«Papierka, a nie padstava dla vyjezdu». Biełarusa z polskim prajaznym dakumientam nie puścili na samalot

Polski padarožny dakumient zamiežnika, jaki Jan mieŭ pry sabie, supracoŭniki avijakampanii nazvali prosta papierkaj. Pra historyju Jana piša «Biełsat».

«Jak ty siudy trapiŭ biez pašpartu?»

Jan vyjazdžaŭ za miežy Jeŭrasajuza biez pašpartu, tolki z polskim padarožnym dakumientam, upieršyniu. Biełarus viedaŭ, što maje na heta prava, što Hruzija puskaje na svaju terytoryju hramadzianaŭ Biełarusi z tak zvanymi «pašpartami zamiežnikaŭ», tamu spakojna nabyŭ kvitok u łaŭkostera WizzAir z Poznani ŭ Kutaisi i pajechaŭ u aeraport.

Prablemy, adnak, pačalisia ŭžo na stojcy rehistracyi na rejs, kali Jan padaŭ supracoŭniku svoj padarožny dakumient.

«Jon pahladzieŭ, nie viedaŭ, što rabić, patelefanavaŭ supiervajzieru, tam skazali, kab ja źviazvaŭsia z ambasadaj Hruzii ŭ Varšavie. Heta była subota, adpaviedna, ambasada nie adkazała. U vyniku supracoŭnik avijakampanii skazaŭ, što moj padarožny dakumient — heta prosta papierka, a nie dakumient, nie padstava dla vyjezdu», — raspaviadaje Jan.

Biełarus paprasiŭ, kab jamu vydali piśmovuju admovu ŭ pasadcy na rejs, adnak supracoŭnik avijakampanii admoviŭ, znoŭ spasłaŭšysia na toje, što ŭ mužčyny nie było pašpartu.

Pakolki ŭ Jana była anłajn-rehistracyja i nie było bahažu, jon prajšoŭ pa pasadačnym kvitku i pasprabavaŭ sieści ŭ samalot, adnak pierad pasadkaj sustreŭ usio tych ža supracoŭnikaŭ, što raźviarnuli jaho na čekinie.

«Toj, što mianie i absłuhoŭvaŭ na pačatku, zapytaŭsia: «Jak ty siudy trapiŭ biez pašpartu?», — kaža Jan.

Razam z supracoŭnikam WizzAir mužčyna padyšoŭ da pamiežnikaŭ — tyja paćvierdzili, što Hruzija puskaje z «pašpartam zamiežnika», što heta — narmalny dakumient.

«Supracoŭnik, što padychodziŭ sa mnoj da pamiežnikaŭ, pahadziŭsia, ale astatnija — nie, i mianie ŭsio roŭna raźviarnuli, — raspaviadaje dalej Jan. — Ja prasiŭ usich supracoŭnikaŭ, jakija absłuhoŭvali rejs, što byli ŭ zonie dasiažnaści — čatyroch čałaviek — vydać mnie piśmovuju admovu ŭ pasadcy na rejs. Adnak jany ŭsie mnie admovili i rabili vyhlad, što nie razumiejuć, pra što ja kažu, ci prosta ihnaravali. Heta zaraz ja razumieju, što treba było vyklikać palicyju dla fiksacyi faktu admovy ŭ pasadcy i vydačy formy admovy».

Hruzinskaja ambasada: biełarusam z polskim prajaznym dakumientam viza nie patrebnaja

Piśmovuju formu admovy Jan prasiŭ, bo jaje patrabuje słužba padtrymki WizzAir pry padačy skarhi. Na heta biełarus spasyłaŭsia i ŭ razmovach z supracoŭnikami ŭ aeraporcie — kaža, tyja ihnaravali jahonyja arhumienty.

