U Saudaŭskaj Aravii pamior «śpiačy prync», jaki pravioŭ u komie 20 hadoŭ
Člen saudaŭskaj karaleŭskaj siamji Al-Valid ibn Chaled Al Saud trapiŭ u komu ŭ dalokim 2005 hodzie paśla surjoznaha DTZ u Łondanie, dzie prachodziŭ navučańnie ŭ vajskovaj vučelni. Pamior ža tolki ciapier, majučy 36 hadoŭ. Pra śmierć syna ŭ sacyjalnych sietkach paviedamiŭ jahony baćka, prync Chaled ibn Talal ibn Abdułaziz.
U 2005-m chłopcu było ŭsiaho 16 hadoŭ, a ŭ aŭtakatastrofie jon atrymaŭ vielmi mocnuju čerapna-mazhavuju traŭmu i krovaźlićcio ŭ mozh.
Z tych časoŭ jon znachodziŭsia ŭ komie i byŭ špitalizavany ŭ miedycynski centr imia karala Abduł-Aziza ŭ Er-Ryjadzie, dzie znachodziŭsia na aparacie žyćciezabieśpiačeńnia pad pastajannym nahladam daktaroŭ.
Usie hetyja hady baćka Al-Valida prync Chaled admaŭlaŭsia adklučać aparat, choć daktary niekalki razoŭ raili heta zrabić i zapeŭnivali, što šancaŭ vyžyć u chłopca niama.
«Kali b Boh chacieŭ, kab syn zahinuŭ u hetaj avaryi, jon by ciapier byŭ u mahile», — rašuča kazaŭ Chaled pra svajho syna, a maci chłopca, pryncesa Ryma bint Tałał, muža ŭ hetym padtrymlivała.
U 2019-2020 hadach navat źjaŭlalisia abnadziejlivyja naviny pra toje, što «śpiačy prync» nibyta pavarušyŭ rukoj i navat publikavalisia adpaviednyja videa. Čutki, što ŭ jaho stanie nazirajecca palapšeńnie, stali znoŭ pašyracca litaralna ŭ apošni čas, ale nijakich aficyjnych paćviardžeńniaŭ hetamu nie było. Siońnia ž jahonaje serca kančatkova spyniłasia.
Da trahičnaha dnia, jaki nazaŭsiody źmianiŭ i faktyčna skončyŭ jaho sapraŭdnaje žyćcio, małady Al-Valid maryŭ pra budučyniu, vartuju pradstaŭnika karaleŭskaj dynastyi. Jon abraŭ dla siabie vajskovuju karjeru i vučyŭsia ŭ prestyžnaj vajskovaj vučelni ŭ Vialikabrytanii.
Da trahiedyi pra asabistaje žyćcio Al-Valida amal ničoha nie było viadoma. U adroźnieńnie ad inšych karaleŭskich asobaŭ, jon redka traplaŭ u zahałoŭki ŚMI, a jahonaje fota amal nie źjaŭlałasia ŭ publičnaj prastory.
Al-Valid ibn Chaled Al Saud byŭ prapraŭnukam Abduł-Aziza ibn Abdurachmana Al Sauda (1877-1953) — zasnavalnika i pieršaha karala Saudaŭskaj Aravii. Nastupnyja šeść karaloŭ hetaj krainy, uklučajučy i ciapierašniaha 89-hadovaha Sałmana ibn Abduł-Aziza Al Sauda — rodnyja syny Abduł-Aziza, jaki mieŭ ad bolš čym 20 žonak 45 synoŭ i bolš za 20 dočak. Tamu karaleŭskaja siamja Saudaŭskaj Aravii — vielmi vialikaja i razhalinavanaja, jana ŭklučaje tysiačy čałaviek.
Stała viadoma, dzie pracuje favarytka Łukašenki Uładlena Zajcava19
Kamientary