Braty Mieniendesy, abvinavačanyja ŭ zabojstvie baćkoŭ, atrymali šaniec na daterminovaje vyzvaleńnie
Sprava znoŭ akazałasia ŭ centry ŭvahi paśla vychadu novaha sieryjała Netflix «Monstry: Historyja Łajła i Eryka Mieniendesaŭ», a taksama dakumientalnaha filma «Braty Mieniendesy».
Sud u Łos-Andželesie skaraciŭ termin źniavoleńnia Eryku i Łajłu Mieniendesam, jakija adbyvajuć pažyćciovaje pakarańnie za zabojstva svaich baćkoŭ u 1989 hodzie ŭ asabniaku ŭ Bievierli-Chiłz, što daje im prava na ŭmoŭna-daterminovaje vyzvaleńnie. Jany znachodziacca za kratami z 1990 hoda, piša Bi-bi-si.
Sudździa Majkł Džesik pierahledzieŭ prysud bratam i pryznačyŭ im 50 hadoŭ pazbaŭleńnia voli. Ciapier ich spravu razhledzić kamisija štata pa ŭmoŭna-daterminovym vyzvaleńni ŭ červieni.
Akruhovy prakuror rašuča vystupaŭ suprać źmiakčeńnia prysudu, zajaŭlajučy, što braty nie reabilitavalisia. Mieniendesy śćviardžali, što zabili svaich baćkoŭ, Chase i Mery Łuiz «Kici» Mieniendes, dziela samaabarony paśla šmathadovaha seksualnaha hvałtu.
Pra spravu bratoŭ Mieniendesaŭ napisana šmat knih i źniata dakumientalnych filmaŭ, i amierykancy pa-raniejšamu staviacca da ich nieadnaznačna. Paśla pierahladu prysudu ŭ aŭtorak braty vystupili ŭ sudzie z emacyjnymi zajavami.
Jany raskazali pra žorstkija padrabiaznaści zabojstvaŭ i pra svajo rašeńnie pierazaradzić ružžy i praciahvać stralać u svaich baćkoŭ u haścinaj svajho doma. Na momant ździajśnieńnia złačynstva bratam było 18 i 21 hod.
«Mnie daviałosia pierastać być ehaistyčnym i niedaśviedčanym, kab sapraŭdy zrazumieć, što pieražyli maje baćki ŭ apošnija chviliny svajho žyćcia», — skazaŭ 54-hadovy Eryk Mieniendes u sudzie.
Jon apisaŭ «šok, zamiašańnie i pačućcio zdrady», jakija, musić, adčuvali baćki, ubačyŭšy svaich synoŭ z ružžami i adkryŭšych ahoń.
Hołas 57-hadovaha Łajła Mieniendesa dryžaŭ, kali jon havaryŭ pra nastupstvy svaich «niepaznavalnych» učynkaŭ dla svajakoŭ.
«Ja zmaniŭ vam i vystaviŭ vas na ŭsieahulnaje paśmiešyšča», — skazaŭ jon svajoj siamji.
Abodva paprasili prabačeńnia za svaje ŭčynki i raskazali pra svaje nadziei pracavać z achviarami seksualnaha hvałtu i dapamahać źniavolenym, kali im budzie dazvolena vyjści na volu. Akruhovy prakuror Łos-Andželesa Natan Chochman nazvaŭ rašeńnie ab pierahladzie prysudu «manumientalnym» i «takim, što maje surjoznyja nastupstvy dla siemjaŭ».
Vialikaja častka słuchańniaŭ była pryśviečana tamu, čym braty zajmalisia ŭ turmie na praciahu apošnich 30 hadoŭ.
Členy siamji i tyja, chto pracavaŭ ź imi ŭ turmie, padrabiazna raskazali pra adukacyjnyja kursy, jakija jany prajšli, i prahramy, jakija jany stvaryli dla palapšeńnia žyćcia źniavolenych, u tym liku pra chośpis dla pažyłych i chvorych.
Sudździa Džesik nazvaŭ pracu bratoŭ u turmie «vydatnaj», ale adznačyŭ, što vyniesienyja im u 1996 hodzie prysudy da pažyćciovaha źniavoleńnia biez prava na daterminovaje vyzvaleńnie na toj momant byli apraŭdanymi.
