«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie
Prapahandyst Ihar Tur pravodzić viečary ŭ dyjałohach z apanientami režymu. Voś niekatoryja cytaty.
Ihar Tur — adzin z samych zaŭvažnych prapahandystaŭ novaha pakaleńnia, tych, chto darvaŭsia da efiru paśla 2020 hoda. Tur nie małady talent, jamu ŭžo 36 hadoŭ. Prosta raniej u jaho nie atrymlivałasia vyjhrać kankurencyju, a paśla represij i masavych zvalnieńniaŭ akazałasia, što na fonie astatnich i jon hladzicca na apuściełaj teleprastory adnosna jarkaj zorkaj.
Čym Tur admietny, aproč karjeryzmu?
Blizkaściu da KDB. Mienavita jamu daručajuć ahučvać kadebisckija siužety z kampramatam na apazicyju.
Entuzijazmam, kali možna tak vykazacca. Mienavita Tur uziaŭ na siabie misiju tłumačyć prostaj movaj rašeńni Łukašenki. Pa ščyraści, reč ryzykoŭnaja — pamyłka moža kaštavać doraha.
Mienšaj kryvažernaściu. Tur ličyć siabie intelektuałam — i na fonie Ryhora Azaronka ci Jaŭhiena Pustavoha, badaj, niebiespadstaŭna. Vykazvańni Tura cyničnyja, chłuślivyja, kolkaść fejkaŭ hihanckaja — adnak u efiry jon nie skatvajecca da adkrytych abraz i nie zaklikaje da źniščeńnia ludziej.
Aproč taho, Turu padabajecca bavić čas u apazicyjnych čatach — pieradusim u čacie «Tolki refarmatary i refarmatarki».
Čat «Tolki refarmatary i refarmatarki» byŭ stvorany kolišnim pres-sakratarom Kaardynacyjnaj rady Antonam Radniankovym. Heta jaho razam ź Ivanam Kraŭcovym i Maryjaj Kaleśnikavaj u vieraśni 2020 hoda vyvozili ź Biełarusi, kali Maryja parvała pašpart i zastałasia ŭ krainie. Ciapier u čacie kala 630 udzielnikaŭ, adnak aktyŭnyja tolki niekalki dziasiatkaŭ. Čat pryznany «ekstremisckim».
«Naša Niva» ŭžo pisała pra toje, što prapahandyst pisaŭ pad nikam @Valdis133.
Čytajcie taksama: Ihar Tur try hady pisaŭ u apazicyjny čat, a ciapier spaliŭsia. Jakija dumki jon pravodziŭ?
Kali Vałdysa-Tura vykryli, jon prycich i źnik z čataŭ. Adnak ciapier viarnuŭsia.
San Sanyč zamiest Vałdysa
Novy nik Tura — San Sanyč (San Sanhych). Hety akaŭnt isnuje jak minimum z kanca 2023 hoda, kali byli zafiksavanyja pieršyja paviedamleńni. Adnak aktyŭna Tur uziaŭsia za jaho ŭ hetym miesiacy, u žniŭni 2025 hoda.
Inšyja karystalniki čata davoli chutka zdahadalisia, što pierad imi, chutčej za ŭsio, Ihar Tur. Jon hetaha asabliva i nie admaŭlaŭ, choć aficyjna i nie paćviardžaŭ.
Adnak niekatorymi frazami San Sanyč naŭprost paćvierdziŭ, što jon nasamreč Ihar Tur. Naprykład, zhadaŭšy svajo miesca naradžeńnia.
«U mianie niama nijakaha admaŭleńnia ad miesca naradžeńnia. (…) Ja, biezumoŭna, pieršamajskaje bydła i limita, bazaru nul. Ale ciapier ja dosyć blizki da centra pryniaćcia rašeńniaŭ», — čałavieku, jaki nie viedaje kantekst, moža być niezrazumieły sens abarotu «pieršamajskaje bydła». Adnak nasamreč heta Tur iranizuje pra siabie i miesca, dzie jon vyras. Pieršamajski — heta pasiołak kala Lidy, małaja radzima prapahandysta.
