Žyhar — Kraŭcovu: Ja tabie asabista apłaču kvitok da Minska, tam i damaŭlajsia z Łukašenkam!
Uładzimir Žyhar i Ivan Kraŭcoŭ horača paspračalisia na kanfierencyi ŭ Varšavie.
Padčas kanfierencyi «Novaja Biełaruś» u Varšavie prajšło niekalki debataŭ. Adny ź ich — pra sankcyi. Dyskutavali sakratar Kaardynacyjnaj rady i člen kamandy Babaryki Ivan Kraŭcoŭ i Uładzimir Žyhar z «Biełpoła».
Kraŭcoŭ napačatku adznačyŭ, što jon nie suprać sankcyj jak instrumienta, ale maje pytańni. Pieršaje — jon nie zrazumieŭ, na što pracujuć sankcyi. Druhoje — pytańnie publičnaj adkaznaści, bo ŭ sacyjałahičnych apytańniach bolšaść vykazvajecca suprać sankcyj. «Sankcyi jak chimijaterapija — bjuć u asnoŭnym pa ludziach».
Treciaje jaho pytańnie było źviazana ź pieramovami nakont pieramirja pa vajnie Rasii va Ukrainie.
«Vy časta kažacie, što asnoŭnyja sankcyi ŭviedzieny za saŭdzieł Biełarusi ŭ rasijskaj ahresii. U mianie takoje pytańnie: ciapier, kali budzie padpisana pieramirje i sankcyi buduć zdymacca z Rasii, to jany adpaviedna (kali ŭ nas jość harmanizacyja sankcyj, da jakoj tak imknulisia, a ja zaŭsiody byŭ suprać harmanizacyi, kazaŭ, što treba raździalać sankcyjnyja režymy) buduć źniaty i ź Biełarusi? I my atrymlivajecca hublajem hety instrumient?»
Žyhar u adkaz adznačyŭ, što, viadoma, chaciełasia b, kab sankcyi pracavali lepš i prymalisia chutčej. Ale jon zadajecca pytańniem: ci mnohija ŭ demsiłach pracavali nad sankcyjami?
Pa jaho słovach, ciapier 150 dziaržaŭnych i pryvatnych pradpryjemstvaŭ pracujuć na rasijski vajskova-pramysłovy kompleks.
«Čaho choča dabicca Łukašenka? Heta 100-pracentnaja łakalizacyja vytvorčaści ŭzbrajeńnia za hrošy ruskich na terytoryi Biełarusi. Ale, navat vykarystoŭvajučy Kitaj, Pakistan, Iran, jany nie mohuć dabicca pa tych ci inšych kirunkach hetaj łakalizacyi. Jany vymušany šukać niejkija kamplektujučyja, raschodnyja materyjały ŭ Jeŭropie. I sankcyi dziejničajuć na hetu hrupu».
U Kraŭcova spytali: raz jon krytykuje, to što prapanuje ŭzamien?
Toj zaŭvažyŭ, što ES čamuści nie nakładaje sankcyi na Kazachstan i Turcyju, jakija dapamahajuć abychodzić ich Biełarusi. A prapanova jaho była takaja:
«Mnohija krainy Jeŭrasajuza nie padtrymlivajuć amierykanskija namahańni pa pieramovach z režymam. Jany nie chočuć u heta ŭviazvacca, jany ličać, što dobra zaniać mocnuju maralnuju pazicyju i prosta čakać. Atrymajecca ŭ amierykancaŭ — dobra, my padklučymsia. Nie atrymajecca — nu dobra, my ničym nie ryzykavali. A ja kažu: treba ryzykavać. Ciapier vykarystoŭvać tyja nazapašanyja instrumienty, jakija jość na stale, i namahacca vieści pieramovy ab tym, kab spynić sistematyčnyja represii».
Kraŭcoŭ na debatach zadaŭ pytańnie Žyharu:
«Kali budzie toj samy momant, kali my pačniem vykarystoŭvać tyja cudoŭnyja sankcyi jak instrumient, ci my jaho da Novaha hoda zachoŭvajem?»
«A kali vialikaja hrupa pačnie stavić pytańnie spynieńnia represij jak abaviazkovaje? Tamu što źmianiać adnych ludziej na inšych u abmien na sankcyi… Vy vyznačyciesia, vam šašački ci jechać», — paryravaŭ Žyhar.
Były siłavik dadaŭ, što sankcyi nie zdymajucca i nie ŭvodziacca pa ščaŭčku. «Kab pravieści MZKC, my pracavali 8 miesiacaŭ».
Tamu, zaŭvažyŭ jon, kali chtości kaža, što sankcyi treba zdymać, heta tarmazić praces.
«Ivan Kraŭcoŭ zaminaje Žyharu pracavać», — pairanizavaŭ Kraŭcoŭ.
«Ty mnie hłyboka abyjakavy. Ja ž ciabie tamu i zabrakavaŭ [u fejsbuku]», — adkazaŭ Žyhar.
Žyhar u svaju čarhu spytaŭ: a što kankretna Kraŭcoŭ zrabiŭ pa cisku na Łukašenku?
«Ja nie zajmajusia ciskam», — adkazaŭ toj.
«Zhodny! — padchapiŭ Žyhar pad apładysmienty publiki. —
I ŭ hetym naša roźnica. Jość tyja, chto pracuje, starajecca, robić choć niešta, a jość tyja, chto biehaje i kaža: nie treba, heta ŭsio lišniaje, z Łukašenkam možna damovicca. Ja tabie asabista apłaču kvitok da Minska, tam i damaŭlajsia!»
Liza Prakopčyk, moładzievaja aktyvistka i vice-śpikierka Kaardynacyjnaj rady, vykryknuła Žyharu ź miesca, što dumała, što prysutnyja zmahańniem za Biełaruś zmahajucca, a nie ciskam. A paśla kryknuła «ACAB»
(abrevijatura all cops are bastards — «usie palicyjanty — vyradki»).
Kraŭcoŭ u kancy dyskusii pažartavaŭ, što rady, što dla častki apazicyi vystupaje takim razdražnialnym faktaram.
-
Karpiankoŭ abvinavaciŭ apazicyju ŭ «raskładańni imidžu milicyjaniera jak abaroncy»
-
«Za noč my stracili ŭsio». Trahiedyja źniščyła 17 hadoŭ pracy fiermieraŭ — zhareli karovy ź cialatami
-
Były vajennapałonny Butkievič: Biełaruskija turmy možna paraŭnać ź vielmi žorstkimi ŭmovami ŭtrymańnia ŭkrainskich pałonnych u Rasii
Cichanoŭskaja pra muža: Uvieś jahony śviet pierakuleny22
Kamientary
Svaimi judavymi hrošami chaj apłočvaje ŭ carkvie źničku zamović za vykupleńnie hrachoŭ!