Sialanie na vazach. Jak maładym amierykancam pakazvajuć Biełaruś
U tyktoku publikujuć roliki ź dziciačym mahičnym hłobusam, jaki ŭ karotkim videa raspaviadaje pra kožnuju krainu śvietu. Voś što raskazvajecca pra Biełaruś.
Tyktokier pad nikam nowheregrl88 zdymaje roliki, u jakich naciskaje na krainy na dziciačym «mahičnym hłobusie» i pakazvaje, što raspaviadajecca pra ich u adpaviednym karotkim videa. Dniami jon apublikavaŭ rolik i pra Biełaruś.
«Biełaruś — pieravažna raŭninnaja kraina va Uschodniaj Jeŭropie, jakaja kaliści ŭvachodziła ŭ skład Savieckaha Sajuza. Hetaja kraina raźmieščana pamiž Rasijaj, Polščaj, Ukrainaj i Litvoj. Bulba prysutničaje ŭ bolšaści typovych biełaruskich straŭ, takich jak draniki, jakija źjaŭlajucca raznavidnaściu bulbianych aładak», — havorycca ŭ videa dziciačaha hłobusa.
Videašerah pryhniečvaje: viaskoŭcy viazuć harodninu i siena na vazach, zaprežanych końmi, pasiarod pola raskinułasia niejkaja sažałka, a ŭ kancy babula pole aharod. Nie pakazali nivodnaha horada, słavutaści ci chacia b zubroŭ u Biełaviežskaj puščy.
U vypadku inšych krain hłobus zhadvaje pra ich bahatuju historyju, kulturu, architekturu, pryhožuju pryrodu, supravadžajučy karcinkaj z turystyčnych miescaŭ.
Pra Litvu adznačajecca, što heta kraina ŭ XIV-XVI stahodździach była mahutnaj impieryjaj, jakaja daminavała nad značnaj častkaj Uschodniaj Jeŭropy, a tracinu rolika pra Polšču zajmajuć kadry ź Biełaviežskaj puščaj i zubrami. Biełarusi nie zastałosia ničoha akramia łapciaŭ, dranikaŭ i Savieckaha Sajuza.
Biełaruskija kamientatary byli ździŭleny i aburany takoj prezientacyjaj krainy. Biełaruś — adna z samych urbanizavanych krain u śviecie, zhodna z danymi AAN, u krainie 76% nasielnictva pražyvaje ŭ haradach, što supastaŭna z uzroŭniem krain Zachodniaj Jeŭropy (79%) i bolš, čym va ŭsich susiedziaŭ. A amal dvuchmiljonny Minsk pa nasielnictvie zamykaje dziasiatku najbujniejšych haradoŭ Jeŭropy, abychodziačy bolšaść jeŭrapiejskich stalic — i pry hetym Biełaruś prezientujecca dla anhłamoŭnych dziaciej jak adstałaja sialanskaja kraina.
«Aha, my ŭsie žyviom u vioscy, naš lubimy aŭtamabil — heta traktar, ale bolš za ŭsio nam padabajecca rabić staŭki na zubroŭ, chto chutčej prabiažyć. A jašče my jamo adnu bulbu, tamu što na ŭsio astatniaje ŭ nas alerhija», — iranizujuć biełarusy.
Mnohija paličyli, što pryčyna ŭ tym, što heta prosta staraja cacka z časoŭ, kali pra Biełaruś u śviecie ničoha nie čuli, ci to z pačatku 2000-ch, ci to ŭvohule 1980-ch.
Nasamreč hłobus davoli aktualny: na im adlustravanyja Čarnahoryja, jakaja zdabyła niezaležnaść u 2006 hodzie, i Paŭdniovy Sudan, jaki staŭ asobnaj krainaj u 2011 hodzie. Cacka dahetul vyrablajecca i jaje svabodna možna nabyć u internecie.
Vyrabam Magic Adventures Globe zajmajecca kampanija LeapFrog Enterprises z Kalifornii, jakaja śpiecyjalizujucca na navučalnych cacak i elektronicy dla dziaciej. Kampanija viadomaja svaimi praduktami, jakija dapamahajuć dzieciam navučacca praz hulniu: interaktyŭnyja knihi, płanšety, ałfavitnyja hulni, i, jak u hetym vypadku, interaktyŭnyja hłobusy ź videa.
Interaktyŭny hłobus z ałovačkam-styłusam musiŭ dapamahčy dzieciam va ŭzroście ad 5 da 10 hadoŭ daviedvacca pra krainy, kultury, žyvioł i movy.
Adukacyjnyja videa, jakija vyklikajuć stolki pytańniaŭ, byli stvorany dla hłobusa brytanskaj karparacyjaj BBC. Videa nie datavanyja, adnak na padstavie detalaŭ z asobnych rolikaŭ možna mierkavać, što jany byli stvorany ŭ kancy 2000-ch — pačatku 2010-ch hadoŭ.
Naprykład, u siužecie pra Rumyniju na budynkach užo visiać ściahi Jeŭrapiejskaha Sajuza, u jaki kraina ŭstupiła ŭ 2007 hodzie. U kadrach z Budapiešta častka budynka parłamienta znachodzicca ŭ ryštavańniach — restaŭracyja fasadaŭ, jak viadoma, praciahvałasia niekalki hadoŭ i zaviaršyłasia ŭ 2014 hodzie.
Kali b videa ni byli stvorany, Biełaruś ni ŭ poźniesaviecki čas, ni ŭ časy niezaležnaści nie vyhladała takim sielskim, adstałym «miadźviedžym kutom», jak pakazvaje amierykanski «mahičny hłobus».
«Naša Niva» — bastyjon biełaruščyny
PADTRYMAĆPamiatajecie vypusknika instytuta FSB, jaki raskatvaŭ pa Hrodnie sa ściaham Navarosii? Ciapier jon staŭ varšaŭskim biznesmienam29
Kamientary