Čamu vysoki cisk nie dazvalaje rasijskim Supierdžetam latać? Choć dla Boinha heta nie prablema

U Leninhradskaj vobłaści Rasii siońnia źjaviŭsia antycykłon, jaki pryjšoŭ ź Sibiry. Jaho vynikam staŭ vysoki atmaśfierny cisk u rajonie aeraporta Pułkava — 1055 hiektapaskalaŭ (hPa).

U suviazi z hetym admienieny bolš za 30 rejsaŭ na vylet z Pułkava i 27 — na prylot. Bolš za ŭsio ad hetaha paciarpieła avijakampanija «Rasija», bo značnaja častka jaje fłotu składajecca z rasijskich samalotaŭ Superjet 100.

U pres-słužbie pieravozčyka paviedamili, što avijakampanija vymušana karektavać raskład palotaŭ praz zruch pavietranych mas pry anamalna vysokim atmaśfiernym cisku va ŭmovach antycykłonu. Častka rejsaŭ budzie vykanana na samalotach bolšaj umiaščalnaści, u tym liku na dalokamahistralnych madelach.

Čamu Supierdžety nie mohuć latać, a Boeing i Airbus — mohuć?

Jak tłumačać śpiecyjalisty, Superjet 100 (na tabło jon paznačany jak SU95) nie moža pracavać pry takim vysokim cisku, bo jaho baramietryčnyja sistemy majuć vuzkija miežy dapuščalnych značeńniaŭ u paraŭnańni z dalokamahistralnymi i sučasnymi vuzkafiuzielažnymi samalotami.

Kožny samalot siertyfikavany na ekspłuatacyju ŭ peŭnym dyjapazonie atmaśfiernaha cisku. U Superjet 100 minimalnaja miaža — minus 1000 futaŭ (kala -305 mietraŭ) pa baramietryčnaj vyšyni (vyšyni, jakuju «bačyć» samalot, zychodziačy z atmaśfiernaha cisku).

Pry zvyčajnym cisku 1013 hPa na ŭzroŭni mora samalot «bačyć» nulavuju vyšyniu. Pry anamalna vysokim cisku, jak ciapier u Pułkava, samalot «dumaje», što jon znachodzicca nižej za ŭzrovień mora. U vyniku aŭtamatyčnyja sistemy Superjet 100 vychodziać za miežy biaśpiečnaj pracy i samalot nie moža narmalna funkcyjanavać.

Pavialičyć

Jakija prablemy ŭźnikajuć?

Zboj raboty vyšyniamieraŭ i aŭtapiłota. Jak tłumačać śpiecyjalisty, kali baramietryčnaja vyšynia sychodzić u admoŭnaje značeńnie, to heta pryvodzić da niekarektnaj raboty avijoniki. Naprykład, moža adklučycca aŭtapiłot, bo paličyć, što samalot nižej za dapuščalny ešałon (vyšyniu palotu, vyznačanaj pa standartnym atmaśfiernym cisku).

Akramia hetaha, vyšyniamiery pačnuć pakazvać niepraŭdzivyja danyja, što zrobić uźlot i pasadku niebiaśpiečnymi, bo ŭźlotnaja i pasadačnaja chutkaści mohuć być vyličany niekarektna, što stvaryć ryzyku pieralotu pałasy pry pasadcy abo niedastatkovaj ciahi pry ŭźlocie.

Niaspraŭnaść sistemy ruchavikoŭ. Akramia hetaha, jak pišuć śpiecyjalisty, ruchaviki, ustalavanyja na Superjet 100, nie pryznačany dla pracy ŭ takich umovach. Pry anamalna vysokim cisku paliŭnaja sistema moža padavać zanadta šmat paliva. Heta pavyšaje tempieraturu vychłapnych hazaŭ, što moža pryvieści da pierahrevu i avaryjnaha adklučeńnia ruchavika.

Prablemy z hiermietyzacyjaj sałona. Mohuć adbycca i pamyłki ŭ sistemie hiermietyzacyi. Pry zanadta vysokim cisku sistema aŭtamatyčna pavialičvaje zabor pavietra, kab padtrymlivać roźnicu ciskaŭ. Kali pierapad cisku stanie zanadta vialikim, moža spracavać avaryjny kłapan skidu cisku, što stvoryć rezki skačok cisku ŭ sałonie. Pasažyry i ekipaž adčujuć mocny ŭdar pa vušach, što moža vylicca ŭ bol i dyskamfort.

Jak pakazvaje situacyja ŭ Pułkava, nie ŭsie samaloty ŭraźlivyja da takoha cisku. Naprykład, Boeing 737-800 i Airbus A320 majuć šyrejšyja miežy dapuščalnaha cisku, tamu ich sistemy nie vychodziać za siertyfikavanyja limity.

Takim čynam, pryčyna admieny rejsaŭ Superjet 100 — heta nie sam fakt vysokaha cisku, a toje, što sistemy hetych samalotaŭ nie raźličany na paloty ŭ takich umovach.

• 18
• 20
• 68
• 50
• 10
• 6
• 1
• 2