USU «padhryzaje vierchavinu ŭklińvańnia i ŭ cełym zapiačatali asnoŭnuju častku zony praryvu, jakaja pieratvaryłasia ŭžo ŭ paŭnavartasny apieratyŭna-taktyčny miašok».
U siaredzinie žniŭnia rasijskija šturmavyja častki ździejśnili praryŭ ukrainskaj linii abarony ŭ rajon horada Dabrapolle na poŭnač ad Pakroŭska. Paviedamlałasia pra davoli hłybokaje — da 10-12 km, pavodle niekatorych źviestak — da 15—18 km — uklińvańnie va ŭkrainskuju abaronu i pahrozu dalejšaha prasoŭvańnia rasijskich vojskaŭ.
Adnak ukrainskaja armija zdoleła nie tolki spynić prasoŭvańnie, ale, jak śviedčyć niadaŭniaje paviedamleńnie ŭ telehram-kanale «Fiłołah u zasadzie» Śviatasłava Holikava, pieratvaryć hety praryŭ u pastku dla rasijskich šturmavikoŭ, uziaŭšy ich u tak zvany «apieratyŭna-taktyčny miašok».
Analizujučy apieracyju, aŭtar adznačaje pieršapačatkovuju jaje niebiaśpiečnaść.
Prablema ŭ tym, što hety praryŭ byŭ padobny da doŭhaha i vuzkaha «kalidora»: kala asnovy jaho šyrynia składała kala 7 km, a dalej jon zvužaŭsia da 4 km.
Aŭtar adznačaje, što takija praporcyi vielmi ryzykoŭnyja. Pavodle vajskovaj navuki, dla biaśpiečnaha prasoŭvańnia na takuju hłybiniu šyrynia praryvu pavinna być značna bolšaj (chacia b 10 km), inakš fłanhi (baki) hetaha «kalidora» stanoviacca vielmi ŭraźlivymi.
Jak jon tłumačyć, ideja, chutčej za ŭsio, była ŭ tym, kab paśla chutkaha praryvu nieadkładna pašyryć zachoplenuju terytoryju znutry i abaranić fłanhi z dapamohaj raźviedki i ŭdarnych dronaŭ. Adnak, jak piša aŭtar, hetaha zrabić nie ŭdałosia. Zamiest taho, kab iści napierad i pašyrać płacdarm, padmacavańnie było vymušanaje adrazu ŭstupić u boj, adbivajučy ŭdary ŭkrainskich sił pa bakach hetaha vuzkaha «kalidora».
«Heta była taja samaja situacyja, u jakoj raźvićcio pośpiechu ŭ krytyčnaj stupieni zaležała ad maksimalna chutkaha zadziejničańnia mabilnych śpiecyjalizavanych raźviedvalna-ŭdarnych padraździaleńniaŭ.
Miž tym realizavać zabieśpiačeńnie fłanhaŭ uklińvańnia raźviedvalna-ŭdarnymi konturami nie ŭdałosia, i dadatkovyja naziemnyja siły zamiest raźvićcia pośpiechu akazalisia zadziejničanyja na adbićci kontratak praciŭnika pad asnovu zony praryvu z rubiaža Novaje Šachava — Nikanoraŭka na zachodnim fasie i z boku Uładzimiraŭki na ŭschodnim».
Skarystaŭšysia z hetaj uraźlivaści, ukrainskija vojski pačali kontratakavać fłanhi rasijskaha vystupu. Choć kala asnovy praryvu hetyja ataki ŭdałosia strymać, napieradzie situacyja stała krytyčnaj. Sproba rasijan prasunucca dalej, da stratehična važnaj trasy Dabrapolle — Kramatorsk, ciapier vyhladaje jak čystaja avantura, bo padtrymlivać ahniom tak daloka vojski ŭžo niemahčyma.
«Sprobu fizičnaha pierachopu trasy Dabrapolle — Kramatorsk u abstanoŭcy, što skłałasia, užo całkam možna nazvać avanturaj. Na takuju adlehłaść taktyčnym srodkam dystancyjnaj padtrymki daciahvacca ŭžo prablematyčna, a zavodzić ich hłybiej u zonu praryvu nie dazvalaje jaje niepašyranaja šyrynia.
Praciŭnik padhryzaje vierchavinu ŭklińvańnia i ŭ cełym zapiačataŭ asnoŭnuju častku zony praryvu, jakaja pieratvaryłasia ŭžo ŭ paŭnavartasny apieratyŭna-taktyčny miašok».
Inšyja rasijskija Z-błohiery nie zhadvajuć Dabrapolle i pieraklučylisia na padziei, jakija adbyvajucca na inšych častkach frontu.
Pra mahčymaść akružeńnia rasijskich vojskaŭ piša ŭkrainski vajskovy ahladalnik Kanstancin Mašaviec. Pavodle jaho danych na 25 žniŭnia, USU ŭziali pad kantrol klučavyja nasielenyja punkty na fłanhach rasijskaha vystupu, u pryvatnaści, Novaje Šachava i Zapaviednaje.
Ukrainskija vajskoŭcy taksama vycisnuli akupantaŭ z pazicyj kala trasy Dabrapolle — Kramatorsk. Jak adznačaje ahladalnik, hetyja kontrataki stvarajuć pramuju pahrozu akružeńnia dla padraździaleńniaŭ rasijskaj 51-j ahulnavajskovaj armii (raniej 1-y armiejski korpus «DNR»), jakija apynulisia ŭ hetym praryvie na poŭnač ad linii Zapaviednaje — Majak — Uładzimiraŭka.
Rytu Dakotu abvinavacili, što jana terminova raspradała nieruchomaść u Rasii amal na $2 miljony. Jana adkazała8
Kamientary