Dypłamatyčny daradca Cichanoŭskaj raskazaŭ, navošta jamu zvaniŭ Borys Džonsan
U novym vypusku «Žyćcia-maliny» Dzianis Kučynski raskryŭ niekatoryja padrabiaznaści kantaktaŭ z byłym premjer-ministram Vialikabrytanii Borysam Džonsanam.
Siarod zamiežnych palitykaŭ, ź jakimi sustrakałasia Śviatłana Cichanoŭskaja, byŭ i Borys Džonsan — premjer-ministr Vialikabrytanii ź lipienia 2019 pa vierasień 2022 hoda. Pieršaja sustreča z palitykam adbyłasia 3 žniŭnia 2021 hoda.
Jak zhadvaje Kučynski, heta sustreča była vielmi važnaj dla dalejšych mižnarodnych kantaktaŭ: «Kali ty ŭžo sustreŭsia na Daŭninh-stryt z premjer-ministram [Vialikabrytanii], ty možaš dalej vybudoŭvać pracu na ŭsich inšych uzroŭniach».
Druhi raz Śviatłana Cichanoŭskaja sustrełasia z Borysam Džonsanam 7 sakavika 2023 hoda.
Pa słovach Kučynskaha, padčas sustreč Džonsan cikaviŭsia biełaruskaj movaj, tym, nakolki jana padobnaja da ŭkrainskaj:
«My rabili paraŭnańni słovaŭ. Jon pytajecca, jak budzie victory. Kažam: «Pieramoha». — A pa-ŭkrainsku? — «Pieriemoha». — A pa-rusku? — «Pobieda». Kaža, jak budzie «dziakuj»?»
Kučynski zaŭvažaje, što cikaŭnaść da Biełarusi ŭ Džonsana abumoŭlenaja cikaŭnaściu da Ukrainy. Premjer-ministr Vialikabrytanii byŭ adnym ź pieršych zamiežnych lidaraŭ, jaki naviedaŭ Kijeŭ u 2022 hodzie, paśla pačatku poŭnamaštabnaj vajennaj ahresii Rasii suprać Ukrainy.
Dypłamatyčny daradca Ofisa Cichanoŭskaj zhadvaje, što sustrakaŭsia z kamandaj Džonsana, jakaja vaziła jaho ŭ Kijeŭ u 2022-m hodzie.
«Jany raskazvali, jak adbyvaŭsia vizit. Što jany zajšli ŭ kramu, kupili jamu knižku Cimaci Snajdera, kab patłumačyć [kantekst kanfliktu]. I jon byŭ u hetym vielmi zacikaŭleny».
«My možam jaho aceńvać pa-roznamu jak palityka, ale jak čałaviek, jaki dbaje, — heta sapraŭdy važna», — davodzić Kučynski i zhadvaje:
«Ja pamiataju, kali «Lusterka» paprasiła dapamohi, kab zrabić ź im intervju, ja daŭ kantakty, my damovilisia. [Napiaredadni] było dva telefanavańni. Spačatku [Džonsan] pazvaniŭ rankam. Pytajecca, jak pravilna pramaŭlać: «Siarhiej Cichanoŭski, Śviatłana Cichanoŭskaja»?
Na ŭdakładniajučaje pytańnie, ci heta byŭ zvanok praz asistentaŭ, Kučynki adkazaŭ, što zvaniŭ niepasredna Borys Džonsan, ź im jon taksama pierapisvajecca ŭ čacie:
«Prosta pazvaniŭ rankam jon naŭprost. Kaža: «Paru faktaŭ chaču śćvierdzić». I kaža pra Biełaruś, pra situacyju. Kaža: «Tak, ja sapraŭdy chvalujusia». Adkazvaju: «Nie chvalujciesia. Pra vas u Biełarusi viedajuć». Jon kaža: «Moža, paśla hetaha intervju stanie horš». Vielmi kłasnaje pačućcie humaru».
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»12
Kamientary