Hanna Bond krytykuje, deputatka Mirončyk-Ivanova śpiavaje pra «krošku»: u Minsku z anšłaham prajšoŭ kancert «Ruki vvierch»
Učora na «Minska-arenie» adbyŭsia pieršy z čatyroch zapłanavanych kancertaŭ rasijskaha hurta «Ruki vvierch». Heta rekord: upieršyniu niechta z artystaŭ zmoh pradać amal 60 tysiač kvitkoŭ. Pahladzieli, jakimi ŭražańniami dzielacca biełarusy ŭ sacsietkach.
Niechta navat pajšoŭ na kancert z kalehami i pakazvaŭ u tyktoku, jak maluje płakat «Siorieža, my — tvoi kroški» razam.
A chtości pryznavaŭsia ŭ sacsietkach, što 20 hadoŭ maryŭ trapić na kancert «Ruki vvierch».
Tyja, chto chacieŭ być zusim blizka da sceny, pryjechali ŭ «Minsk-Arenu» vielmi zahadzia. Adna z žančyn, jakaja nabyła kvitok u fanzonu, vykłała videa, jak biažyć, kab zaniać dobraje miesca. Žartujučy, jana nazvała heta «Hałodnymi hulniami». U kamientaryjach rastłumačyła, što ŭ zali apynułasia ažno za paŭtary hadziny da pačatku kancerta.
Błohierka Hanna Bond, choć i tančyła aktyŭna, ale ž raskrytykavała kancert:
— Čałaviek prosta paviesiŭ ekran, nijakich dekaracyj, balet ź Biełarusi (8 čałaviek maksimum) — i ŭsio. Bačna, što vychodzić śpiavaje pad fanahramu, enierhii minimalna, praŭda. Hraje na nastalhii: «Vy — majo dziacinstva, junactva…». Kali ty hraješ na nastalhii naroda, zrabi kvitki pa 10 dalaraŭ, a nie pa 50-100 i vyšej (nasamreč, kvitki kaštavali ad 65 da 297 rubloŭ — NN). Akiej? Akiej. Tady budzie sumlenna.
Nie zrazumieła Hanna toje, što DJ Hruvu dali ažno 30 chvilin pasiarod kancertu — bo navošta jon, kali ludzi pryjšli na «Ruki vvierch». Ale ŭ vyniku błohierka pryznałasia, što dydžej spadabaŭsia joj bolš za sam hurt.
Raskrytykavała Hanna i doŭhija paŭzy padčas kancertu, kali Siarhiej Žukaŭ kazaŭ pafasnyja pramovy — błohierka paraŭnała heta z vystupami tamady na viasielli.
— Rychtujciesia, u vas napieradzie jašče try kancerty, ale ja liču, što heta niejkaje na***łava. Mianie zaprasili, ja kvitki nie kuplała, ale ŭsio roŭna.
U instahramie błohierki mierkavańni kamientataraŭ padzialilisia: niechta pryznaŭsia, što całkam zhodny, a niechta naadvarot paličyŭ, što Hanna prydzirajecca i ŭsio było cudoŭna.
A voś śpiavak Ivan Zdaniuk, jaki niadaŭna damoviŭsia, kab jaho pieśnia hrała ŭ prybiralni adnaho sa staličnych kafe, zastaŭsia całkam zadavoleny. Naŭrad ci dla 26-hadovaha artysta «Ruki vvierch» asacyirujucca ź dziacinstvam, ale ž pieśniu «18 mnie užie» jon nazvaŭ chitom usich časoŭ.
Stajaŭ Ivan niedzie la pulta hukarežysiora — vidavočna, Zdaniuk taksama nie płaciŭ za kvitok. Jon apublikavaŭ u storys videa, jak šmattysiačnaja zała «Minsk-areny» padpiavaje Žukavu: «Tolki pasłuchajcie: 15 tysiač čałaviek śpiavali tak uvieś kancert». Salista «Ruki vvierch» biełarus nazyvaje lehiendarnym i pachvaliŭsia, što zmoh ź im sfatahrafavacca.
