Sud u Azierbajdžanie vynies surovyja prysudy žurnalistam, jakija rasśledavali biznes siamji Alijeva

Šeść z tych, chto byŭ pryznany vinavatym u roznych złačynstvach, źviazanyja z vydańniem Abzas Media, jakoje publikavała rasśledavańni pra biznes azierbajdžanskaha prezidenta Ilchama Alijeva. Siomy žurnalist pracavaŭ u «Radyjo Svaboda».

Mienavita z Abzas Media ŭ 2023 hodzie pačałasia chvala aryštaŭ niezaležnych žurnalistaŭ u Azierbajdžanie.

Abzas Media viadoma rasśledavańniami karupcyi siarod čynoŭnikaŭ.

Jaje žurnalisty, naprykład, vyśvietlili, što za budaŭnictvam technałahičnaj «razumnaj vioski» ŭ Zanhilanskim rajonie Azierbajdžana staić kampanija, jakaja naležyć bratu pamočnika prezidenta.

Dyrektar Abzas Media Ulvi Hasanły, hałoŭny redaktar vydańnia Sievindž Vahifhyzy, žurnalist-rasśledavalnik Chafiz Babały, a taksama žurnalist «Radyjo Svaboda» i ekanamist Faryd Miechralizade byli pryhavorany da 9 hadoŭ pazbaŭleńnia voli.

Reparciory Abzas Media Narhiz Absałamava i Elnara Hasymava — da 8 hadoŭ, a namieśnik dyrektara Abzas Media Machamad Kiekałaŭ — da 7 hadoŭ i 6 miesiacaŭ.

Usie jany pryhavorany pa roznych kryminalnych abvinavačańniach, u tym liku ŭ kantrabandzie.

Adnak pravaabaroncy i sami žurnalisty tłumačać ich pieraśled imknieńniem uładaŭ Azierbajdžana prymusić maŭčać niezaležnyja ŚMI.

U 2022 hodzie ŭ Azierbajdžanie byŭ pryniaty zakon, jaki pryraŭniaŭ pracu ŚMI na zamiežnyja hranty da finansavaha złačynstva.

Sam prezident Alijeŭ zajaŭlaŭ, što nie dazvolić, kab «navat adzin pracent» finansavańnia srodkaŭ masavaj infarmacyi išoŭ z-za miažy, i apraŭdvaŭ novuju palityku imknieńniem umacavać niezaležnaść krainy.

Mnohija aryštavanyja žurnalisty dahetul znachodziacca ŭ turmie, prysudy im pakul nie vyniesieny.

Niekatoryja ź ich skardziacca na katavańni i navat na pahrozy źniavahaj.

Mižnarodnyja pravaabarončyja arhanizacyi nazyvajuć žurnalistaŭ palityčnymi źniavolenymi i źviartajuć uvahu, što za apošnija hady ŭ Azierbajdžanie kolkaść tych, chto apynuŭsia za kratami pa palityčnych pryčynach, pavialičyłasia ŭ niekalki razoŭ: ad kala 100 čałaviek da 375.

Akramia taho, Azierbajdžan za apošnija miesiacy vydaliŭ sa svajoj terytoryi miascovyja biuro BBC, «Hołas Amieryki» i pradstaŭnictvy mižnarodnych arhanizacyj, uklučajučy AAN i «Čyrvony kryž».

Krytyki źviazvajuć represii suprać mižnarodnych arhanizacyj i niezaležnych ŚMI z tym, što vajna Rasii suprać Ukrainy pazbaŭlaje Jeŭropu mahčymaści cisku na Baku.

A ŭ sprobach pazbavicca ad rasijskaha hazu Jeŭrasajuza źviartajecca ŭ tym liku da Azierbajdžana.

Padčas vizitu ŭ Baku ŭ 2022 hodzie kiraŭnik Jeŭrakamisii Ursuła fon der Lajen i kiraŭnik źniešniaj palityki ES Kaja Kałłas (u krasaviku hetaha hoda) nie kazali pra pravy čałavieka.

Ale nazyvali Azierbajdžan — «nadziejnym» i «klučavym partnioram» u enierhietyčnaj śfiery.

Za publičnaje ihnaravańnie aryštaŭ i ciopłyja adnosiny z Alijevym lidaraŭ JeC krytykujuć jak viadomyja azierbajdžanskija žurnalisty, tak i niekatoryja jeŭrapiejskija parłamientaryi.

Jeŭraparłamient u hetym hodzie pryniaŭ rezalucyju z patrabavańniem admovicca ad azierbajdžanskaha hazu — mienavita z-za častych parušeńniaŭ pravoŭ čałavieka ŭ hetaj krainie.

Ale heta tolki adna z mnostva rezalucyj adnosna Azierbajdžana, jakija ŭ roznyja hady vynosili roznyja struktury. Da spynieńnia represij jany nie pryviali.

• 0
• 0
• 0
• 0
• 2
• 0
• 6
• 0