EPAM apublikavaŭ finansavy spravazdačny dakumient za 2024 hod dla Kamisii pa kaštoŭnych papierach i biržach ZŠA. Kampanija zajaŭlaje, što praciahnie pracavać u Biełarusi, majučy dla hetaha nieabchodnyja finansavyja resursy i infrastrukturu. U toj ža čas EPAM nie vyklučaje paharšeńnia biznes-umoŭ u krainie, piša Devby.io.
U spravazdačy adznačajecca, što kampanija zabiaśpiečvaje bieśpierapynnaść biznesu ŭ roznych rehijonach:
«EPAM kantraluje i ŭmacoŭvaje biaśpieku supracoŭnikaŭ i infrastruktury, uklučajučy kamunikacyi, materyjalnyja aktyvy, enierhazabieśpiačeńnie i dastupnaść internetu. Na siońniašni dzień my nie sutykalisia z surjoznymi pierabojami ŭ pracy».
EPAM praciahvaje najm novych supracoŭnikaŭ u roznych rehijonach. Kampanija zajaŭlaje, što centry raspracoŭki majuć dastatkovyja resursy dla padtrymańnia dziejnaści. Siarod bujnych centraŭ raspracoŭki zastajucca ofisy ŭ Polščy, Mieksicy i Biełarusi.
Na kaniec 2024 hoda ŭ biełaruskim ofisie EPAM pracavała 3 350 śpiecyjalistaŭ — na 150 čałaviek mienš, čym u kancy 2023 hoda.
Biełaruski ofis ciapier sastupaje pa kolkaści kamand nie tolki Indyi, Ukrainie i Polščy, ale i Mieksicy, dzie pracuje 3 525 śpiecyjalistaŭ.
Skaračeńnie kamand za minuły hod adbyłosia nie tolki ŭ Biełarusi, ale i ŭ susiednich krainach: Ukraina — kolkaść supracoŭnikaŭ źmienšyłasia z 9,1 tys. da 8,8 tys. Polšča — z 5,4 tys. da 5 tys.
Ryzyki pracy EPAM u Biełarusi
EPAM zajaŭlaje, što praciahnie pracavać va Ukrainie, Biełarusi i krainach Uschodniaj Jeŭropy i Centralnaj Azii. Miž tym u kampanii zajaŭlajuć pra ryzyki dla biznesu z-za rehijanalnaj niestabilnaści. Najpierš havorka idzie pra vajnu va Ukrainie.
U EPAM padkreślili, što lubaja eskałacyja kanfliktu «moža pastavić pad pahrozu piersanał i apieracyi ŭ Biełarusi».
Taksama pad pahrozaj akažucca pierśpiektyvy raźvićcia biznesu ŭ vypadku praciahłaha praciahu bajavych dziejańniaŭ va Ukrainie ci abvastreńnia situacyi. Akramia taho, kampanija nie vyklučaje dalejšaha pieraraźmierkavańnia kamandy.
Taksama niehatyŭna na biznesie moža adbicca jakaja praciahvajecca sankcyjnaja palityka Zachadu. U svajoj spravazdačy kampanija pryviała prykłady ŭpłyvu sankcyj na biznes.
«Asobnyja krainy, u jakich my pracujem, nakłali sankcyi na niekatoryja banki ŭ krainach, jakija raźvivajucca, pasłuhami jakich my karystajemsia. Heta pryviało da zatrymki ŭnutrykarparatyŭnych płaciažoŭ i płaciažoŭ pastaŭščykam, a taksama moža pryvieści da zatrymki abo niemahčymaści atrymańnia srodkaŭ ad klijentaŭ», — zajaŭlaje kampanija.
Niekatoryja krainy, u jakich pracuje EPAM i niekatoryja banki, pasłuhami jakich karystajecca kampanija, uviali abmiežavańni na pieramiaščeńnie hrašovych srodkaŭ i abmien zamiežnaj valuty ŭnutry bankaŭskich sistem. U kampanii śćviardžajuć: heta abmiažoŭvaje mahčymaści pa raźmierkavańni hrašovych srodkaŭ pa ŭsim śviecie i pavyšaje valutnyja ryzyki.
U EPAM kažuć i pra ryzyki dla biznesu z boku ŭładaŭ praź dziejnaje zakanadaŭstva.
U pryvatnaści, u Biełarusi i Ukrainie sudy mohuć vynieści rašeńnie ab likvidacyi jurydyčnaj asoby «na padstavie jaho farmalnaj nieadpaviednaści vyznačanym patrabavańniam pry stvareńni, rearhanizacyi abo ŭ pracesie dziejnaści»
Akramia taho, u Biełarusi dziaržava moža aryštavać majomaść i aktyvy abo ŭziać na siabie funkcyju kiravańnia kamiercyjnymi arhanizacyjami, jakija naležać zamiežnym dziaržavam. Heta mahčyma ŭ tym vypadku, kali hetyja «zamiežnyja dziaržavy abo ich afilavanyja kampanii, ździajśniali dziejańni, jakija ličacca niedružalubnymi ŭ adnosinach da Biełarusi».
Hrošy ŭ bankach Biełarusi i aktyvy
Na praciahu minułaha hoda EPAM praciahvaŭ karektavać sumu na rachunkach u bankach Biełarusi z ulikam patrebaŭ biełaruskaha ofisa. Taksama kampanija raźmiarkoŭvała zališnija srodki na rynki z bolš raźvitym bankaŭskim siektaram.
U vyniku za minuły hod kampanija skaraciła abjom hrošaj na rachunkach u biełaruskich bankach. Na kaniec hoda na rachunkach kampanii było 37,5 miljonaŭ dalaraŭ u ekvivalencie. Dla paraŭnańnia, na kaniec minułaha hoda na rachunkach było 38,3 miljona dalaraŭ.
Miž tym za apošni kvartał minułaha hoda suma srodkaŭ u bankach, naadvarot, vyrasła na 8,2 miljona dalaraŭ.
Što tyčycca aktyvaŭ EPAM u Biełarusi, to jany praciahvajuć skaračacca. Na kaniec 2024 hoda jany aceńvalisia ŭ 45,9 miljona dalaraŭ. Za minuły hod košt aktyvaŭ źniziŭsia na 4 miljony dalaraŭ abo amal na 10%.
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać15
Kamientary