Jana Baranoŭskaja — madel i siabroŭka adnoj z favarytak Łukašenki Uładleny Zajcavaj — ščaślivaja tančyła pad «Čužije huby tiebia łaskajut».
Lohkaatletka i deputatka Nastaśsia Mirončyk-Ivanova taksama pachvaliłasia padpisčykam u instahramie, što viečar piatnicy pravodzić na kancercie «Ruki vvierch». U leapardavym pinžaku jana z zamiłavańniem padpiavała pieśni «Kroška maja» i vyhladała całkam zadavolenaj žyćciom.
U aŭtobusach, jakija razvozili naviedvalnikaŭ kancerta, atmaśfiera była viasiołaja: niahledziačy na toje, što stajać prychodziłasia litaralna adzin na adnym, ludzi śpiavali choram.
Hurt «Ruki vvierch» staŭ pieršym, jaki maje sabrać «Minsk-arenu» čatyry razy zapar. Minuły rekord naležaŭ Anna Asti, jakaja zmahła zrabić heta trojčy.
Nahadajem: z samaha pačatku poŭnamaštabnaj vajny va Ukrainie Siarhiej Žukaŭ, salist hurta «Ruki vvierch», abraŭ pazicyju «ja pa-za palitykaj».
U sakaviku 2022 hoda artyst apublikavaŭ u svaim instahramie post pra vajnu z pasyłam «nie ŭsio tak adnaznačna»: «Ja, jak i ŭsie vy, hladžu za tym, što adbyvajecca. I baču i viedaju toje samaje, što i vy. Ja nie palityk, nie žurnalist, nie palitołah. Ja — muzyka. Tak, u mianie vialikaja aŭdytoryja, ale heta tym bolš aznačaje vialikuju adkaznaść. Za kožnaje majo słova. Ciapier stolki valicca infarmacyi, z usich bakoŭ, što prosta brać i raspaŭsiudžvać jaje, nie majučy mahčymaści pravieryć, — ja tak nie budu rabić… Adčuvańnie, što ŭsie adno adnaho nienavidziać. Chejt, abrazy, nianaviść. Tak nielha! Nu my ž usio ŭ pieršuju čarhu ludzi! Spyniciesia, nu praŭda!».
Bolš za ŭsio tady Siarhieju było škada rasijskich paralimpijcaŭ, jakich adchilili ad udziełu ŭ mižnarodnych spabornictvach.
Adnak usiaho praź niekalki tydniaŭ hramadzianskaja pazicyja Siarhieja Žukava stała vidavočnaj. Jon vystupiŭ u Łužnikach na kancercie ŭ honar akupacyi Kryma.
Potym Siarhiej Žukaŭ trapiŭ u skandał praz toje, što ŭ jaho bar «Ruki vvierch» u Krasnadary nie puścili čałavieka ŭ kamuflažy, jaki nazyvaŭ siabie ŭdzielnikam vajny. Artyst publična vybačyŭsia i zajaviŭ, što ŭ jaho bary «abaroncam ajčyny zaŭsiody rady».
Znajšoŭsia hurt, jaki płanuje sabrać «Minsk-Arenu» čatyry razy zapar. I ŭžo amal zrabiŭ heta
Chedłajnieram apošniaha zvanka ŭ Minsku staŭ niaŭdały ŭdzielnik «Doma-2». Chto taki Aleh Majami?
Biełarusy Varšavy masava pajšli na kancert Valeryja Mieładze
«Najhoršy kancert u maim žyćci»: biełaruska paskardziłasia na vystup «Ivanušak» u Minsku i nabrała 2 miljony prahladaŭ
U Polščy aryštavali byłoha kiraŭnika biełaruskaha «Paspalitaha rušeńnia» — pahražaje 10 hod za narkotyki26
Kamientary
Chočaš vieźci artysta z Rasiei - zapłaci 100%, zrabi danat i tady moža dazvolim vystupać.