carskich interjeraŭ vy tut nie ŭbačycie. Ramont u pakojach nahadvaje pra toje, što było modna ŭ nulavyja.
A ŭ pakoi, dzie prachodziać śviaty, da doŭhaha stała prystaŭleny samyja zvyčajnyja školnyja kresły. Dyzajn u spalniach adsutničaje — tam staić adzin abo niekalki dvuchspalnych łožkaŭ (časam jašče skuranyja kresły-monstry).
Zatoje ŭ haścinaj raduje vialiki kamin i rajal.
Hetak ža, jak u lubym prystojnym zamku, jość aranžareja. Pryjemny bonus — łaźnia, naviedvańnie jakoj uklučana ŭ košt pražyvańnia.
Arandavać zamak kaštuje 650 rubloŭ za sutki. Košt aktualny pry ŭmovie, što budzie mienš za 10 čałaviek. A tearetyčna tut moža źmiaścicca da 40 haściej. Błohierka zapłaciła 950 rubloŭ za 14 čałaviek.
U sialanskaj chacie abo ŭ zamku. Dzie ŭ Biełarusi možna pažyć u histaryčnym budynku i kolki heta kaštuje?
Błohiery pažyli va ŭsich pałacach i zamkach Biełarusi i skłali svoj rejtynh z cenami
Viadomaja biełaruskaja biznesvumen — i žonka praŭładnaha błohiera-miljońnika — šukaje arandataraŭ dla svajho katedžu. Košt vaŭ!
Sotni rubloŭ, kab efiektna daviedacca poł budučaha dziciaci: biełarusy robiać usio bolš maštabnyja hiendar-paci3
Kamientary