Tady Jan zrabiŭ list u PDF, zahruziŭ jaho zamiest patrebnaj formy admovy na sajcie WizzAir i adpraviŭ skarhu. U liście biełarus patrabavaŭ vypłaty kampiensacyi, pryvodziŭ adkaz ambasady Hruzii datyčna polskich padarožnych dakumientaŭ, padkreślivaŭ, što jon nie musiŭ mieć vizu dla ŭjezdu ŭ Hruziju, a taksama davaŭ infarmacyju pra rejs, jakim urešcie paśpiachova vylecieŭ u Hruziju na nastupny dzień, 4 traŭnia, z Varšavy. U staličnym aeraporcie pretenzijaŭ da padarožnaha dakumientu ni ŭ kaho nie ŭźnikła.

Padtrymka WizzAir, sa słovaŭ Jana, adchiliła skarhu, bo ŭ mužčyny nie było vizy.

«Vidavočna, jany navat nie čytali skarhu ŭvažliva, bo ŭ adkazie była admova ŭ kampiensacyi za pieršy, niavykarystany kvitok, jakuju ja nie prasiŭ. Ja prasiŭ za nastupny kvitok, jakim lacieŭ z Varšavy, za hatel — 400 jeŭra zhodna z zakonam u vypadku niepasadki na rejs. Infarmacyju pra nastupny rejs i list z ambasady Hruzii ŭ Polščy ŭ adkazie praihnaravali», — raspaviadaje surazmoŭca.

U liście ž z hruzinskaj ambasady ŭ Varšavie havaryłasia, što biełarus, jaki maje dziejny polski padarožny dakumienty i dazvoł na žycharstva ŭ Polščy (kartu pobytu), moža ŭjazdžać na terytoryju Hruzii bieź vizy (skrynšot adkazu Jan dasłaŭ taksama ŭ redakcyju).

Biełarus nakiravaŭ skarhi ambudsmenu pa pravach pasažyraŭ va Upraŭleńni hramadzianskaj avijacyi i ŭ ECK Polska (Jeŭrapiejski spažyviecki centr) — pakul čakaje adkazaŭ. Jan adznačaje, što avijakampanija nie moža prosta tak biez padstavaŭ nie pasadzić pasažyra na rejs, i spasyłajecca na Rehłamient JEZ №26/2004 «Ab ustalavańni ahulnych praviłaŭ u halinie kampiensacyi i sadziejańni pasažyram u vypadku admovy ŭ pasadcy, admieny ci praciahłaj zatrymki avijarejsu».

Advakat: možna sudzicca, ale harantyjaŭ vyjhryšu niama

«Biełsat» źviarnuŭsia pa kamientar adnosna situacyi ŭ WizzAir — pakul adkazu nie maje, jak tolki atrymajuć jaho — apublikujuć.

Advakat Aleś Michalevič u kamientary «Biełsatu» źviartaje ŭvahu na toje, što avijakampanija — heta pryvatnaja arhanizacyja, jakaja moža sama vyznačać praviły pasadki na samalot. Kali b havorka išła pra pamiežnikaŭ, naprykład, jakija źjaŭlajucca dziaržaŭnaj strukturaj, heta była b inšaja situacyja i možna było b kazać pra parušeńnie pravoŭ.

«Kali pryvatnaja avijakampanija admaŭlaje ŭ pasadcy, ź imi možna sudzicca. Ale ŭ ich buduć taksama svaje arhumienty. Tamu harantyjaŭ, što sprava budzie vyjhranaja, nichto nie moža dać», — kaža spadar Aleś.

Pa słovach advakata, admovy ŭ pasadcy na bort samalota — davoli častaja sprava, i hetak ža časta nie atrymlivajecca ničoha z hetym zrabić.

Sapraŭdy, situacyja Jana — daloka nie pieršaja ŭ apošnija hady. «Biełsat» raskazaaŭ raniej pra vypadki, kali avijakampanii, pieravažna łaŭkostery — WizzAir, Ryan Air — admaŭlali ŭ pasadcy biełarusam z polskimi padarožnymi dakumientami, a taksama z tak zvanymi «Ženieŭskimi pašpartami» — prajaznymi dakumientami ŭciekača. Pra padobnyja vypadki pisali taksama i inšyja biełaruskija miedyja.

