Siońnia rasiejcy zabaraniajuć uvoz vina, zaŭtra zabaroniać uvoz cukru. Kali ž kapnuć jašče hłybiej, to heta pytańnie koštaŭ na haz, adzinaj valuty, kanstytucyjnaha aktu. Vino – tolki pryvatny momant.
Nie paśpieŭ jak śled adhareć u Rasiei skandał, źviazany z zabaronaj na prodaž małdaŭskich i hruzinskich vinaŭ, jak hałoŭny dziaržaŭny sanitarny ŭrač hetaj krainy Hienadź Aniščanka zajaviŭ, što ŭ najbližejšaj budučyni moža być zabaronieny i ŭvoz vin ź Biełarusi. U rasiejskich specyjalistaŭ «uźnikli pytańni» adnosna jakaści biełaruskaj pradukcyi.
I kali sprava z małdaŭskim i hruzinskim vinom nabyvała vidavočnyja palityčnyja matyvy, to jakich metaŭ choča dasiahnuć rasiejski bok, zabaraniŭšy biełaruskaje vino, nieviadoma. U Biełarusi amal nie raście vinahradnik – a bolšaść vina hatujecca z pryvaznoj z Małdovy syraviny, – tamu surjoznaha ŭdaru dla ekanomiki nia budzie.
Pamočnik staršyni pa suviaziach z hramadzkaściu kancernu «Biełdziaržcharčpram» Piotr Kavunoŭ kaža, što hetaje pradpryjemstva sioleta naohuł nie handlavała ni vinom, ni harełkaj z Rasiejaj. Bo ź vinom nie vytrymlivajecca kankurencyja ŭ canie, a z harełkaj – niama akcyznaj marki. Kavunoŭ miarkuje, što najchutčej tut havorka viadziecca pra niejkaju partyju «čarniła», što kantrabandnym šlacham trapiła ŭ jakuju-niebudź Smalenščynu z susiedniaj Mahileŭskaj vobłaści. «U Rasiei ŭvohule amal nie zastałosia vinnych zavodaŭ, usio staić u zapuścieńni, tamu zusim nia dziŭna što niechta ciahaje lesam ź Biełarusi «byrła». Heta vyhadnaja sprava, na jakoj možna dobra zarabić, – zaznačaje P.Kavunoŭ. – Kali ž vyśvietlicca, što niechta pastaviŭ niajakasny pradukt u Rasieju, to hetyja ludzi naturalna pavinny być pakaranyja».
Na mienskim zavodzie vinahradnaha vina i na klimavickim likioraharełačnym zavodzie nam paviedamili, što nia majuć handlu z Rasiejaj, choć i planavali ŭ najbližejšy čas jaho pačać. Zaraz ža jany niapeŭnyja, što zdarycca ŭ hetaj sytuacyi.
Ekanamist Źmicier Babicki kaža, što zabarona na ŭvoz vina ŭ Rasieju nia stanie fatalnaj dla biełaruskaj ekanomiki, jana litaralna adabjecca na niekalkich sotniach čałaviek, što pracujuć na zavodach, jakija majuć handal z Rasiejaj. «Naša vinnaja pramysłovaść nadta nievialikaja ŭ paraŭnańni z Małdovaj i Hruzijaj».
Palitolah Alaksandar Kłaskoŭski raić razhladać pytańnie z mahčymaj zabaronaj u šyrejšym kantekście. «Idzie mytnaja vajna. Niadaŭna biełaruski bok zatrymaŭ na miažy rasiejskija fury ź niepadakcyznym tavaram. Siońnia rasiejcy zabaraniajuć uvoz vina, zaŭtra jany, mahčyma, zabaroniać uvoz cukru ci niečaha inšaha, – kaža A. Kłaskoŭski. – Kali ž kapnuć jašče hłybiej, to heta pytańnie koštaŭ na haz, adzinaj valuty, kanstytucyjnaha aktu i h.d. A vino – tolki pryvatny momant».
Z usiaho vidać, Rasieja sapraŭdy vypracavała stratehiju «vinnaha teraryzmu» dla niepadkantrolnych joj krainaŭ SND, ale ŭ biełaruskim vypadku jana nia budzie mieć amal nijakich nastupstvaŭ. Tamu i hety krok Rasiei vyhladaje vielmi dziŭnym. Čakajem inšych zabaronaŭ.
Kamientary