Fłarencyju nazvali najlepšym horadam Jeŭropy dla turyzmu

Pavodle viersii premii World's Best Awards 2025, jakuju pravodzić časopis «Travel + Leisure», Fłarencyja pryznanaja najlepšym horadam Jeŭropy. Heta štohadovaje apytańnie čytačoŭ, u jakim jany vybirajuć svaje ŭlubionyja turystyčnyja napramki pa ŭsim śviecie, piša vydańnie Delfi.

Stalica Taskany zaniała 11-je miesca ŭ ahulnym zaliku — samaje vysokaje siarod usich jeŭrapiejskich haradoŭ. Pieršuju trojku skłali mieksikanskija San-Mihiel-de-Aljende i Aachaka, a taksama Tokia.

Choć pieršuju dziasiatku rejtynhu pieravažna zaniali harady Łacinskaj Amieryki i Azii, u śpisie šmat papularnych jeŭrapiejskich napramkaŭ, što pryciahnuli čytačoŭ svajoj kulturaj, kuchniaj i histaryčnym šarmam.

Italjanskaja trojka

Pavialičyć

Rejtynh składzieny na padstavie amal 180 000 vodhukaŭ čytačoŭ, jakija aceńvali harady pa šaści kryteryjach: słavutaści, kultura, kuchnia, haścinnaść, šopinh i suadnosiny ceny i jakaści. Italija stała adzinaj jeŭrapiejskaj krainaj, pradstaŭlenaj u top-25 tryma haradami:

• Fłarencyja (11-je miesca)

• Rym (18-je)

• Sijena (23-je)

Usie jany atrymali vysokija acenki za svaju viečnuju pryhažość, vydatnuju kuchniu i bahatuju kulturu — ad staražytnych saboraŭ i charčeŭniaŭ-tratoryj da vuzkich brukavanych vulic, napoŭnienych miascovym žyćciom.

Pavodle turystyčnaj statystyki, Italija stała čaćviortaj najbolš naviedvalnaj krainaj śvietu ŭ 2024 hodzie, pryniaŭšy bolš za 71 miljon zamiežnych haściej.

Fłarencyja praciahvaje začaroŭvać padarožnikaŭ svajoj kamiernaj atmaśfieraj, suśvietna viadomym mastactvam i soniečnymi płoščami. Ad Batyčeli ŭ halerei Uficy da terakotavaha kupała Fłarentyjskaha sabora — horad prapanuje sapraŭdnuju kalekcyju šedeŭraŭ u miežach piešaj dastupnaści. Tradycyjnyja restaracyi, mnohija ź jakich pieradajucca ŭ spadčynu, tolki ŭzmacniajuć pačućcio pazačasovaści.

Rym prapanuje toje, čaho niama amal ni ŭ adnym inšym horadzie: žyvuju historyju na niekalkich uzroŭniach. Viečny horad złučaje antyčnyja ruiny i vuličnuju spantannaść, što asabliva ceniać padarožniki. Sioleta tut prachodzić Jubilejny hod — maštabnaja padzieja, jakaja źbiraje katolikaŭ z usiaho śvietu raz na 25 hadoŭ. Jon supaŭ ź śmierciu Papy Franciška ŭ krasaviku.

Pavialičyć

Sijena — jašče adzin bryljant Taskany — zachavała vydatny siaredniaviečny vyhlad. Z 1995 hoda horad uniesieny ŭ Śpis Suśvietnaj spadčyny JUNIESKA. Hatyčnyja viežy, cahlanyja budynki XII stahodździa, žyvyja restarany i znakamitaja Pjacca del Kampa, dzie dva razy na leta prachodziać skački Sijenskaje Palia, stvarajuć adčuvańnie padarožža ŭ minułaje.

Inšyja lidary: Ispanija i Turcyja

Paśla Fłarencyi adrazu dva miescy zaniała Ispanija: Sievilja (12-je miesca) i Hranada (13-je).

Abodva harady atrymali vysokija acenki za histaryčnuju spadčynu i atmaśfiernyja staryja kvartały.

Stambuł zaniaŭ 14-je miesca. Horad, što jadnaje Jeŭropu i Aziju, uražvaje raznastajnaj kuchniaj, bahataj historyjaj i ŭnikalnym hieahrafičnym stanoviščam, dziakujučy čamu ličycca adnym z samych zachaplalnych miescaŭ u śviecie.

Sievilja — uvasableńnie andałuskaha šarmu: fłamienka, što hučyć na brukavanych vulicach, nasyčanaje načnoje žyćcio i manumientalnaja architektura.

Pavialičyć

Hranada, kala padnožža Śjera-Nievady, vyhladaje bolš strymanaj, ale nie mienš čaroŭnaj. Alhambra — fartecyja z fantanami, sadami i vytančanaj isłamskaj architekturaj — adna z najvialikšych słavutaściej Jeŭropy. Ale i vuzkija zavułki z tapas-barami dadajuć joj admietnaści.

Francyja — za bortam rejtynhu

U śpisie adsutničaje jašče adna viadomaja jeŭrapiejskaja kraina — Francyja. Niahledziačy na toje, što jana zastajecca samaj naviedvalnaj krainaj u śviecie (bolš za 100 młn turystaŭ štohod), ni adzin jaje horad nie trapiŭ u top-25.

Choć Francyja i zastajecca stabilna papularnaj, takaja adsutnaść, mahčyma, śviedčyć pra źmieny ŭ hustach čytačoŭ, pieravažna z ZŠA. Pieravaha ciapier addajecca mienšym, spakojnym haradam ź lepšymi suadnosinami koštu i jakaści i ź mienšym upłyvam masavaha turyzmu, čym u miehapolisaŭ nakštałt Paryža.

Apošnim jeŭrapiejskim horadam u rejtynhu staŭ partuhalski Portu — 24-je miesca. Jaho imklivaje raźvićcio ŭ turyźmie taksama śviedčyć pra novyja tendencyi.

• 3
• 1
• 2
• 0
• 0
• 1
• 0
• 0