Łukašenka zajaviŭ, što padziež žyvioły ŭ Biełarusi dasiahnuŭ «histaryčnaha maksimumu»
29 maja padčas narady z uradam Alaksandr Łukašenka vykazaŭ zakłapočanaść situacyjaj z padziažom žyvioły ŭ Biełarusi. Jon adznačyŭ, što ŭzrovień padziažu dasiahnuŭ histaryčnaha maksimumu, i heta surjozna škodzić žyviołahadoŭli.
«Pra što havoryć statystyka? Padziež dasiahnuŭ histaryčnaha maksimumu!», — zajaviŭ Łukašenka.
Jon prapanavaŭ dla vypraŭleńnia situacyi niestandartnaje rašeńnie: zabirać cialat z tych haspadarak, dzie nazirajecca vysoki padziež, i pieravodzić ich u lepšyja haspadarki — dzie dobry dohlad, pracujuć vieterynarnyja daktary i amal niama strataŭ. Za heta haspadarkam, u jakich žyviołu buduć zabirać, daviadziecca zapłacić hrošy, ale hałoŭnaje, maŭlaŭ — vyratavać maładniak.
Taksama Łukašenka paviedamiŭ, što napiaredadni najaŭnuju situacyju pravieryli i vyjaviłasia, što vietdaktary časta chavajuć fakty padziažu.
«Rajonnyja vietdaktary zamiest taho, kab lačyć, prafiłaktavać i inšaje, abmiarkoŭvajuć ź lekarami ŭ haspadarcy, jak schavać hety padziež. […] Heta kašmar. Heta niedapuščalna», — zajaviŭ jon.
Palityk padkreśliŭ, što za takija vypadki treba karać — až da kryminalnaj adkaznaści.
Na kaniec krasavika 2025 hoda ŭ Biełarusi naličvałasia krychu mienš za 4 miljony hałoŭ bujnoj rahataj žyvioły — 3 989 212. Heta na 2,3% mieniej u paraŭnańni z anałahičnym pieryjadam minułaha hoda, kali pahałoŭje składała bolš za 4 miljony.
Pry hetym za 2024 hod padziež bujnoj rahataj žyvioły pa krainie ŭ cełym vyras amal na piatuju častku — na 19,1%. Kali ŭ 2023 hodzie zahinuła 124,2 tys. hałoŭ, to ŭ 2024-m — užo 147,9 tysiač.
Najbolšy rost padziažu za hod zafiksavany ŭ Mahiloŭskaj vobłaści — na 35,4%. Dalej iduć Minskaja (22,6%), Homielskaja (22,3%), Viciebskaja (12%), Hrodzienskaja (11,9%) i Bresckaja (6,5%).
Łukašenka: My hatovyja zaklučyć vialikuju ździełku z ZŠA70
Kamientary