Staršynia «Hramady» Vilski znajšoŭ vinavatych u publikacyi fejkavaj zajavy pra Cichanoŭskuju. I padumvaje źviartacca ŭ palicyju
Vykanaŭca abaviazkaŭ staršyni «Narodnaj Hramady» Jaŭhien Vilski nie razumieje, adkul uziałasia zajava jaho partyi ab niepryznańni Śviatłany Cichanoŭskaj. Jaje tekst byŭ apublikavany ŭ telehram-kanale partyi, a paśla vydaleny.
Partyja «Narodnaja Hramada» abjadnoŭvaje ŭ emihracyi prychilnikaŭ palitviaźnia i kandydata ŭ prezidenty — 2010 Mikoły Statkieviča, jakoha prysudzili da 14 hadoŭ źniavoleńnia. U jaho adsutnaść vykonvać abaviazki staršyni partyi staŭ Jaŭhien Vilski.
Vilski — połacki afhaniec, jaki ŭ siaredzinie 2010-ch byŭ u «Havary praŭdu», ličyŭsia davieranaj asobaj Taćciany Karatkievič. Paśla dałučyŭsia da Hramady, ale byŭ na druhasnych rolach.
U 2020-m Vilski byŭ kaardynataram inicyjatyŭnaj hrupy Cichanoŭskaj pa Viciebskaj vobłaści. Pierad vybarami jaho zatrymlivali, Jaŭhien siadzieŭ u Navapołackim CIPie.
U emihracyi jon uvajšoŭ jašče i ŭ Forum demakratyčnych sił — inicyjatyvu na čale z Valeryjem Capkałam, jakaja ŭ 2022 hodzie sprabavała pierachapić lidarstva ŭ Śviatłany Cichanoŭskaj. Siarod inšych padpisantaŭ rezalucyi taho Foruma byli Dźmitryj Bałkuniec i Volha Karač.
Ci jość prychilniki ŭ Vilskaha? Kali ŭ 2024 hodzie častka apazicyi vyrašyła pravodzić vybary ŭ Kaardynacyjnuju radu, jaho «Hramada» taksama vyrašyła paspytać ščaścia. Atrymałasia pravalna.
Kab nabrać bolšy pracent, Vilski ŭstupiŭ u kaalicyju z častkaj chryścijanskich demakrataŭ na čale z Hieorhijem Dźmitrukom. Apošniaja, darečy, taksama raniej sprabavała adprečvać paŭnamoctvy Cichanoŭskaj. Adnak ich supolny błok «Salidarnaść» nabraŭ miziernyja 104 hałasy ŭ svaju padtrymku (1,55% ad kolkaści tych, chto ŭziaŭ udzieł u hałasavańni).
Bolš taho — u bazie danosaŭ, zdabytaj «Kibierpartyzanami» z uzłamanaha sajta KDB, znajšli dva staryja zvaroty ad kandydataŭ «Hramady».
Pavieł Bialucin napisaŭ danos na Mikałaja Aŭtuchoviča, a Volha Ciškievič — na Eduarda Palčysa. Adrazu paśla raskryćcia abodvuch sa śpisaŭ vyklučyli, ale imidž arhanizacyi heta, zrazumieła, nie palepšyła. Volha Ciškievič nieŭzabavie paśla taho viarnułasia ŭ Biełaruś i dała intervju prapahandystam z ANT. U im jana raskazvała pra Kaardynacyjnuju radu, palitviaźniaŭ, hrošy ŭ partyi i drony, jakimi nibyta źbiralisia ŭdaryć pa Biełarusi. Paśla Ciškievič źnikła z dalahladaŭ.
U žniŭni 2024 hoda Vilski razam sa svaim chaŭruśnikam Dźmitrukom, a taksama z «Krainaj dla žyćcia» Vitala Saviuka (jaki nabraŭ na vybarach u KR jašče mienš — 61 hołas) zapatrabavali ŭ Cichanoŭskaj «pačać dyjałoh z usimi demakratyčnymi palityčnymi siłami» — to-bok i ź imi.
Tamu kali ŭ telehram-kanale «Hramady» źjaviŭsia dakumient ab niepryznańni Śviatłany Cichanoŭskaj nacyjanalnaj lidarkaj Biełarusi, nichto nie ździviŭsia. Pa-pieršaje, heta zajava nie piarečyła raniejšaj dziejnaści i vykazvańniam Vilskaha. Pa-druhoje, jana była apublikavanaja ŭ telehram-kanale, spasyłka na jaki paznačana na aficyjnym sajcie partyi.
Pa-treciaje, niekatoryja z prychilnikaŭ inicyjatyvy paśpieli pierapościć zajavu ŭ sacsietkach sa słovami ŭchvaleńnia.
Adnak praź niekatory jašče ŭ adnym kanale (akazałasia, što ich minimum dva) źjaviłasia rašučaje abviaržeńnie. Partyja asprečyła, što pieradavała ŭ litoŭski Siejm list ab niepryznańni Cichanoŭskaj. «Tanny ŭbros», — napisana ŭ novaj zajavie.
Havorki pra ŭzłom pieršaha telehram-kanała «Hramady» niama — bo startavuju zajavu adtul chucieńka vydalili. Značyć, dostup da kanała ŭ partyjcaŭ zachoŭvajecca.
Dyk što adbyvajecca i chto vystaŭlaŭ pieršuju zajavu (a paśla, adpaviedna, vydalaŭ jaje)? «Naša Niva» źviarnułasia da Jaŭhiena Vilskaha z prośbaj prakamientavać situacyju.
«Nijakaj zajavy partyja «Narodnaja hramada» nie rabiła. Pytańnie da vas, čamu publikujecie, nie pravieryŭšy? Zakaz vykonvajecie? My raźbirajemsia. Zajaŭ my nie rabili. I jano źjaviłasia, kali my byli ŭ Siejmie ci tolki vyjšli. Poŭnaja pravakacyja».
Vilski nie zmoh patłumačyć, u kaho z paplečnikaŭ jość administratarski dostup da telehram-kanała, u jakim apublikavali zajavu. Adnak jon užo znajšoŭ vinavatych. Heta žurnalisty.
«Prafiesijnym žurnalistam treba spačatku pravieryć infarmacyju. My razhladajem pytańnie padać na vas zajavu ŭ palicyju. I bolš nijakich kamientaroŭ. Z saboj raźbiaryciesia», — napisaŭ Jaŭhien Vilski ŭ adkaz «Našaj Nivie».
«Tanny ŭbros». «Narodnaja Hramada» admaŭlaje, što pieradavała ŭ litoŭski Siejm list ab niepryznańni Cichanoŭskaj
Siabroŭka «Narodnaj hramady», jakaja pisała danosy ŭ KDB, viarnułasia ŭ Biełaruś i dała intervju prapahandystam
«Narodnaja hramada» adreahavała na apubličvańnie danosčykaŭ u šerahach partyi
Ciapier čytajuć
U Homieli zakryli zabiahałaŭku pradprymalnika-łukašysta i źniščyli jaho płakat sa Stalinym8
Kamientary