Muž Siamaški byŭ nie adzinym, chto atrymaŭ pašpart prykryćcia 13 lutaha 2018 hoda
U toj ža dzień dakumient vydali Alaksandru Vasileŭskamu, jaki słužyć u dziaviatym upraŭleńni HRU — «samym zakrytym padraździaleńni Biełarusi».
Paśla vychadu rasśledavańnia «Našaj Nivy» pra Harbačova-Makaviejeva Volha Siamaška ŭ «aficyjnaj zajavie ad siamji» adchiliła ŭsie vystaŭlenyja abvinavačańni.
U svaim publičnym dopisie ŭ fejsbuku žurnalistka zajaviła, što infarmacyja pra pracu na śpiecsłužby jaje muža — heta pomsta joj. Siamaška ličyć, što hetym rasśledavańniem joj adpomścili za pracu nad žurnalisckim etyčnym kodeksam, a taksama «heta pomsta adnaho detektyŭnaha ahienctva za maju prafiesijnuju dziejnaść».
«Datyčna samoha dakumienta: ni pra jakija pašparty prykryćcia nam ničoha nie viadoma. Nie supracoŭničali, nie sastajali, nie źlivali. … Dokazaŭ niama, adnyja domysły i insinuacyi, reputacyja maja ŭstojlivaja da roznych nakidaŭ», — padsumavała Volha Siamaška.
Tym časam, jak stała viadoma «Našaj Nivie», u pryvatnych razmovach ź siabrami, kalehami jana ŭsio ž pryznavała isnavańnie druhoha pašparta. Ale sfarmulavała novuju lehiendu: što pašpart moh aformić niejki svajak, jaki pracavaŭ u MUS, kab atrymać pa im kredyt. Pry hetym toj svajak, śćviardžała jana, pamior u 2019 hodzie.
«Naša Niva» zapytała ŭ Siamaški imia i proźvišča taho svajaka. «Biez kamientaroŭ», — adkazała jana.
Miž tym nam, dziakujučy padkazcy adnaho z našych čytačoŭ-aficeraŭ, udałosia vyjści na cikavy śled u praciah našaha materyjału.
Hruntujučysia na ŭłasnym vopycie, a taksama razumieńni sistemy, aficer u adstaŭcy vykazaŭ mierkavańnie, što ŭ Biełarusi redka vydajucca pašparty prykryćcia dla ahientaŭ-adzinočak. Maŭlaŭ, adzin čałaviek mała što moža, i zvyčajna dakumienty prykryćcia dajuć adrazu niekalkim členam kankretnaj apieratyŭnaj hrupy abo vajskoŭcam kankretnaha padraździaleńnia, jakija pracujuć nad peŭnaj zadačaj.
Jašče raz prahavorym: pašparty prykryćcia nie vydajucca prosta tak, u zapas. Jany patrebnyja dla niejkaj zadačy, a paśla jaje vyrašeńnia pašparty adbirajuć u ahientaŭ, dałučajuć da materyjałaŭ spravy i zdajuć razam ź joj u archiŭ.
«Naša Niva» paprasiła «Biełpoł» paviedamić nam kankretnuju datu vydačy pašparta prykryćcia Fiodara Harbačova. Dakumient byŭ vydadzieny 13 lutaha 2018 hoda.
Paśla hetaha my paprasili znajści ŭsich biełarusaŭ, jakija atrymali pašpart u toj samy dzień, vybrać siarod ich paŭnaletnich i potym pravieryć ich praz paraŭnańnie tvaraŭ na pradmiet taho, ci nie źjaŭlajecca vydadzieny im 13 lutaha 2018 hoda dakumient pašpartam prykryćcia.
Adrazu padkreślim, što heta doŭhaja ručnaja rabota, jakaja nie moža być zroblena chutka. I jana praciahvajecca. Ale jość užo pieršaja ž pierakanaŭčaja znachodka.
«Biełpoł» znajšoŭ jak minimum adnaho čałavieka, jaki atrymaŭ pašpart prykryćcia adnačasova z «Viktaram Makaviejevym».
