«Zavod pa pierapracoŭcy hleju». U spravie budaŭnictva kanalizacyjnaha pryjomnika pad Žodzinam novy pavarot
Dniami stała viadoma, što niedaloka ad Žodzina pačali budaŭnictva sažałki-nazapašvalnika dla kanalizacyjnych adkidaŭ ź Minska, što vyklikała abureńnie ŭ miascovych žycharoŭ. Ułady sprabujuć pieraškodzić ludziam arhanizavacca, i ŭ hetaj spravie źjaviŭsia novy niečakany pavarot, piša Ex-press.live.
U Žodzinie i susiednich nasielenych punktach stali źbirać podpisy suprać budaŭnictva. Ludzi abjadnalisia ŭ telehram-čacie, dzialilisia infarmacyjaj, šukali adnadumcaŭ sajuźnikaŭ. Ale nieŭzabavie pačalisia dzivosy.
Pa słovach čytačoŭ Ex-press.by, telehram-čat raptoŭna źnik. Jaho pieraŭtvaryli ŭ kanał i zabaranili pisać u im paviedamleńni, a ŭsia raniej apublikavanaja infarmacyja i spasyłki byli vydalenyja.
Adzin z udzielnikaŭ paviedamiŭ: «Čat pieratvorany ŭ supierhrupu, a ciapier jon uvohule staŭ kanałam. Tam bolš nielha pisać, tolki čytać».
U kanale źjaviŭsia zapis, u jakim tłumačyłasia, što «maŭčańnie supolnaści nakiravanaje na stabilizacyju napružańnia», a zbor podpisaŭ nibyta praciahvajecca, ale ciapier usio vyrašajecca «praz vybudoŭvańnie dyjałohu z vyšejstajačymi instancyjami». Ale ludziam paabiacali, što jany jašče zmohuć vykazacca.
A paśla kanał raptam źmianiŭ nazvu. Ciapier jon nazyvajecca: «Zavod pa pierapracoŭcy hleju vyratuje našu krainu ad hetych budoŭlaŭ! Na biblijateku my sabrali i na zavod zmožam taksama!»
Udzielniki čata źbiantežanyja: ci nie stanie heta novym sposabam zamieny hramadskaj aktyŭnaści na łajalnuju inicyjatyvu ŭ padtrymku sumniŭnaha prajekta?
Staršynia miascovaha savieta deputataŭ Maryna Klujeva paabiacała, što miascovyja ŭłady źbiaruć schod, zaprosiać aficyjnych asob, u kampietencyi jakich budaŭnictva hetaha abjekta. Tam miascovyja žychary nibyta zmohuć zadać usie pytańni i atrymać adkazy.
U žodzinskaj milicyi paviedamili, što, zabirajučy ŭ ludziej padpisnyja listy, nibyta dziejničali pavodle zakonu. Błanki z podpisami, akazvajecca, kanfiskavanyja dla pravierki.
«Pravierki zakonnaści tych asob, jakija źbirali podpisy, — adkazali ŭ dziažurnaj častcy «zaniepakojenamu miascovamu žycharu». — Paśla praviadzieńnia pravierki, kali ŭsio budzie zakonna — ich viernuć».
Raniej stała viadoma, što ŭ Smalavickim rajonie, niepadalok ad Žodzina, paskoranymi tempami viadziecca budaŭnictva sažałki-nazapašvalnika №19. Heta abjekt, kudy płanujecca štodnia vyvozić adkidy ź minskich ačyščalnych kanalizacyjnych zbudavańniaŭ. Heta techničny abjekt, ad jakoha, pa słovach miascovych žycharoŭ, budzie nievynosna śmiardzieć.
Haradžanie stvaryli telehram-čat i pačali źbirać podpisy suprać budaŭnictva. Ludzi prychodzili ŭ kramy, stavili podpisy, abmiarkoŭvali, jak jašče možna paŭpłyvać.
Ale jak tolki pajšoŭ zbor podpisaŭ, u praces umiašalisia siłaviki.
Pajšli zahady źvierchu pa kramach: spynić zbor podpisaŭ. Na Stadziedaŭski rynak u Žodzinie pryjechała milicyja i kanfiskavała ŭsie błanki. Telehram-čat, dzie viałosia abmierkavańnie i da jakoha paśpieli dałučycca bolš čym 1500 čałaviek, byŭ zakryty, a paviedamleńni ŭ im — vydalenyja.
Abjekt z nazvaj «Sažałka-19» raniej chacieli pabudavać u Puchavičach i ŭ Maładziečnie. Tam miascovyja žychary ŭrešcie zmahli adstajać svajo prava dychać čystym pavietram.
Ciapier čytajuć
«Adny vierać, što viernucca, inšyja — nie». Jak pracuje biełaruskaja škoła ŭ Polščy1
Kamientary