Sumiesnyja z Rasijaj vučeńni «Zachad-2025» projduć u siaredzinie vieraśnia. Siarod ich aficyjnych met — adpracoŭka abarončych i nastupalnych dziejańniaŭ. Uładzimir Zialenski zajaŭlaŭ, što tak Rasija pasprabuje ŭciahnuć u vajnu Biełaruś i budzie pahražać krainam Bałtyi. «Naša Niva» pacikaviłasia ŭ polskaha analityka Kamila Kłysinskaha, ci sapraŭdy, na jaho dumku, hetyja vučeńni mohuć stać etapam padrychtoŭki ahresii Rasii suprać krain Bałtyi, jak u vypadku z vučeńniami 2021 hoda, jakija papiaredničali napadu na Ukrainu.
Pakul niama nijakich pieradumoŭ taho, što na krainy Bałtyi moža rychtavacca napad z boku Rasii i Biełarusi, kaža analityk.
«Hetyja vučeńni metanakiravana vykarystoŭvajucca, kab pałochać ludziej, — tłumačyć Kamil Kłysinski. — Ja b pakul prytrymlivaŭsia ličbaŭ, jakija ahučvaje Minabarony Biełarusi. Nie toje, što ja daviaraju biełaruskim uładam, jany nie zasłuhoŭvajuć hetaha. Ale ŭ hetym vypadku ahulnaja acenka i kantekst padkazvaje, što heta moža być praŭdaj: kala 13 tysiač sałdat z abiedźviuch krain voźmuć udzieł u hetych vučeńniach».
Analityk kaža, što Rasija i Biełaruś chočuć pravieści vučeńni, kab pakazać, što jany razam: sajuz mocny i pracuje. Asnoŭnaj prykmietaj mahčymaha napadu na krainy Bałtyi moža być napružanaść na miažy.
«Kali budzie raści chvala nielehalnych mihrantaŭ, nazapašvacca vialikija vajennyja siły la ŭschodniaj miažy Biełarusi, a potym hetyja vojski buduć pierakidvacca — heta budzie samy žorstki sihnał.
Naohuł ja sumniavajusia, što biez spynieńnia vajennych dziejańniaŭ va Ukrainie ŭ Rasii jość takija dadatkovyja siły, kab vialikaje vojska pierakinuć u Biełaruś, rychtavać dadatkovyja asobnyja napady na krainy Bałtyi.
Ale, viadoma, u niejkaj stupieni ŭsie hetyja čutki metanakiravana raspaŭsiudžvajucca Minskam i Maskvoj. Bo heta nie sakret, što jany ŭžo doŭha viaduć kahnityŭnuju vajnu, zajmajucca dezynfarmacyjaj. I heta ŭžo ŭ dobrych ci niadobrych tradycyjach nie tolki sučasnaj Biełarusi, ale i Savieckaha Sajuza.
I Litva, i Łatvija, i Estonija zastajucca ŭ NATA. Jany abaronienyja, Pucin heta razumieje. Jamu heta nie treba, jamu patrebny pośpiech va Ukrainie», — padsumoŭvaje Kłysinski.
Vučeńni «Zachad-2021», u jakich udzielničała bolš za 200 tysiač vajskoŭcaŭ, stali adnym z etapaŭ padrychtoŭki ahresii Rasii suprać Ukrainy. Paśla vučeńniaŭ rasijskija vajskoŭcy nie pakinuli Biełaruś, a ŭ lutym 2022-ha ŭvajšli va Ukrainu.
Ciapier čytajuć
Spoviedź Stryžaka: Ja maju prablemu z seksualnaj zaležnaściu23
Kamientary
Nie zria objavił o vyvodie vojsk SŠA iz stran Bałtii, načał hołosovať v OON vmiestie s RF i Iranom, objavił o tom, čto biezopasnosť Jevropy - dieło tolko Jevropy, tiem samym pokazał, čto nie budiet vypołniať 5 staťju NATO.