Ryełtar: U paraŭnańni ź minułym hodam arenda žylla padaražeła na 20—30%

U čym pryčyna rostu cen i što budzie dalej, raspaviała Onliner.by načalnica adździeła arendy hrupy kampanij «Tvaja stalica» Marharyta Pačyckaja.

— Za minuły hod košt arendnaha žylla ŭ biełaruskaj stalicy vyras na 10—15%, — kaža Marharyta Pačyckaja. — Hetu infarmacyju my davali ŭ mai 2025 hoda. Možna skazać, što ŭ paraŭnańni z majem ceny pavialičylisia jašče na 10—15%. Dalar užo paśpieŭ istotna patańnieć, i košt dla niekatorych arandataraŭ adpaviedna źmianiŭsia.

Mahčyma, padaražańnie abumoŭlena jašče i tym, što «babuliny» varyjanty z kožnym hodam «vymyvajucca» z rynku. Usio bolš źjaŭlajecca novabudoŭlaŭ, i, adpaviedna, raście popyt na ich.

Arandatar maładzieje, i ŭ pryjarytetach u jaho akuratnyja sučasnyja kvatery z poŭnaj kamplektacyjaj.

Pavodle danych śpiecyjalistaŭ adździeła arendy ahienctva «Tvaja stalica», košt adnapakajovych kvater u starym žyllovym fondzie startuje ad $300. Za zvyčajnuju «dvušku» prosiać ad $350. Meblavanyja «trojki» — ad $400.

Pry pryvabna nizkaj canie za arendu «bonusam» moža być adsutnaść ramontu ci mebli. A voś u śviežych novabudoŭlach, jakija znachodziacca ŭ samych papularnych rajonach, zusim inšyja ceny. U topie ŭ arandataraŭ ciapier «Minsk-Mir», «Majak Minska», rajon Hrušaŭka i «Novaja Baravaja». U hetych łakacyjach šmat kamfortnych kvater z dyzajnierskimi interjerami, z poŭnym naboram bytavoj techniki, adpaviedna, i košty na ich davoli vysokija. Košt takich «adnušak» startuje ad $350 i dasiahaje $500.

— Hety siehmient zapatrabavany ŭ zamiežnych studentaŭ, IT-śpiecyjalistaŭ, mieniedžaraŭ z dobrym zarobkam, — udakładniaje ryełtar.

Darečy, mienavita «adnuški» — samy papularny ŭ arandataraŭ varyjant na rynku. A što nakont premijalnych kvater? Tych samych, jakija časta traplajucca ŭ padborkach žylla z krutymi interjerami i zaškalvajučym koštam arendy? Pavodle słoŭ śpiecyjalistki, ź imi ŭsio cudoŭna. Popyt na ich kruhłahadovy, praŭda, havorka zusim nie pra studentaŭ i zvyčajnych rabočych.

Na doŭhaterminovyja terminy takija prapanovy razhladajuć biełaruskija i zamiežnyja biznesmieny, pradstaŭniki dypmisij, pryjezdžyja supracoŭniki bujnych kampanij.

— Dla hetaj katehoryi arandataraŭ važnyja zakrytaja terytoryja, padziemny parkinh, dyzajnierski ramont, łakacyja. «Levada», Depo, D3, «Alimpik park», mikrarajony Drazdy i Lebiadziny, rajon vulicy Staražoŭskaj i praśpiekta Pieramožcaŭ, vulica Jaźminavaja i h.d. — heta adny z samych zapatrabavanych łakacyj u hetym siehmiencie. Košt takich abjektaŭ pačynajecca ad $1000.

Dla tych, chto addaje pieravahu zaharadnaj nieruchomaści, važnyja nastupnyja kryteryi: niepasrednaja blizkaść da Minska, raźvitaja infrastruktura pasiołka, navakolnaje asiarodździe, najaŭnaść łaźni, saŭny, basiejna, malaŭničyja miaściny, les, vadajom u niepasrednaj dastupnaści.

Pryblizna praź miesiac pačniecca novy navučalny siezon u staličnych studentaŭ. Zvyčajna heta davoli haračy čas, kali arendnaje žyllo raźlatajecca jak haračyja piražki. Adnak Marharyta ŭpeŭniena: u hetym hodzie studencki pieryjad projdzie spakojna:

— Nabližeńnie novaha navučalnaha hoda zaŭsiody adbivałasia na rynku aktyŭnym popytam z boku studentaŭ. Adnak apošnija hadoŭ piać zapytaŭ na žyllo ad hetaj katehoryi arandataraŭ stanovicca mienš. Ja dumaju, što heta abumoŭlena pavieličeńniem kolkaści internataŭ i miescaŭ u ich. Na dadzieny momant studenty-biudžetniki ŭžo vyznačylisia z vybaram VNU, a ŭ płatnikaŭ jašče jość takaja mahčymaść. Tak što situacyja jašče moža źmianicca. Budziem sačyć za joj.

• 0
• 0
• 1
• 2
• 0
• 0
• 0
• 0