«U nas jość videa…»
Jak i zvyčajna ŭ svaim teleefiry, Tur sprabuje tłumačyć aŭdytoryi, jak nasamreč ułada prymaje rašeńni. I zakidvaje dumki pra «dobraha cara».
Maŭlaŭ, kali niejki niaŭdały ŭkaz i byŭ pryniaty — jak, naprykład, pra «darmajedaŭ», — to heta vinavatyja čynoŭniki, jakija jaho padrychtavali. Ale ni ŭ jakim razie nie Łukašenka.
«Dekret ab papiaredžańni sacyjalnaha ŭtrymanstva pieršaj redakcyi atrymaŭsia chierovym, daviałosia pierarabić, tak — i?) u čym siensacyja?) Što nie ŭsie rašeńni idealnyja? Nie ŭsie rašeńni idealnyja, vidavočna».
«Niešta nie viedajuć, jak zrabić, niešta sprabujuć, a atrymlivajecca chiernia — heta vidavočna. Napeŭna, jość čynoŭniki, jakija zanadta šmat na siabie biaruć — jak i ŭsiudy, sistema nie idealnaja. Jak heta ŭ cełym charaktaryzuje sistemu?)»
«Chacieŭ by nahadać, što niekatoryja ŭkazy prezidenta Alaksandr Ryhoravič padpisvaje na daviery nie čytajučy», — zapeŭnivaje Tur.
Tur chvalicca insajdami i dakazvaje, što nibyta maje krynicy navat siarod svaich apanientaŭ. Pravieryć praŭdzivaść jaho śćviardžeńniaŭ niemahčyma, ale dla Tura važna napuskać tuman i pakazvać svaju ŭjaŭnuju ŭsiemahutnaść.
«U čacie jość takija krynicy, što navat dla dałučeńnia da spravy dastatkova adnaho», «Mnie ŭ pryvatnyja paviedamleńni adrazu dva ŭdzielniki čata zaraz napisali, što Arcioma Bruchana žonka faktyčna ŭtrymlivaje».
«Jak tolki spadar Bruchan staŭ śpikieram KR, da jaho adrazu ž pryjšli chłopcy z ABW i ŭltymatyŭna prapanavali supracoŭnictva. U hety momant Bruchan staŭ cikavy našaj raźviedcy, bo pačaŭ być nośbitam infarmacyi pra ABW — sam pa sabie jon nachier kamu zdaŭsia z usimi seks-skandałami i dakumientami ničoha nie vartaha kłoŭnskaha KR».
«U nas jość videa, na jakim spadar Viačorka zaŭziata čytaje zaborysty rep pra Zianona Stanisłavaviča. Videa da spravy dałučyć my možam, ale pakazać jaho publicy — nie, bo heta stvaraje ryzyki dla aŭtara videa, a nam heta nie treba. Ale Franak jość u čacie, jon moža paćvierdzić fakt repu. A to i začytać u hałasavym. Ci nie tak?»
Apazicyja: nikčemnaja i kiravanaja
Tur sprabuje davieści ŭdzielnikam čata, što jany nikčemnyja, ničoha nie vartyja i ad ich ničoha nie zaležyć — ale pry hetym čamuści praciahvaje ź imi spračacca i niešta im dakazvać.
«KR — vyklučna kalektyŭny orhan kalektyŭnaha ž pustoha pi**ziažu ŭ internecie, nie bolš».
«…luboje kiraŭnictva luboha abjadnańnia biełaruskaj apazicyi za miažoj apryjory pracuje ź i ŭ intaresach śpiecsłužbaŭ krain znachodžańnia».
«Ja vas zasmuču — vašy rasśledavańni, fiksacyi i apubličvańnie čahości ŭ Biełarusi čytajuć adzinki».
«Tady i vy adkazvajcie za svaju krainu — z ulikam taho, što Biełaruś vy ŭ poŭnaj miery svajoj užo nazvać nie možacie i nie zmožacie».