«Siońnia vialiki dzień», — skazaŭ žurnalistam kala budynka suda advakat Mark Hierahas.
Stryječnaja siastra bratoŭ Anamaryja Baralt, jakaja raniej u toj ža dzień davała pakazańni ŭ sudzie, skazała, što ich siamja ŭ zachapleńni.
«Heta składany praces», — skazała jana pra słuchańnie pa pytańni ŭmoŭna-daterminovaha vyzvaleńnia, jakoje čakaje bratoŭ, ale adznačyła, što jany «ź nieciarpieńniem projduć praz hetyja dźviery, kali heta aznačaje, što my zmožam viarnuć ich dadomu».
Sudździa taksama zasłuchaŭ pakazańni adstaŭnoha sudździ z Fłarydy, jaki zajaviŭ, što nikoli raniej nie vystupaŭ na baku nivodnaha abvinavačanaha ŭ kryminalnaj spravie, i repiera Anere Braŭna, jaki adbyvaŭ termin razam z abodvuma bratami i ličyć, što jany dapamahli jamu vyjści na volu.
Akruhovaja prakuratura vystupaje suprać vyzvaleńnia bratoŭ. Abvinavaŭcy ličać, što jany zmanili pravaachoŭnym orhanam adrazu paśla złačynstva, zmanili členam siamji i dali iłžyvyja pakazańni ŭ sudzie.
Prakurory zajaŭlajuć, što braty praciahvajuć «apraŭdvać» svajo pavodziny, zamiest taho kab całkam uziać na siabie adkaznaść za zabojstvy. «Niama sumnieńnia, što jany zrabili ŭsie hetyja dobryja ŭčynki ŭ turmie», — skazaŭ namieśnik akruhovaha prakurora Chabib Balijan u svajoj zaklučnaj pramovie.
Ale, dadaŭ jon, pry admienie adnahałosnaha vierdyktu prysiažnych u takoj žorstkaj spravie ab zabojstvie važna «pierakanacca, što jany sapraŭdy reabilitavalisia».
Sprava znoŭ akazałasia ŭ centry ŭvahi paśla vychadu novaha sieryjała Netflix «Monstry: Historyja Łajła i Eryka Mieniendesaŭ», a taksama dakumientalnaha filma «Braty Mieniendesy».
Pavodle viersii sieryjała, a taksama śledstva, braty zastralili baćkoŭ z dvuch strelbaŭ, kab chutčej zavałodać spadčynaj i zaadno atrymać bujnuju strachavuju vypłatu. Historyja dziaciej, jakija zabili svaich bahatych baćkoŭ, šakavała Amieryku.
Śledčyja ŭstanavili, što da taho, jak stać padazravanymi, braty patracili značnuju častku spadčyny na padarožžy, raskošnyja hadzińniki Rolex, aŭtamabili i prestyžnuju nieruchomaść.
Padčas pieršaha pracesu prysiažnyja nie zmahli pryjści da adzinaha mierkavańnia ab vinavataści padsudnych. Braty ŭžo tady zajaŭlali pra šmathadovyja seksualnyja damahańni i hvałt u siamji.
Pry paŭtornym razhladzie śćviardžeńni pra seksualny hvałt praktyčna nie ŭličvalisia, i ŭ 1996 hodzie bratoŭ pryznali vinavatymi i pryhavaryli da pažyćciovaha źniavoleńnia biez prava daterminovaha vyzvaleńnia. Filmy pryciahnuli ŭvahu hramadskaści i niekatorych znakamitaściaŭ, u tym liku Kim Kardašjan i Rozi O'Doneł, jakija zaklikali vyzvalić bratoŭ. «Jany zusim nie monstry, heta dobryja, intelihientnyja, sumlennyja ludzi», — napisała Kardašjan u artykule dla NBC News.
Były akruhovy prakuror Džordž Haskon zajaviŭ pra «maralny i etyčny abaviazak» razhledzieć pakazańni bratoŭ i padtrymaŭ ich prośbu ab pierahladzie prysudu, što dazvoliła pieradać spravu na razhlad sudździ.
Kamientary