Frydman prapanuje niestandartnyja sposaby, jak pryciahnuć uvahu ZŠA da Biełarusi
«Kab chto ź biełaruskich błohieraŭ zmoh dahrukacca da Iłana Maska…»
Palityčny ahladalnik Alaksandr Frydman ličyć, što inicyjatyva ZŠA adnosna mahčymaści prypynieńnia sankcyj uzamien na vyzvaleńnie palitźniavolenych moža być spynienaja ŭ luby momant. I pryčyna tut u adsutnaści ŭ ZŠA stratehii adnosna našaj krainy, u toj čas jak Alaksandr Łukašenka hatovy da praciahłych pieramoŭ. U intervju DW Biełaruś analityk adznačyŭ:
«Prablema, jakuju ja baču ŭ hetaj situacyi, — heta toje, što Łukašenka rychtujecca i chacieŭ by hulać u doŭhuju. U jaho jość čas, jon nie śpiašajecca. A asablivaść amierykanskaj dypłamatyi siońnia ŭ tym, kab sprabavać vyrašyć naskokam surjoznyja prablemy. I pakul heta zakančvajecca sumna. (…)
U vypadku Biełarusi ja nie dumaju, što amierykancy sapraŭdy hatovyja na niejkija paetapnyja pahadnieńni. «Ci my situacyju, hruba kažučy, ciapier razrulili, ci nie razrulili. Usio, idziem dalej». Tak što Tramp i jaho atačeńnie, jakoje jaho pierajmaje, jany chutka hublajuć cikaŭnaść. U ich niama stratehii. I heta, biezumoŭna, vielmi sumnaja historyja».
U toj ža čas, na pohlad Frydmana, vybar pravilnaj doŭhaterminovaj stratehii moh by dapamahčy źmianić situacyju ŭ Biełarusi, bo Łukašenka sam nie suprać.
«Što tyčycca niepasredna Łukašenki, to tut sapraŭdy jość, nad čym pracavać. Ja miarkuju, što Łukašenka ŭ samym kancy svajho kiravańnia (u lubym vypadku doŭha jamu nie zastałosia) byŭ by nie suprać ździejśnić aficyjny vizit u Złučanyja Štaty. Ja dumaju, jamu b heta vielmi spadabałasia, kab jaho tam pryniali», —
ličyć Frydman i nahadvaje prykład z historyi HDR, faktyčny kiraŭnik jakoj, hienieralny sakratar Sacyjalistyčnaj adzinaj partyi Hiermanii Erych Choniekier «pajšoŭ na šmat jakija kroki ŭ bok amierykancaŭ, kab jany jaho ŭsio ž taki zaprasili i ź im pahavaryli», choć i biez asablivaha pośpiechu.
Jak ličyć Frydman, pryciahnuć uvahu administracyi Trampa mohuć nietryvijalnyja kroki:
«Z hetaj administracyjaj davodzicca pracavać nie tolki zvyčajnymi dypłamatyčnymi mietadami. Kali b kamu-niebudź ź biełaruskich błohieraŭ, naprykład, atrymałasia dahrukacca da Iłana Maska i tudy dać infarmacyju, hety pohlad ab tym, što adbyvajecca ŭ Biełarusi, voś heta kankretny prykład, kali možna było b, chiba, niešta zrabić bolšaje niedypłamatyčnymi mietadami».
Kamientary
Dumaju bolšaści biełarusaŭ taksama spadabałasia b, kab jaho tam pryniali, a potym u kajdanach na łancuhu transpartavali ŭ Haahu.