Aleksin i Tapuzidzis skončyli vajnu za tytuniovy rynak Biełarusi. Abodva prajhrali. A voś chto, zdajecca, pieramoh

Biełaruski tytuniovy biznes — zarehulavanaja składanymi miechanizmami licenzij i kvot tema. Aproč dziaržaŭnaha zavoda ŭ Hrodnie, vyrablać cyharety mahli (napeŭna, heta ŭžo pravilnaje słova) tolki dva čałavieki: Pavieł Tapuzidzis i favaryt Viktara Łukašenki Alaksiej Aleksin. 

Čytajcie historyju kamiercyjnaha ŭźlotu Paŭła Tapuzidzisa: «Aleksin — heta Viktar, Tapuzidzis — heta Dźmitryj». Zachaplalnaja historyja biznesu Paŭła Tapuzidzisa

Usie try hulcy zarablali na roznym. 

Tapuzidzis, majučy ekskluziŭnyja kantrakty z British American Tobacco (BAT) i Japan Tobacco International​ (JTI), zarablaŭ na aŭtsorsinhu dla zachodnikaŭ, a taksama pradavaŭ paru ŭłasnych marak na ŭnutranym rynku. 

Hrodzienskaja fabryka tolki napaŭniała ŭnutrany rynak tannymi cyharetami, a voś pradavać ich užo było premijaj dla siabroŭ siamji. Na realizacyju sieŭ Aleksin, zastaviŭšy krainu «Tabakierkami», a liški hnali kantrabandaj na Zachad.

Sprava pajšła tak dobra, što z časam uźnikła patreba pastavić jašče adzin zavod — užo pryvatny, aleksinaŭski. 

Kaniec hetaj umoŭnaj raŭnavazie pakłaŭ 2020 hod i šyrokija siektaralnyja sankcyi. Namienkłatura dazvolenaha ź Biełarusi na Zachad ekspartu mocna skaracilisia, vysililisia čyhunačnyja płyni, a razam ź imi — mahčymaści dla zavaročvańnia kantrabandy. U asnoŭnym jaje vazili ŭ vahonach pad, umoŭna, prysypkaj z kalija ci draŭnianaj habluški. 

U takich umovach baraćba za ŭnutrany rynak, jaki raniej zdavaŭsia nieistotnym i niepatrebnym, abvastryłasia. Za košt šyrejšych suviaziaŭ i bolšych mahčymaściaŭ Aleksin litaralna za paŭtara hoda zahnaŭ Tapuzidzisa ŭ andehraŭnd, pazbaviŭšy jaho mahčymaści pradavać svaju pradukcyju choć niedzie, aproč ułasnaj sietki raspaŭsiudu ŭ «Karonie». Adpaviedna, i kvoty na vyrab dla Tapuzidzisa byli ŭrezanyja. 

Čytajcie taksama: Aleksin dušyć Tapuzidzisa. I blizki da pośpiechu

Možna było b zadacca pytańniem, a čamu zusim nie zavałodać čužym zavodam, kali maješ administratyŭnyja ryčahi? Napeŭna, kantrakty z amierykancami, pabudavanyja na asabistych adnosinach, u niejkim sensie abaraniali Tapuzidzisa ad rekietu — biez doŭhaterminovych kantraktaŭ biznes stanovicca mienš ustojlivym i pieratvarajecca ŭ łatareju, u jakoj možna nie vyjhrać. 

Z uviadzieńniem amierykanskich sankcyj suprać Tapuzidzisa supracoŭnictva z karparacyjami zhasła samo saboj. Značyć, dla Aleksina adkryłasia akno mahčymaściaŭ? Nie. 

Kaniec vajny akazaŭsia niečakanym i razhromnym dla abodvuch. 

Pa infarmacyi «Našaj Nivy», ni adzin ni druhi nie atrymali kvot na vyrab cyharet u 2025 hodzie. Adkrytaj infarmacyi pra heta niama — raźmierkavańnie kvot nie publikujecca ŭ adkrytym dostupie. Ale pra heta nam paviedamili ludzi z haliny, jakija vałodajuć fakturaj. Pavodle ich słovaŭ, u 2025 hodzie kvoty na vyrab cyharet dla realizacyi na ŭnutranym rynku dla fabryk Aleksina i fabryki Tapuzidzisa «amal roŭnyja nulu». Z napaŭnieńniem unutranaha rynku, maŭlaŭ, spraŭlajecca i hrodzienskaja fabryka. 

A samu situacyju našy surazmoŭcy razhladajuć jak nastojlivaje zaprašeńnie abodvuch da abmierkavańnia prodažu zavodaŭ: čym daŭžej fabryki Aleksina i Tapuzidzisa buduć stajać biez spravy, tym vyšejšymi buduć ich abaviazki adnosna aktyvaŭ, tym mienšaj budzie kančatkovaja cana. Adpaviedna, čym raniej pahodzišsia — tym bolš zachavaješ, a spadziaješsia pieračakać — jašče zastaniešsia pavinien. 

Ale chto siońnia ŭ nastolki dobraj formie, kab łabiravać abrazańnie kvot i prymušać da dyjałohu Aleksina i Tapuzidzisa? Kaho i za što Łukašenki mohuć adaryć pravam zarablać na choć i abmialełaj, ale ŭsio jašče prybytkovaj kantrabandzie, asabliva kali ŭ ich isnuje spadzieŭ na prypynieńnie sankcyj? 

Čas pakaža, ale surazmoŭcy «Našaj Nivy» vykazvajuć zdahadku, što ščaślivymi ŭłaśnikami tytuniovych fabryk z najbolšaj imaviernaściu stanuć ludzi ź pieršaha koła chakiejnaha treniera Mikałaja Łukašenki, na hety momant samaha ŭpłyvovaha čałavieka krainy (nie ŭličvajučy Łukašenkaŭ) — Dźmitryja Baskava. 

Pavialičyć

• 2
• 2
• 25
• 15
• 4
• 0
• 13
• 0