Naŭsieda padpisaŭ ukaz ab pryznačeńni Inhi Ruhinienie premjer-ministram
Prezident Hitanas Naŭsieda padpisaŭ ukaz ab pryznačeńni sacyjał-demakrata, v.a. ministra pracy Inhi Ruhinienie na pasadu premjer-ministra. Prezidentu jašče treba budzie pradstavić kandydaturu Ruhinienie ŭ Siejmie, piša Delfi.lt.
U svaju čarhu, parłamientaryi pavinny buduć pryniać rašeńnie pa kandydatury novaha premjer-ministra nie paźniej, čym praz tydzień paśla jaje pradstaŭleńnia ŭ zale plenarnych. Siejm hałasuje pa kandydatury premjer-ministra adkryta — dla jaje adabreńnia dastatkova prostaj bolšaści hałasoŭ.
U vypadku ŭchvaleńnia parłamientam kandydatury premjer-ministra, jon abaviazany nie paźniej čym na praciahu 15 dzion paśla svajho pryznačeńnia pradstavić parłamientu sfarmavany i zaćvierdžany prezidentam Kabiniet ministraŭ, a taksama ŭnieści na razhlad prahramu raboty ŭrada.
Inha Ruhinienie pracuje na pasadzie ministra sacyjalnaj abarony i pracy Litvy sa śniežnia 2024 hoda, jana deputatka Siejma ad partyi sacyjał-demakrataŭ.
Novaja mierkavanaja premjerka naradziłasia 24 maja 1981 hoda ŭ Trokach, jak kažuć, u ruskamoŭnaj siamji. Pa adukacyi jana mahistarka achovy zdaroŭja i jurystka ŭ śfiery pracoŭnaha prava, a taksama vyvučała kiravańnie lasnoj haspadarkaj.
Z 2018 pa 2024 hod jana ŭznačalvała Litoŭskuju kanfiederacyju prafsajuzaŭ. Była vice-prezidentkaj Mižnarodnaj kanfiederacyi prafsajuzaŭ (ITUC) i Jeŭrapiejskaj kanfiederacyi prafsajuzaŭ (ETUC).
Kandydatura Ruhinienie pavinna być uzhodnienaja z prezidentam Litvy Hitanasam Naŭsiedam. Paśla hetaha jon pavinien pradstavić kandydata na zaćviardžeńnie Siejmu.
Pasada premjer-ministra Litvy vyzvaliłasia paśla taho, jak 4 žniŭnia raniejšy kiraŭnik urada Hintaŭtas Pałuckas pajšoŭ u adstaŭku na fonie karupcyjnaha skandału.
Kamientary