Raspracavany pieršy za 50 hadoŭ antybijotyk suprać śmiarotnaj supierbakteryi

Šviejcarskaja farmaceŭtyčnaja kampanija Roche razam z navukoŭcami z Harvardskaha ŭniviersiteta raspracavała pieršy za paŭstahodździa antybijotyk, jaki moža spravicca z Acinetobacter baumannii — ustojlivaj da lekaŭ bakteryjaj, jakuju SAAZ nazvała pryjarytetnaj pahrozaj, a amierykanskija Centry kantrolu i prafiłaktyki zachvorvańniaŭ — «nadzvyčajnaj niebiaśpiekaj».

Hetaja antybijotykaŭstojlivaja bakteryja asabliva niebiaśpiečnaja dla špitalizavanych pacyjentaŭ, bo vyklikaje ciažkija infiekcyi, takija jak pnieŭmanija i siepsis. Pavodle acenak, ad 40 da 60 pracentaŭ zaražanych — siarod jakich šmat ludziej z casłablenym imunitetam praz chvaroby kštałtu raka — pamirajuć u vyniku zaražeńnia.

Asnoŭnaja składanaść u baraćbie z Acinetobacter baumannii — jaje dvajnaja kletkavaja miembrana, praź jakuju ciažka prabicca zvyčajnym antybijotykam.

Novy preparat, jaki atrymaŭ nazvu zasurabałpin (zosurabalpin), pracuje inakš: jon uździejničaje na śpiecyfičny białkovy miechanizm, jaki ŭ normie zabiaśpiečvaje farmiravańnie vonkavaj abałonki, ale pad dziejańniem preparata hety praces parušajecca.

Taki miechanizm dziejańnia nie vykarystoŭvajecca ŭ inšych antybijotykach, tamu preparat moža stać asnovaj dla stvareńnia cełaha pakaleńnia novych lekaŭ. U łabaratornych umovach i na hryzunach zasurabałpin pakazaŭ «nadzvyčaj efiektyŭny» vynik, paviedamlaje časopis Nature.

Kampanija-raspracoŭščyk paviedamiła, što zasurabałpin pierachodzić u treciuju, finalnuju fazu kliničnych vyprabavańniaŭ, pačatak jakoj zapłanavany na kaniec hetaha hoda abo pačatak 2026-ha.

U daśledavańni prymuć udzieł kala 400 pacyjentaŭ ź infiekcyjaj Acinetobacter baumannii, ustojlivaj da karbapieniemaŭ (CRAB), jakija zvyčajna vykarystoŭvajucca jak apošni srodak pry lačeńni ciažkich infiekcyj. Častka ź ich atrymaje novy preparat, inšyja — lačeńnie pavodle ciapierašniaha miedycynskaha standartu.

Miarkujecca, što ŭ vypadku pośpiechu preparat moža atrymać dazvoł na vykarystańnie da kanca dziesiacihodździa.

Jak adznačaje The Telegraph, raniej farmaceŭtyčnyja kampanii, u tym liku Roche, nie śpiašalisia raspracoŭvać novyja antybijotyki, bo heta nie prynosiła prybytku. Takija preparaty vykarystoŭvajucca redka i tolki ŭ samych ciažkich vypadkach, kab nie vyklikać ustojlivaści bakteryj. U vyniku prodažy antybijotykaŭ małyja, a raspracoŭka darahaja i praciahłaja. Tamu firmy addavali pieravahu lekam, jakija prynosiać bolš prybytku.

Na sioletniaj Hienieralnaj Asamblei AAN suśvietnyja lidary abviaścili antymikrobnuju ŭstojlivaść adnoj z samych vostrych hłabalnych pahroz dla zdaroŭja čałaviectva. Pavodle prahnozaŭ AAN, kali nie buduć pryniatyja efiektyŭnyja miery, užo da 2050 hoda antybijotykaŭstojlivyja infiekcyi mohuć zabivać da 10 miljonaŭ čałaviek štohod i spravakavać hłabalny finansavy kryzis.

Udzielniki AAN padpisali śpiecyjalnuju dekłaracyju, u jakoj abaviazalisia stvaryć niezaležnyja ekśpiertnyja paneli dla manitorynhu prablemy — pa prykładzie tych, što ŭžo dziejničajuć u halinie klimatyčnych źmienaŭ. Akramia taho, krainy pastavili pierad saboj metu skaracić kolkaść śmierciaŭ, źviazanych z antybijotykaŭstojlivaściu, na 10% da 2030 hoda.

Novy antybijotyk ź niezvyčajnym miechanizmam dziejańnia nie tolki daje nadzieju na lačeńnie adnaho z samych niebiaśpiečnych patahienaŭ, ale i adkryvaje šlach da źjaŭleńnia cełaj linii inavacyjnych lekaŭ. 

• 14
• 0
• 0
• 0
• 1
• 0
• 0
• 0