«Darečy, Kraŭcova na miescy ABW ja b uvohule vierbavaŭ pieršym — kiraŭnictva jakoha-nijakoha Sakrataryjata, možna zhulać na hanarystaści, byŭ u kamandzie prarasijskaha bankira…))) prosta cukierka, a nie Ivan). Mahčyma, tamu ŭ «biełaruskich» strukturach na terytoryi Polščy Ivan i niepataplalny tak doŭha — niby dapamahaje chtości».
Režym: macniejšy, čym kali-niebudź
Nakolki nikčemnaja apazicyja, nastolki ŭ razumieńni Tura mocny, efiektyŭny i spraviadlivy Łukašenka.
«Mnie zdajecca, što navat skieptyki pryznajuć, što pakul častka apazicyi kryčała, što voś-voś abryniecca režym — Łukašenka damohsia sabie najmacniejšych pazicyj nie tolki ŭ Biełarusi, ale i ŭ śviecie. Mabyć, tak kruta nie było ŭvohule nikoli za hetyja 30 hadoŭ».
Pry hetym «uvohule lehitymnaść nie maje pramoha dačynieńnia ni da vybaraŭ, ni navat, ryzyknu, da zakanadaŭstva».
A taksama: «Časam nie da zakonaŭ, całkam zhodny. Była jašče cytata z adnosna niadaŭniaha «spraviadlivaść vyšej za zakon», całkam padtrymlivaju».
Pry hetym jon upeŭnieny, što sistema pracuje: «Jaki kankretna Ukaz sabatavany kimści?»
«Taksama zabaŭna pra marnavańnie dziaržresursaŭ — tak-ta ŭzrovień zołata-valutnych reziervaŭ rekordny za ŭsiu historyju krainy».
A voś u inšych rehijonach śvietu — katastrofa:
«ja vas ździŭlu, ale vy žyviacie ŭ śviecie padletkavych ružovych iluzij. Amal usia Afryka i pałova Łacinskaj Amieryki, naprykład — sucelnaja padpolščyna praz afšory ź bienieficyjarami z usiaho śvietu, uklučajučy miesca vašaha znachodžańnia Šviejcaryju.
A šviejcarskija banki z zadavalnieńniem ciškom admyvajuć levyja babki — nie vyklučana, naprykład, što niejkija babki ź Biełarusi z zadavalnieńniem admyvajuć za pracent praz darohu ad vašaha miesca pracy».
Instrumienty: abrazy, pahrozy, namioki
Kali arhumienty skančvajucca, u chod idzie hałoŭnaja zbroja — psichałahičny cisk i abrazy, toje čaho Tur paźbiahaje ŭ teleefiry. A tut jon lohka pierachodzić na asoby, nie saromiejučysia pramoj łajanki:
«Franak na dapamozie, u jaho i daviedka jość»
«Ja sprabuju dakazać, što ty pi*daboł. Zbolšaha ŭžo atrymałasia».
«Vy časam debił ci prykidvajeciesia».
«Lenie ž sa śvietłahorskaha radyjo prosta adkul heta viedać?) nu pa fakcie ž».
«Hanna, voś zbolšaha emihracyja ŭ dupie nie z-za tych, chto tam babki piłuje ci jašče čaho, a z-za takich, jak vy, jakija niejkuju łuchtu palivajuć u efir».
Žančyn u dyskusii jon časta abiasceńvaje, vykarystoŭvajučy seksisckija kamientary: «…iana nie debiłka, choć i troški isteryčka».
Pry hetym nie zabyvajecca pachvalić svajo tok-šou i infarmavanaść:
«U bolšaści turaŭskich šou sami šou — małaznačnaja forma. Tam pryvitańni śpiecsłužbam Litvy i Polščy. Dastatkova vidavočna, što nam pofih, dzie adbudziecca kanfierencyja Novaja Biełaruś — ale nie pofih toj ža ABW, što KDB nachabna i niejak nie śvietanuŭšysia na [videa] kamierach pazdymała hetaje pamiaškańnie».
«Naša Niva» — bastyjon biełaruščyny
PADTRYMAĆ
Kamientary