Kab źniać prapahandyscki klip, prydvorny kampazitar Alejnik vyciahnuŭ litaralna z-pad kropielnicy 86-hadovuju babulu

Aŭtar piesień u padtrymku Łukašenki kštałtu «Baťka u nas krutoj» Jaŭhien Alejnik vyrašyŭ papracavać z temaj dobraŭparadkavańnia (pakolki 2025 hod abjaŭleny ŭ Biełarusi Hodam dobraŭparadkavańnia). Sa svaim hurtom «Dobryja ludzi» pradziusar pasprabavaŭ zapuścić fłešmob — kvartet zaklikaje «jechać u viosku i navodzić paradak».

Dla hetaha kalektyŭ źniaŭ klip na pieśniu «Dabro» ŭ vioscy Surviliški, što ŭ Pastaŭskim rajonie na Viciebščynie.

Pavialičyć

Pasył u pieśni prosty: treba zastavacca na rodnaj ziamli, nie skardzicca i samastojna vyrašać svaje prablemy.

Artysty ščaśliva paśmichajucca i śpiavajuć:

«Kali chto lažyć i nie duje ŭ vus,
Chto lanujecca, toj nie biełarus.
Kab nie skardzicca, nie pytać «Čamu?»
Ščaście zarabić treba samamu».

Alejnik kaža, što kvartet vyrašyŭ dapamahčy starym ludziam, patraciŭ na ramont ich chaty ŭłasnyja hrošy, jakija zarabiŭ na kancertach. Śćviardžajecca, byccam chłopcy i dziaŭčaty nie prosta patančyli pobač z kałodziežam dla videa, a vykanali sapraŭdy karysnuju pracu: «My zamianili hniłyja doški na novyja na dachu, pafarbavali ich, patynkavali i adnavili padmurak i prystupki, ich pafarbavali, apłacili pracu rabočych (2 dni)».

Śpievaki ŭ kadry padfarboŭvajuć chatku, ciahajuć doški, kapajuć hrady… Ale prostyja ludzi pabačyli ŭ hetym pakazuchu.

Pavialičyć

U kamientaryjach adrazu pačali žartavać z taho, jak niazhrabna taja praca vyhladaje: adzin chłopiec byccam prykručvaje došku, druhi ŭ toj ža čas byccam adryvaje jaje łomam…

Pavialičyć

Znajšlisia i ludzi, jakija dobra viedajuć tuju chatku i jaje haspadaroŭ: «Hetu chatu dobra dahladajuć dzieci haspadaroŭ. Chata i tak pryvabnaja! Čyścinia i paradak kala siadziby! Kožny tydzień tam byvaju. I siońnia tam była. Ramontu nie pabačyła…».

Pavialičyć

Hazieta «Pastaŭski kraj» apublikavała repartaž sa zdymak klipa «Dabro». 

Vyśvietliłasia, što ŭ pačatku viasny pradziusar Jaŭhien Alejnik źviarnuŭsia da staršyni Kamajskaha sielsavieta z prośbaj dapamahčy znajści chatu ŭ malaŭničym miescy, dzie b žyła siamiejnaha para šanoŭnaha ŭzrostu. Łahična było b šukać ludziej, jakim sapraŭdy patrebna niejkaja dapamoha z ramontam. Ale ŭ tekście žurnalistka pryznaje, što prasili mienavita dahledžanuju chatu.

Pavialičyć

U vyniku čynoŭnik paraiŭ źviarnucca da siamji Iosifa i Ludmiły Paškievičaŭ.

Pavialičyć

U mai da pažyłoj pary pryjechali prafiesijnyja budaŭniki, jakija pa damoŭlenaści z pradziusaram padramantavali padmurak i kaniok na dachu. Na fota bačna, što jon staŭ jarka-zialonym.

Paśla ŭžo pryjechała zdymačnaja hrupa z artystami i pradziusaram. Ale ž vyśvietliłasia niepryjemnaje: 86-hadovaja Ludmiła ŭ toj dzień znachodziłasia ŭ balnicy. Pa słovach žonki svajakoŭ, pačuŭšy takuju navinu, Alejnik surjozna zaniepakoiŭsia, bo ličyŭ, što biez babuli zdymki stračvali b sens.

U vyniku ŭnuk Ludmiły pajechaŭ pa babulu ŭ balnicu. «Vyrašyli dziejničać rašuča: muž apieratyŭna zabraŭ z balnicy babulu, jakoj tolki što adkapali kropielnicu, i dastaviŭ jaje na zdymačnuju placoŭku», — cytuje vydańnie žonku ŭnuka Hanna Cybulonak.

Artysty, pa słovach žančyny, «vykanali pasilnuju pracu na prysiadzibnym učastku, častkovy ramont chaty». Jany sapraŭdy ŭ kadry machajuć rydloŭkami dy źbirajuć niejkija halinki, pazirujuć ź siakierami dy hrablami.

Hanna kaža, što praca nad klipam praciahvałasia da 18 hadzin. Paśla heta Ludmiła viarnułasia ŭ balničnuju pałatu.

Pavialičyć

Darečy, heta nie pieršy raz, kali hurt «Dobryja ludzi» sprabuje puścić pył u vočy. U 2023 hodzie jahony pradziusar Jaŭhien Alejnik chvaliŭsia, što salist niadaŭna stvoranaha folk-kalektyvu Ivan Aksienčyk pajšoŭ u armiju.

Alejnik tady napisaŭ: «Ty sapraŭdny prykład taho, jak artyst, jaki vystupaje na viadučych placoŭkach krainy, nie biehaje ad paviestak pa zamiežžach, nie admazvajecca ad słužby dziakujučy suviaziam, a słužyć na karyść Radzimy!».

Słužyŭ na karyść Radzimy Ivan, vyhladaje, niadoŭha. Usiaho praz tydzień Ivan znoŭ źmianiŭ vajskovuju formu na sceničny kaścium i śpiavaŭ na kancercie ŭ honar 65-hodździa pradpryjemstva «Połack-Škłovałakno», a paźniej vystupaŭ i na inšych kancertach.

• 0
• 0
• 0
• 15
• 0
• 1
• 9
• 0