Va ŭsich vypadkach biełarusy śćviardžali, što mieli ŭsie nieabchodnyja dakumienty dla palotu: i kvitki, i padarožnyja dakumienty, jakija musić pryznavać kraina vyletu, kraina prylotu i kraina pachodžańnia avijakampanii.

Va ŭsich vypadkach u pasadcy admaŭlali nie pracaŭniki pašpartnaha kantrolu, a pradstaŭniki avijakampanii, što praviarajuć kvitki i dakumienty pierad pasadkaj. U niekalkich vypadkach pracaŭniki avijakampanii nie pahadzilisia dać piśmovaje paćvierdžańnie admovy ŭ pasadcy.

Što rabić, kali nie puskajuć na samalot?

Va ŭsich viadomych vypadkach z padarožnymi dakumientami na bort nie puskali łaŭkostery — biudžetnyja avijakampanii, jakija prapanujuć tannyja paloty ź mienšymi vyhodami dla pasažyraŭ. Bujnyja avijakampanii vykarystoŭvajuć sistemy praviarańnia patrabavańniaŭ dziaržavaŭ da padarožnych dakumientaŭ kštałtu Timatic AutoCheck Mižnarodnaj asacyjacyi pavietranaha transpartu (IATA).

Mahčyma, łaŭkostery aščadžajuć siarod inšaha na takich sistemach. WizzAir maje dostup da sistemy TravelDoc, jakaja adnaznačna kaža puskać u Hruziju i Čarnahoryju pasažyraŭ z polskim padarožnym dakumientam. Ryanair ža, mahčyma, zusim nie karystajecca takimi sistemami — maje chiba śpis uradavych sajtaŭ z patrabavańniami da padarožnych dakumientaŭ, ale častka spasyłak u hetym śpisie nieaktualnaja i viadzie na pustyja staronki.

Zhodna z rehulacyjaj Jeŭraźviazu № 261/2004, avijakampanija moža admović u pasadcy, kali jość «rezonnyja padstavy»: ryzyki zdaroŭju i biaśpiecy abo nieadpaviednyja padarožnyja dakumienty. Ab pravie pieravoźnika na niejkuju alternatyŭnuju interpretacyju zakanadaŭstva ab prajaznych dakumientach u rehulacyi nie havorycca. Pasažyry majuć prava na kampiensacyju, a pieravoźnik abaviazany pakazać pasažyru, jakomu admovili ŭ pasadcy, dzie toj moža pačytać pra svaje pravy na kampiensacyju i dapamohu. U krainach pa-za Jeŭraźviazam mohuć być inšyja praviły admovy, ich varta spraŭdzić pierad vyletam.

Kali ŭhavory nie dapamahajuć, treba patrabavać paćvierdžańnie admovy ŭ pasadcy, inačaj za palot mohuć nie viarnuć hrošy. Kali admaŭlajucca, prasić dapamohi rabotnikaŭ aeraportu ci pravaachoŭnikaŭ: kali dapamahčy nie zmohuć, paprasić ichnyja kantakty, kab u vypadku suda jany zmahli paćvierdzić niepravamocnuju admovu.

Možna sprabavać samastojna zafiksavać na fota i videa svaju prysutnaść u aeraporcie ŭ čas pierad pasadkaju, kali praviły adpaviednaj krainy nie zabaraniajuć zdymki — u Polščy ź niadaŭniaha času ŭ aeraportach moža być takaja zabarona. Kali ŭsio heta niemahčyma, pasprabavać sabrać inšyja dokazy svajho źjaŭleńnia na pasadku ŭ naležny čas.

• 0
• 0
• 0
• 0
• 3
• 0
• 2
• 0