«Uzmocnicca marnaja hulnia adciahvańnia Biełarusi ad Rasii». Litoŭski ekśpiert sprahnazavaŭ palityku novaj premjerki Litvy
26 žniŭnia Siejm Litvy ŭchvaliŭ pryznačeńnie ministarki sacyjalnaj abarony i pracy ad Sacyjał-demakratyčnaj partyi Inhi Ruhinienie premjer-ministarkaj krainy. Novaj kiraŭnicy ŭrada Litvy 44 hady, jana niadaŭna ŭ vialikaj palitycy, što, na dumku viadomaha litoŭskaha žurnalista Vitaŭtasa Bruviarysa, uskładniaje prahnazavańnie jaje dziejnaści na takoj važnaj pasadzie. Jak miarkuje ekśpiert, niedachop značnaha palityčnaha dośviedu ŭ Inhi Ruhinienie dazvalaje prahnazavać tolki jaje budučuju zaležnaść ad viadomych palityčnych doŭhažycharoŭ Litvy, piša «Radyjo Svaboda».
«Budzie bolš palityčnaha chaosu»
«Bačna, što jana ambicyjnaja, što joj chapaje ŭpeŭnienaści ŭ sabie, ale ŭsio ž nichto nie viedaje, jakoj jana budzie na pasadzie premjera, bo za joj niama ničoha, kab rabić takija prahnozy. Kažučy mietafaraj, Inha Ruhinienie tolki ŭčora pryjšła ŭ vialikuju palityku. Nakolki ja pamiataju, takoje zdarajecca ŭpieršyniu ŭ Litvie. A značyć, zamiest jaje buduć kiravać inšyja, tyja, chto jaje prasunuŭ na pasadu.
Kažu pra aksakałaŭ Sacyjał-demakratyčnaj partyi i najpierš pra Vicianisa Andrukajcisa, jaki vystaŭlaje siabie jak pradstaŭnika levaj prazachodniaj palityki. Jasna, što jon nie adziny budzie na jaje ŭpłyvać, ale viadoma, što jon jaje mocna padtrymlivaŭ, i tamu jahony ŭpłyŭ moža zachavacca», — miarkuje Vitaŭtas Bruviarys.
«Kali vy spytajecie mianie, jakoj moža być ahulnaja palityka novaha ŭrada, dyk hałoŭnaje — kurs, jakim pajšoŭ urad paśla apošnich parłamienckich vybaraŭ, kali kansiervatary paciarpieli parazu, zbolšaha hety kurs nie źmienicca. A što tady źmienicca? Miarkuju, budzie jašče bolš palityčnaha chaosu», — skazaŭ ekśpiert.
Jon dadaŭ, što heta ŭžo nazirałasia pry ŭklučeńni ŭ kiroŭnuju kaalicyju partyi «Niomanskaja zara» i Sajuza sialan i zialonych Litvy, a taksama «Vybarčaj akcyi palakaŭ u Litvie — Sajuza chryścijanskich siemjaŭ».
«Heta partyi, unutry jakich chapaje samych radykalnych, samych antyzachodnich elemientaŭ, tamu pra stabilnaść kazać ciažka. Naprykład, nie ŭjaŭlaju, jak pry takim partniorstvie sacyjał-demakraty buduć abaraniać prazachodniuju, pranataŭskuju aryjentacyju litoŭskaj dziaržavy. I ŭvohule ci buduć abaraniać? Nie dumaju, što hetaja aryjentacyja zastaniecca takoj ža stabilnaj, jak była raniej», — skazaŭ Vitaŭtas Bruviarys.
Jakoj budzie źniešniaja palityka ŭrada
Vitaŭtas Bruviarys taksama prakamientavaŭ pytańni zamiežnaj palityki, jakija zakranuła ŭ pramovie ŭ Siejmie novaja kiraŭnica ŭrada Inha Ruhinienie. Ekśpiert nahadaŭ vykazvańnie pra nieabchodnaść narmalizacyi adnosin z Kitajem i abiacańnie zrabić pieršy aficyjny vizit va Ukrainu. Niekatoryja słovy novaj premjerki žurnalist Bruviarys patłumačyŭ «zvyčajnym papulizmam».
