«Šklanki ź vibraniumu»: ludzi ździvilisia cenam na pradukcyju škłozavoda «Nioman»
U tyktoku nieadnaznačna adreahavali na videa z navinkaj ad škłozavoda «Nioman». Cana na šklanki dla viski padałasia karystalnikam zavyšanaj. U kamientarach uspomnili i nievysokija zarobki na pradpryjemstvie, i adtok kadraŭ za miažu, piša Hrodna.life.
U akaŭncie pradpryjemstva prarekłamavali nabor z šaści šklanak z kryštalu abjomam 250 mł za 268 rubloŭ 30 kapiejek. U adkaz kamientatary pačali žartavać, što šklanki, napeŭna, z vibraniumu.
«Nioman, napeŭna, vyrašyŭ, što jon Baccarat abo Laliqu» — napisaŭ adzin ź ich. Siarod kamientaroŭ:
- «Kali zadača vyjści z — u + da 2050 hoda)»;
- «Heta košt za ŭvieś zavod. A šklanka kolki, padkažycie kali łaska»;
- «U baćkoŭ u siervancie na paru tysiač takoha barachła. Para pačynać biznes»;
- «Pchacha… Cana žeść. Ja na WB uziaŭ dobry nabor šklanak dla viski… Nabor AHOŃ»
Niekatoryja ličać canu spraviadlivaj:
- «Viski ŭ takim kielichu zajhraje novymi farbami. 15 dalaraŭ za kielich vydatnaja cana»
- «Za ručnuju pracu z kryštala — heta navat tanna».
Heta daloka nie samy darahi nabor z kryštala ŭ katałohu «Niomana». Nabor dla viski «Edynburh» z šaści šklanak i hrafina kaštuje 535 rubloŭ 80 kapiejek. Praŭda, i vyhladaje jon daražejšym. Nabor šklanak z reljefnym dekoram biez hrafina kaštuje prykładna stolki ž, kolki šklanki z rekłamnaha videa — 275 rubloŭ 80 kapiejek. Nabor šklanak dla viski anałahičnaha abjomu sa zvyčajnaha škła kaštuje 67,10 rubla za šeść štuk.
Samaja darahaja ŭ katałohu kryštala — dekaratyŭnaja vaza «Palavańnie na kačku» vyšynioj 26,7 sm. Jana kaštuje 5 708 rubloŭ 50 kapiejek.
A zarobak — 1000 rubloŭ?
«Hety zavod majstru pa vydzimańni płacić 1000 rubloŭ za miesiac, a ceny hnie dla zarobkaŭ administracyi», — napisaŭ adzin z kamientataraŭ.
«Usie hodnyja majstry ŭ vas źjechali na taki ž zavod u Biełastok. Ci matajucca pa zarobkach u ES», — napisaŭ druhi ŭ adkaz na zaŭvahu pradstaŭnika zavoda ab tym, što ŭ majstroŭ hodnyja zarobki.
Na sajcie škłozavoda zaraz jość niekalki aktualnych vakansij:
- inžynier-kanstruktar, zarobak 1500−2000 rubloŭ.
- inžynier-chimik, zarobak 1100−1800 rubloŭ.
- vydzimalnik škłovyrabaŭ, zarobak 1600−2800 rubloŭ.
- ślesar pa ramoncie aŭtamabilaŭ, z/p 1100−1600 rubloŭ.
Inšaharodnim abiacajuć internat, kampiensacyju vydatkaŭ na prajezd i… dapłaty da zarobku na pradukty. Miarkujučy pa ŭsim, zarobki paznačanyja da vyličvańnia padatkaŭ.
Na sajcie słužby zaniataści vakansij dla škłozavoda bolš — 13, usiaho šukajuć ludziej na 22 pracoŭnyja miescy. Zarobki pačynajucca ad 900−1300 rubloŭ. Stolki abiacajuć płacić mašynistu hazaduŭnych mašyn, elektramancioru, apierataru kacielni, kantraloru i aŭtaślesaru.
Vydzimalniku škłovyrabaŭ, jaki pracuje ŭ try źmieny, hatovyja płacić ad 1600 da 3000 rubloŭ. Stolki ž — azdablalniku vydzimanych vyrabaŭ piataj katehoryi. Hatovyja pracaŭładkavać zamiežnikaŭ. Ad 2000 da 3000 prapanujuć hałoŭnamu inžynieru-kanstruktaru.
Raźviedka ZŠA: Biełaruś stała pieradavym vajskovym płacdarmam Rasii24
Kamientary