Ślipmaksinh: što staić za novym trendam, jaki abiacaje palepšyć jakaść snu. I ci sapraŭdy jon pracuje

Ślipmaksinh (Sleepmaxxing) aznačaje ŭśviadomlenuju aptymizacyju snu, kab ranicaj pračnucca bolš badziorym, zasiarodžanymi i navat bolš pryvabnym. Heta nie prosta «kłaścisia spać krychu raniej». 

Trend uklučaje ŭ siabie kompleksny padychod: ad palapšeńnia hihijeny snu i admovy ad hadžetaŭ pierad snom da vykarystańnia rytuałaŭ, charčovych dabavak i trekieraŭ snu.

U TikTok papularnyja takija mietady, jak bieły šum, zaklejvańnie rota płastyram, spažyvańnie kivi pierad snom abo «sonnaha kaktejlu» z mahnijem. Ideja ŭ tym, kab vycisnuć maksimum z načnoha adpačynku dla zdaroŭja cieła, rozumu i źniešniaha vyhladu.

Pavialičyć

Ci pracuje ślipmaksinh?

Na heta pytańnie šukali adkaz žurnalisty Cosmopolitan.de. Karotki adkaz: tak, kali padychodzić da spravy razumna i vybirać pravieranyja mietady.

Plusy: Stvareńnie pradumanaj viačerniaj ruciny moža stać sapraŭdnym rytuałam ačyščeńnia dla cieła i rozumu. Jakasny son, jak pakazvajuć daśledavańni, umacoŭvaje imunitet, źnižaje ryzyku sardečna-sasudzistych zachvorvańniaŭ, dyjabietu 2-ha typu, depresii i atłuścieńnia. Navat nievialikija źmieny, takija jak admova ad hadžetaŭ pierad snom abo rassłablalnaja viačerniaja rucina, mohuć dać prykmietny efiekt u doŭhaterminovaj pierśpiektyvie.

Minusy: Kłopat pra siabie — heta važna, ale ślipmaksinh moža pieratvarycca ŭ novuju krynicu stresu. Pahonia za «idealnym snom» časam stvaraje zališni cisk, što tolki zaminaje pasłableńniu. Jašče adna prablema: niekatoryja papularnyja ŭ TikTok parady nie tolki nie majuć navukovaha paćviardžeńnia, ale i mohuć być niebiaśpiečnyja dla zdaroŭja.

Dziŭnyja mietady ślipmaksinhu

Niekatoryja mietady, jakija aktyŭna prasoŭvajuć u sacsietkach, vyklikajuć pytańni. Voś niekalki prykładaŭ:

• Zaklejvańnie rota:

Hety mietad praduhledžvaje zaklejvańnie rota płastyram abo skotčam na noč, kab dychać tolki nosam. Prychilniki śćviardžajuć, što heta pamianšaje chrap i palapšaje son. Sapraŭdy, dychańnie praz nos karysna i moža źmienšyć chrap, ale ekśpierty papiaredžvajuć: dla ludziej z prablemami z dychańniem, apnoe (asabliva, kali čałaviek pra jaho nie viedaje) abo zakładzienym nosam heta moža być niebiaśpiečna, bo abmiažoŭvaje dostup kisłarodu, stvarajučy ryzyku dla serca.

• Pašyralniki dla nosa:

Jany mohuć ablehčyć dychańnie pry lohkaj zakładzienaści nosa, ale pry surjoznych prablemach z dychańniem jany nie zamieniać lačeńnia, a dokazaŭ ich efiektyŭnaści niedastatkova.

• Bieły šum:

Pastajanny fonavy šum dapamahaje zahłušyć staronnija huki i supakoić mozh, što moža ablehčyć zasynańnie. Adnak jon padychodzić nie ŭsim — niekatoryja znachodziać jaho razdražnialnym, a daśledavańni pakazvajuć, što jon moža parušać fazu hłybokaha snu. Važna vykarystoŭvać bieły šum umieranaj hučnaści i paźbiahać praciahłaha prasłuchoŭvańnia praz navušniki, kab nie naškodzić słychu.

• «Sonny kaktejl» z mahnijem:

Mahnij dapamahaje pasłabić myšcy i niervovuju sistemu, što karysna dla snu. Ale lišak mahniju moža vyklikać prablemy sa straŭnikam, asabliva ŭ ludziej z adčuvalnym stravavańniem.

• Son da 22:00:

Hučyć pryvabna, ale pasuje nie ŭsim. Naš chranatyp (schilnaść być «žaŭrukom» ci «savoj») vyznačajecca hienietykaj, i baraćba z unutranaj bijałahičnym hadzińnikam moža naškodzić.

Piać pravieranych parad dla ślipmaksinhu

Kab palepšyć son, nie abaviazkova ŭskładniać žyćcio. Hetyja piać navukova abhruntavanych i prostych parad dapamohuć zrabić nočy bolš spakojnymi:

1. Ješcie kivi pierad snom: Kivi — nie tolki smačny, ale i karysny pierakus. Daśledavańni pakazvajuć, što hety frukt, bahaty na miełatanin, antyaksidanty, sieratanin i folijevuju kisłatu, dapamahaje skaracić čas zasynańnia i pavialičyć praciahłaść snu.

2. Śpicie ŭ prachałodnym pakoi: pavodle daśledavańniaŭ, aptymalnaja tempieratura dla snu — 16-19 °C. Prachałoda dapamahaje arhanizmu vypracoŭvać miełatanin — harmon, jaki adkazvaje za drymotnaść.

3. Admoŭciesia ad hadžetaŭ viečaram: Sacsietki pierad snom stymulujuć mozh, pieraškadžajučy jamu rassłabicca. Navuka paćviardžaje: vykarystańnie smartfonaŭ uviečary paharšaje jakaść snu.

4. Uličvajcie svoj chranatyp: U kožnaha svoj rytm — niechta «žaŭruk», a niechta «sava». Žyćcio ŭ harmonii z unutranym hadzińnikam dapamahaje paźbiehnuć prablem sa snom.

5. Stvarycie viačerniuju rucinu: Prostyja rytuały, takija jak viadzieńnie dziońnika, ciopłaja vanna ci vodar łavandy, sihnalizujuć mozhu, što para rychtavacca da snu. Heta dapamahaje nastroicca na adpačynak biez dadatkovych srodkaŭ nakštałt tabletak miełatanina.

Ślipmaksinh — heta nie prosta modny trend, a mahčymaść palepšyć zdaroŭje i samaadčuvańnie praź jakasny son. Hałoŭnaje — vybirać navukova abhruntavanyja mietady i paźbiahać zališniaha cisku. Prostyja praktyki mohuć tvaryć cudy, kali vykonvać ich z rozumam.

• 5
• 0
• 1
• 1
• 0
• 0
• 0
• 0