«Nas mohuć uściešyć słovy Inhi Ruhinienie pra pieršy vizit va Ukrainu i jaje ŭspaminy pra dziacinstva ŭ Kramatorsku. Adnak adznačaju, što ŭ sacyjalnych sietkach raniej jana čamuści napisała, što Kramatorsk nibyta źniščany vajnoj, a ja dva miesiacy tamu jaho naviedaŭ i viedaju: horad žyvy i praciahvaje žyć i zmahacca. Čamu takaja niedakładnaść u słovach, mnie ciažka patłumačyć», — adznačyŭ Bruviarys.
Biełaruskaj dyjaspary budzie bolš składana
«Ahułam pavialičyłasia tendencyja znoŭ zhulać u viadomuju hulniu pad nazvaj «davajcie pasprabujem adciahnuć Biełaruś ad Rasii». Maŭlaŭ, my zaraz pryciahniem jaje da siabie, čymści Łukašenku załahodzim. Miarkuju, hetaj iluzii paddalisia nie tolki ŭ Litvie, i znoŭ pačnucca tancy vakoł Łukašenki, jak niekatoryja tančać vakoł Pucina. Ale, miarkuju, heta budzie nierazumna.
Tut u mianie ŭsia nadzieja na prezidencki ofis, jaki apiakaje ministerstvy zamiežnych spraŭ i abarony, kab zachavać praŭkrainski trend litoŭskaj palityki. Ale jość i tryvožnyja simptomy», — miarkuje ekśpiert.
Vitaŭtas Bruviarys prahnazuje novyja składanaści dla biełarusaŭ, jakija žyvuć u Litvie, najpierš dla palityčnych uciekačoŭ ź Biełarusi.
«Što da źmienaŭ palityki adnosna biełaruskaj dyjaspary, to my bačym u peŭnych kołach tendencyju da varožaści. Ź biełarusaŭ hałoŭnaj mišeńniu hetyja koły vybirajuć Śviatłanu Cichanoŭskuju i jaje muža Siarhieja. Lidar «Niomanskaj zary» Remihijus Žamajtajcis dy niekatoryja inšyja radykały z partyi sialan uvohule vykazvajucca za toje, kab vyhnać štab Cichanoŭskich ź Litvy.
Miarkuju, što ciapier, kali hetyja arhanizacyi apynulisia ŭ kiroŭnaj kaalicyi, padobnyja razmovy ŭzmocniacca. Kanstatuju, što pad upłyvam takich palitykaŭ hetaja varožaść raspaŭsiudžvajecca ŭ hramadstvie. Mnie ciažka pakul patłumačyć jaje pryčyny, ale, mahčyma, adna ź ich — mierkavańnie, što lepš by biełarusy zastavalisia ŭ svajoj dyktatury, čym budavali jeŭrapiejskuju demakratyčnuju dziaržavu.
Nielha paraŭnoŭvać heta z staŭleńniem rasiejcaŭ da ŭkraincaŭ, ale niešta takoje ŭsio ž i ŭ našych ludziach jość», — miarkuje Vitaŭtas Bruviarys.
Ekśpiert nie vyklučyŭ, što novy ŭrad pad kiraŭnictvam Inhi Ruhinienie, jak i papiaredni — Hintaŭtasa Pałuckasa, nie pratrymajecca da kanca svajoj kadencyi.
Šeście i mitynh pratestu, jakija adbylisia ŭ Vilni 26 žniŭnia i sabrali, pavodle padlikaŭ palicyi, da 8 tysiač čałaviek, Vitaŭtas Bruviarys nazvaŭ «zdarovaj prajavaj demakratyi i narmalnaj palityčnaj baraćboj u Litvie».
Ciapier čytajuć
Rytu Dakotu abvinavacili, što jana terminova raspradała nieruchomaść u Rasii amal na $2 miljony. Jana adkazała4
Kamientary