Łukašenka znoŭ apałčyŭsia na pasiarednikaŭ. Hetamu zmahańniu ŭžo chutka 20 hadoŭ

Na naradzie abmiarkoŭvałasia situacyja, kali košt tavaru na zavodzie značna adroźnivajecca ad koštu ŭ kramie. Pavodle słoŭ Łukašenki, u łancužku prodažu mohuć źjaŭlacca niekalki pasiarednikaŭ, kožny ź jakich dadaje svaju nacenku — kala 25—30%. U vyniku cana moža vyraści ŭ niekalki razoŭ.

U jakaści prykładu jon pryvioŭ kardanny vał, jaki na zavodzie kaštavaŭ 140 rubloŭ. Paśla prachodžańnia praź niekalki pasiarednikaŭ jaho košt dla pakupnika vyras prykładna ŭ šeść z pałovaj razoŭ.

Łukašenka adznačyŭ, što pasiaredniki nie zaŭsiody źjaŭlajucca prablemaj, bo ŭ niekatorych vypadkach jany sapraŭdy patrebnyja. Adnak, pavodle jaho słoŭ, byvajuć schiemy, kali ich stanovicca zanadta šmat, a ŭ łancužok uklučajuć navat zamiežnyja kampanii, kab abychodzić abmiežavańni na handlovyja nacenki.

«U vyniku ŭsie nacenki, jakija asiadajuć u kišeniach takich działkoŭ, davodzicca apłačvać zvyčajnym spažyŭcam. Heta aburalna, i prykładaŭ bolš čym dastatkova», — zajaviŭ Łukašenka.

Milicyja taksama padała svaje danyja: u 2025 hodzie było vyjaŭlena bolš za 400 złačynstvaŭ, źviazanych z zakupkami, i bolš za pałovu ź ich — heta chabarnictva.

Pavodle infarmacyi ŭładaŭ, u 2023—2025 hadach Nacyjanalny centr elektronnych pasłuh i kampanija «Biełaruskija vobłačnyja technałohii» zapłacili pasiarednikam bolš za 10 miljonaŭ rubloŭ u vyhladzie nacenak.

Siarod prapanavanych na naradzie mier — źmianieńnie zakanadaŭstva ab zakupkach, stvareńnie rejestra niadobrasumlennych pasiarednikaŭ i raspracoŭka finansavych miechanizmaŭ, jakija dazvolać pradpryjemstvam pradavać tavary navat pakupnikam z praterminavanaj zapazyčanaściu.

Hałoŭnaja ž miera ŭ Łukašenki ŭniviersalnaja:

«Jak tolki my ŭbačym pasiarednikaŭ na biełaruskuju pradukcyju, ty nie raźbirajsia. Jak tolki ŭbačyli, što ŭ nas pasiaredniki na cukierki, šakaład, adzieńnie, małako, miasa, techniku biełaruskaj vytvorčaści, — adrazu ŭ SIZA», — zahadaŭ jon hienprakuroru Dźmitryju Hary.

Padčas hetaj samaj narady stała viadoma, što ŭ SIZA ŭžo adpraviŭsia ministr pryrodnych resursaŭ i achovy navakolnaha asiarodździa Siarhiej Maślak.

Łukašenka maryć pra toje, kab vyklučyć ź biełaruskaj ekanomiki pasiarednikaŭ, šmat hadoŭ. Na jaho dumku, heta vyrašyła b mnohija prablemy. Amal 17 hadoŭ tamu, 28 lipienia 2009 hoda, była navat vydadziena pastanova Savieta Ministraŭ № 991 «Ab niekatorych pytańniach nabyćcia tavaraŭ na terytoryi Respubliki Biełaruś», pavodle jakoj z 31 lipienia 2009-ha ŭ krainie faktyčna byŭ zabaronieny aptovy pieraprodaž tavaraŭ, a jurydyčnym asobam zakupki dazvalałasia rabić tolki ŭ vytvorcaŭ tavaraŭ abo ich aficyjnych pradstaŭnikoŭ. Ale hetuju pastanovu praź niekalki dzion daviałosia admianić, pakolki jana ledź nie pryviała da kałapsu ŭsiaho handlu.

Z taho času nastolki revalucyjnych krokaŭ bolš nie rabili, ale mara Łukašenki pazbavicca ad pasiarednikaŭ nikudy nie dziełasia, i jon čas ad času da hetaj temy publična viartajecca. Tak, u 2021 hodzie na UNS jon zapatrabavaŭ pasiarednikaŭ «daščentu vykaranić», pastaviŭšy na miesca tych, chto «žyruje na sialanach».

Amal dva hady tamu, u krasaviku 2024 hoda Łukašenka na naradzie pra stan i zadačy raźvićcia pramysłovaści nazvaŭ situacyju z pasiarednictvam katastrofaj i zajaviŭ, što źbirajecca pravieści naradu pa jaho likvidacyi. 

«Treba zapłanavać naradu ŭ mianie — chaj urad mnie zrobić spravazdaču pa likvidacyi pasiarednictva. Ja ŭžo dziesiać razoŭ pra heta kazaŭ: kab razam z hubiernatarami pryniali rašeńni. Heta katastrofa», — zajaviŭ jon.

Jak vyhladaje, ruki da takoj narady dajšli tolki ciapier. Miž tym za hety čas źjavilisia rasśledavańni, jak šmat na pasiarednictvie pry prodažy BiełAZaŭ zarablajuć ludzi, źviazanyja z synami samoha Łukašenki.

• 0
• 1
• 2
• 4
• 0
• 0
• 0
• 0