Sapraŭdnaje imia hetaha čałavieka — Alaksandr Uładzimiravič Vasileŭski, jon naradziŭsia 25 sakavika 1984 hoda. Pašpart prykryćcia jamu vydali na imia Alaksandra Uładzimiraviča Kraŭčyka, jaki nibyta taksama naradziŭsia 25 sakavika 1984.
Što viadoma pra Alaksandra Vasileŭskaha? Prajekt Digital Intelligence Team znajšoŭ infarmacyju pra hetaha čałavieka. Pačynajučy z 2006 hoda, jon słužyŭ jak minimum u troch vajskovych čaściach — 97030, 02102 i 11709.
Apošniaje miesca pracy — v/č 11709 (da 2016 hoda mieła nazvu v/č 51886). Pra hetu čaść padrabiazna raskazvali ŭ rasśledavańni tady jašče adzinaha «Bajpoła» ŭ 2021 hodzie. «Heta samaje zakrytaje padraździaleńnie — dziaviataje ŭpraŭleńnie HRU, na bazie jakoha ŭ 2014 hodzie było stvorana dyviersijnaje śpiecpadraździaleńnie dla pracy za miažoj», — tłumačyŭ Aleh Talerčyk.
Pa jaho słovach, kožny supracoŭnik dziaviataha ŭpraŭleńnia HRU prachodzić navučańnie na vajskova-dypłamatyčnym fakultecie Vajskovaj akademii albo ŭ Instytucie nacyjanalnaj biaśpieki KDB Biełarusi. Padčas navučańnia studenty ŭ daskanałaści avałodvajuć dźviuma zamiežnymi movami — anhlijskaj, a taksama movaj adnoj z zachodnich krain-susiedak.
Nahadajem, što ŭ Fiodara Harbačova adniekul jość vydatnaje vałodańnie łatyšskaj movaj. A ciapier, pa słovach kaleh pa «Varhiejminhu», jon vyvučyŭ jašče i litoŭskuju movu.
Siamaška nie bačyć ničoha dziŭnaha ŭ tym, što jaje muž vałodaje łatyšskaj movaj: «Heta naša chobi, — patłumačyła jana ŭ fejsbuku. — U nas navat raskład jość: chto jakuju movu vyvučaje».
Čytajcie: Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka
Jak vykarystoŭvaŭ svoj pašpart prykryćcia Vasileŭski? Nieviadoma.
Pra jaho ŭvohule mała infarmacyi ŭ dastupnych bazach. Jość tolki fakt, što praz try miesiacy paśla atrymańnia pašpartu prykryćcia Vasileŭski na 10 sutak vyjazdžaŭ va Ukrainu pa svaim asnoŭnym dakumiencie. Bolš zafiksavanych u bazach pajezdak za miažu, prynamsi pa asnoŭnym pašparcie, u jaho nie było.
Pašpart prykryćcia ŭ Vasileŭskaha-Kraŭčyka taki ž čysty, jak u Harbačova-Makaviejeva. Na jaho nie aformlenaja majomaść ci jurydyčnyja asoby, nie zarehistravany numary telefonaŭ ci transpart, jon nie ŭładkoŭvaŭsia pa im na rabotu ŭ Biełarusi.
Vasileŭski, jaki atrymlivaŭ pašpart prykryćcia razam z Harbačovym, kadravy aficer HRU. Heta moža značyć, što i mužu žurnalistki Siamaški dakumient vydavała toje samaje viedamstva.
Kali «Našaj Nivie» stanie viadoma, jakija jašče ludzi atrymlivali pašparty prykryćcia ŭ adzin dzień ź imi, my paviedamim pra heta.
Kali vy majecie padkazki dla nas pa hetaj ci inšych temach, pišycie redaktaru ŭ telehram @nn_editor abo na mejł [email protected]. Abo tym z redaktaraŭ i žurnalistaŭ «NN», jakich viedajecie asabista.
Kali vy cenicie tuju pracu, jakuju robić «Naša Niva», dapamažycie nam, pieraličyŭšy hrošy praz Patreon abo pieradaŭšy Redakcyi ich lubym inšym zručnym dla vas sposabam. Dziakujučy hetamu my zmožam bolš.
«Naša Niva» — bastyjon biełaruščyny
PADTRYMAĆ
Kamientary