Asudžany na śmierć u Biełarusi Ryka Kryhier: Tak, ja pieramiaściŭ toj zaplečnik, ale nie viedaŭ, što tam vybuchoŭka
Suprać Ryka Kryhiera ŭ Hiermanii viadziecca rasśledavańnie. Jon viarnuŭsia da pracy sanitaram.
Niamieckamu vydańniu Welt am Sonntag udałosia pahavaryć z hramadzianinam Hiermanii Rykam Kryhieram, jakoha letam 2024 hoda prysudzili da śmiarotnaha pakarańnia ŭ Biełarusi i vyzvalili ŭ miežach mižnarodnaha abmienu.
Pavodle źviestak žurnalistaŭ, hienieralnaja prakuratura Hiermanii praciahvaje vieści rasśledavańnie suprać Kryhiera pa fakcie padryvu vybuchovaha prystasavańnia, piša DW Belarus.
Pry hetym u ofisie hienieralnaha prakurora hetuju spravu aficyjna nie kamientujuć. Sam Kryhier admaŭlaje abvinavačvańni suprać siabie. Pavodle redakcyi Welt am Sonntag, jašče padčas abmienu ŭ Ryka Kryhiera byli kanfiskavanyja mabilny telefon i jahonyja piśmovyja zapisy dla acenki źmieściva. Da hetaha času jany nie viernutyja ŭładalniku.
Ryk Kryhier raspavioŭ žurnalistam, što viarnuŭsia da pracy sanitaram na poŭdni Hiermanii:
«Šmatlikim pracadaŭcam było zanadta ryzykoŭna najmać mianie. Na sumoŭjach ja nie chavaŭ, chto ja taki».
Pavodle jahonych słoŭ, maralna jon pa-raniejšamu adčuvaje siabie drenna. «Pračynacca kožny dzień, viedajučy, što hety praces budzie praciahvacca, — heta ciśnie na mianie».
Śledstva padazraje jaho ŭ tym, što ŭ 2023 hodzie jon padaŭ zajaŭku na słužbu ŭ połk Kalinoŭskaha va Ukrainie, adnak, jak śćviardžajecca, na jahony zvarot adkazała SBU. U Biełarusi jon, nibyta, sapraŭdy fatahrafavaŭ vajskovyja abjekty, a taksama pieramiaściŭ zaplečnik, u jakim, jak vyjaviłasia, była vybuchoŭka.
Sam Ryk Kryhier, piša Welt am Sonntag, paćvierdziŭ hetyja fakty, adnak śćviardžaje, što nie viedaŭ pra źmieściva zaplečnika.
Pra spravu suprać Ryka Kryhiera, jakoha prysudzili ŭ Biełarusi da śmiarotnaha pakarańnia, stała viadoma ŭ lipieni 2024 hoda. U žniŭni taho ž hoda jon vyjšaŭ na volu ŭ miežach abmienu źniavolenymi pamiž krainami Zachadu i Rasijaj.
Ciapier čytajuć
Łukašenka apraŭdvajecca za ideju z pryjezdam 150 tysiač pakistancaŭ — heta, kab «zachavać naš narod»27
Kamientary