Daradca Trampa pa nacbiaśpiecy vypadkova dadaŭ žurnalista ŭ sakretny čat u Signal. Raskrytyja miechanizmy pryniaćcia rašeńniaŭ
U hetym kanfidencyjnym čacie abmiarkoŭvalisia budučyja ŭdary pa chusitach u Jemienie. Žurnalist dumaŭ, što niechta jaho padmanvaje, pakul ataka sapraŭdy nie adbyłasia.
Hałoŭny redaktar The Atlantic Džefry Hołdbierh padrabiazna apisaŭ, što ź im adbyłosia.
11 sakavika jon atrymaŭ zapyt na dyjałoh ad karystalnika Majkła Uołca — tak zavuć daradcu Trampa pa nacyjanalnaj biaśpiecy.
«Ja nie dumaŭ, što zapyt zychodziŭ ad sapraŭdnaha Majkła Uołtca», — kaža Hołdbierh.
Jon pryniaŭ zapyt i praz dva dni byŭ dałučany da čatu «Nievialikaja hrupa chusitaŭ» (u aryhinale: Houthi PC small group, dzie PC — principals committee. Tak u ZŠA nazyvajuć top-čynoŭnikaŭ pa pytańniach nacyjanalnaj biaśpieki).
Adrazu ž jon ubačyŭ pryvitalnaje paviedamleńnie ad Uołca da ŭsich udzielnikaŭ hrupy: što čat stvorany dla kaardynacyi dziejańniaŭ u dačynieńni da chusitaŭ na praciahu nastupnych 72 hadzin.
«Mianie nikoli nie zaprašali na pasiadžeńni kamiteta kiraŭnikoŭ Biełaha doma i za mnohija hady majoj pracy reparcioram pa pytańniach nacyjanalnaj biaśpieki ja nikoli nie čuŭ, kab jany pravodzilisia z dapamohaj kamiercyjnaha mabilnaha dadatku dla abmienu paviedamleńniami», — piša žurnalist.
Usiaho ŭ čacie było 18 čałaviek, u tym liku supracoŭniki Rady nacyjanalnaj biaśpieki, vice-prezident Džej Dzi Vens, kiraŭnik Pientahona Pit Chehset, dziaržsakratar Marka Rubia, kiraŭnik nacyjanalnaj vyviedki Tułsi Habard, dyrektar CRU Džon Retklif, śpiecpasłańnik Trampa Styŭ Uitkaf i inšyja.
Hołdbierh abmierkavaŭ situacyju z čatam u redakcyi The Atlantic. Žurnalisty vyrašyli, što heta moža być imitacyja — častka kampanii pa dezynfarmacyi.
«U mianie byli vielmi mocnyja sumnievy ŭ tym, što hetaja tekstavaja hrupa była realnaj, tamu što ja nie moh pavieryć, što kiraŭnictva nacyjanalnaj biaśpieki Złučanych Štataŭ paviedamić pa Signal ab płanach nieminučaj vajny.
Ja taksama nie moh pavieryć, što daradca prezidenta pa nacyjanalnaj biaśpiecy akažacca nastolki nierazumnym, kab dałučać hałoŭnaha redaktara The Atlantic u padobnyja dyskusii z vysokapastaŭlenymi aficyjnymi asobami ZŠA, až da vice-prezidenta», — ździŭlajecca Hołdbierh.
15 sakavika ŭ čacie ŭźniałasia taja tema, zaŭčasnaje vykryćcio jakoj, jak piša žurnalist, sapraŭdy mahła b naškodzić amierykanskaj armii i raźviedcy.
U toj ža dzień žurnalist ubačyŭ u čacie paviedamleńnie, što ataka na chusitaŭ pačniecca praź dźvie hadziny — i čakaŭ hety čas u mašynie na stajancy pierad supiermarkietam. Vybuchi ŭ Jemienie sapraŭdy adbylisia.
«Ja zrazumieŭ, što heta hrupa Signal, napeŭna, sapraŭdy realnaja. Pryjšoŭšy da takoj vysnovy, jakaja ŭsiaho niekalki hadzin tamu zdavałasia amal niemahčymaj, ja vyjšaŭ z hrupy Signal, razumiejučy, što heta pryviadzie da aŭtamatyčnaha paviedamleńnia da stvaralnika hrupy, «Majkła Uołca», pra toje, što ja pakinuŭ jaje.
Nichto ŭ čacie, zdavałasia, nie zaŭvažyŭ majoj prysutnaści. I ja nie atrymaŭ nijakich nastupnych pytańniaŭ ab tym, čamu ja pajšoŭ, ci, što bolš važna, chto ja taki».
Apytanyja The Atlantic jurysty ličać, što dziejańni Uołca mohuć składać parušeńnie zakanadaŭstva ZŠA, jakoje rehuluje adnosiny ź infarmacyjaj pa nacyjanalnaj abaronie. Možna mierkavać, što ZŠA čakaje vialiki skandał.
Ciapier čytajuć
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać11
Kamientary