Sieryjalnyja zabojcy: spravu bratoŭ Mienendes 35-hadovaj daŭniny razhledziać znoŭ z-za sieryjała Netflix

Sprava bratoŭ Mienendes, asudžanych da pažyćciovaha źniavoleńnia za zabojstva svaich baćkoŭ u Bievierli-Chiłz 35 hadoŭ tamu, budzie pierahledžana ŭ suviazi z novymi abstavinami. Hetyja abstaviny byli apisany ŭ sieryjale Netflix «Monstry: historyja bratoŭ Mienendes», jaki niadaŭna vyjšaŭ na ekrany, piša Bi-bi-si.

U čaćvier prakuror akruhi Łos-Andželes Džordž Haskon zajaviŭ pra «maralny i etyčny abaviazak» razhledzieć pakazańni bratoŭ, jakija jany dali ŭ minułym hodzie. Braty śćviardžajuć, što stali achviarami seksualnych damahańniaŭ z boku baćki i ich dziejańni byli samaabaronaj.

Cikavaść da zabojstva šmathadovaj daŭnaści adradziłasia paśla taho, jak u vieraśni hetaha hoda na Netflix vyjšła zachaplalnaja dzieviacisieryjnaja kryminalnaja drama.

Pa viersii sieryjała, dy i śledstva, braty zastrelili baćkoŭ, Chase i Mery Łuiz Mienendes, z dvuch drabavikoŭ, kab chutčej zavałodać spadčynaj i zaadno atrymać salidnuju sumu pa strachoŭcy. Historyja dziaciej, jakija biaźlitasna zabili svaich bahatych baćkoŭ, šakavała Amieryku.

Śledčyja ŭstanavili, što pierš, čym stać padazravanymi, braty vydatkavali značnuju častku spadčyny na padarožžy, raskošnyja hadzińniki Rolex, aŭtamabili i prestyžnuju nieruchomaść.

Amieryka daviedałasia padrabiaznaści hetaj spravy ź pieralikam usich nabytych pradmietaŭ raskošy z pramych tranślacyj z zały suda i była šakavanaja tym, jak dzieci ź vielmi ščaślivaj siamji stali biaźlitasnymi zabojcami.

Pieršy sudovy praces skončyŭsia tak zvanym «padviešanym žury», pakolki prysiažnyja nie zmahli pryjści da adzinaha mierkavańnia pra vinu padsudnych. Braty ŭžo tady zajavili ab seksualnych damahańniach i hvałcie ŭ siamji, što doŭžyłasia doŭhija hady.

U chodzie paŭtornaha razboru śćviardžeńni ab seksualnych damahańniach pad uvahu praktyčna nie prymalisia, i ŭ 1996 hodzie bratoŭ pryznali vinavatymi i prysudzili da pažyćciovaha źniavoleńnia biez prava daterminovaha vyzvaleńnia.

Pavialičyć

Na momant ździajśnieńnia złačynstva Łajłu Mienendesu byŭ 21 hod, a Eryku — 18.

Siarod novych śviedčańniaŭ, jakija sud maje namier razhledzieć, fihuruje list, napisany za hod da zabojstva Erykam Mienendesam jaho stryječnamu bratu, u jakim, jak śćviardžajecca, jon zhadvaŭ pra hvałt z boku baćki.

Zrešty, jak zajaviŭ na pres-kanfierencyi akruhovy prakuror Łos-Andželesa Haskon, pakul što nijakija z hetych śviedčańniaŭ nie atrymali paćvierdžańnia.

«Na hetym etapie my nie hatovyja skazać, vierym ci nie vierym my hetaj infarmacyi, — padkreśliŭ prakuror akruhi. — Ale my sabrali vas tut, kab zajavić, što ŭ nas majucca maralnyja i etyčnyja abaviazacielstvy razhledzieć toje, što nam było pradstaŭlena».

Haskon adznačyŭ, što jaho kamanda nie sprabuje śćviardžać, što ź pieršapačatkovym sudom było niešta nie tak.

Pavodle jaho słoŭ, pierahlad patencyjna moža pryvieści da źmieny prysudu ci navat novaha suda. Słuchańni pa hetaj spravie pryznačanyja na 24 listapada.

Haskon pryznaŭ, što paśla vychadu sieryjała «Monstry» na prakuraturu abrynuŭsia škvał zvankoŭ. Svajaki bratoŭ Mienendes zajavili, što Łajł i Eryk stali «achviarami hrateskavaj šokadramy».

Aŭtar sieryjała, Rajan Merfi, paśpiašaŭsia vystupić u abaronu svajho tvoru i apisaŭ niehatyŭnuju reakcyju svajakoŭ bratoŭ jak «pa mienšaj miery pradkazalnuju».

U čaćvier u padtrymku bratoŭ Mienendes vystupiła telezorka Kim Kardašjan, što jašče bolš padahreła cikavaść da hetaj sahi.

«Jany nijakija nie monstry, heta dobryja, intelihientnyja, sumlennyja ludzi», — napisała Kardašjan u artykule dla NBC News. 

• 1
• 0
• 2
• 6
• 1
• 0
• 0
• 0