U adkaz na zakryćcio Varšavaj miažy biełaruskija ŭłady ŭziali ŭ zakładniki 1453 polskija fury
Nasupierak zajavie biełaruskaha MZS paŭtary tysiačy hruzavikoŭ z polskaj rehistracyjaj nie mohuć pakinuć Biełaruś. U Breście zabili mašynami ŭsie čatyry transpartna-łahistyčnyja centry.
«Respublika Biełaruś, kirujučysia vyklučna humanitarnymi mierkavańniami, daje 1453 polskim hruzavym aŭtamabilam 10‑dzionnuju adterminoŭku dla bieśpieraškodnaha vyjezdu z terytoryi krainy. Jany apynulisia ŭ pastcy praź nieabdumanaje rašeńnie Varšavy ab zakryćci miažy, — zajaviła Ministerstva zamiežnych spraŭ Biełarusi 17 vieraśnia. — Heta nie prosta žest dobraj voli, a ekstraardynarnaja miera, jakaja demanstruje našu niaźmiennuju prychilnaść dabrasusiedstvu i adkaznamu padychodu da mižnarodnych adnosin», — padkreślivała dypłamatyčnaje viedamstva.
Dziaržaŭny mytny kamitet taksama raspaŭsiudziŭ zajavu, što ŭsim polskim pieravozčykam praciahnuć termin časovaha ŭvozu na 10 dzion i dla hetaha «nieabchodna źviarnucca ŭ mytny orhan, u rehijonie dziejnaści jakoha znachodzicca transpartny srodak».
Adnak razmovy pra «žest dobraj voli» akazalisia chłuśnioj.
«Usie hruzaviki, jakija pryjechali na TŁC (transpartna-łahistyčnyja centry Bresta, Bruzhoŭ i Bierastavicy — NN), stajać tam i čakajuć niejkaha «zahadu zvyš», — raskazaŭ «Našaj Nivie» supracoŭnik adnaho ź pieravozčykaŭ.
— Spačatku im abviaścili, što ŭ dačynieńni da ich buduć pravodzicca dadatkovyja mytnyja pracedury. Uvieś hety čas TS pavinna znachodzicca na miažy i, adpaviedna, apłočvać niemałyja sumy za stajanku», — kaža jon.
Potym pravodzić pracedury pieradumali.
«Ciapier usie mašyny, jakija pryjazdžajuć praciahvać časovy ŭvoz abo mytnaje patrabavańnie, zahaniajuć na stajanki TŁC ci navat prosta na pamiežnyja pierachody i tam ich pakidajuć. Faktyčna, prosta pakidajuć polskija transpartnyja srodki ŭ zakładnikach», — aburajecca łahist.
Jurydyčny bok situacyi
Z 2023 hoda isnujuć abmiežavańni na zajezd polskich hruzavikoŭ, pryčepaŭ i paŭpryčepaŭ u Biełaruś. Za vyklučeńniem aŭtavozaŭ i niehabarytnych hruzavikoŭ, astatnija majuć prava zajazdžać na terytoryju Biełarusi i pakidać jaje tolki praź biełaruska-polski ŭčastak miažy.
Pakolki miaža z Polščaj zakrytaja, 1453 fury, jakija zastalisia na momant zakryćcia na terytoryi Biełarusi, nie majuć mahčymaści pakinuć našu krainu, bo isnujučyja abmiežavańni nie dazvalajuć im viartacca ŭ ES praź Litvu abo Łatviju.
Na hruzaviki, jakija zajazdžajuć u Biełaruś, afarmlajuć časovy ŭvoz terminam na 10 dzion, ciaham jakich jany musiać pakinuć našu krainu.
Farmalna paśla praterminoŭki biełaruskaja mytnia maje prava pryciahvać pieravozčykaŭ da adkaznaści, ale 17 vieraśnia Dziaržaŭny mytny kamitet pryniaŭ rašeńnie ab padaŭžeńni znachodžańnia polskich fur na terytoryi Biełarusi jašče na 10 dzion.
Biełmytservis zarablaje na zakładnikach
Hruzaviki abaviazanyja znachodzicca ŭ zonie mytnaha kantrolu. Znachodžańnie tam nie biaspłatnaje. U zaležnaści ad mytnaha punkta, za pieršyja i druhija sutki płata składaje ad 28 da 40 jeŭra, a za trecija i nastupnyja — ad 43 da 55 jeŭra.
Takim čynam, u Biełarusi ciapier «u zakładnikach» amal paŭtary tysiačy hruzavikoŭ z polskimi numarami. Za dzień jany prynosiać dziaržaŭnaj kampanii Biełmytservis bolš za 60 tysiač jeŭra.
Ludzi, jakija pracujuć u śfiery łahistyki, upeŭnienyja, što biełaruski bok nie budzie iści na sastupki i admianiać raniej uviedzienyja abmiežavańni, kab nie hublać hety elemient cisku na Polšču.
Pry hetym pieravozčyki adznačajuć, što niemałaja dola hetych hruzavikoŭ choć i majuć polskuju prapisku, ale faktyčna naležać biełarusam, jakija praz sankcyi z boku ES byli vymušanyja adkryvać firmy ŭ Polščy i inšych krainach Jeŭropy.
Supracoŭnik adnoj z łahistyčnych kampanij ź biełaruskimi karaniami raskazaŭ «Našaj Nivie», što ad krynicy ŭ polskim uradzie im stała viadoma, što jak minimum da kanca vieraśnia miaža ź Biełaruśsiu zastaniecca zakrytaj. Pra toje, ci miaža adkryjecca ŭ kastryčniku, jany spadziajucca daviedacca pry kancy vieraśnia.
Nastupstvy adčujuć nie tolki biznes i pieravozčyki
Śpiecyjalist sa śfiery łahistyki, ź jakim udałosia parazmaŭlać, kaža, što z učarašniaha dnia zakazčyki pačali aktyŭna šukać alternatyŭnyja šlachi dastaŭki.
«Usie spadziavalisia na chutkaje adkryćcio, ale kali stała zrazumieła, što hetaha nie adbudziecca, pačali pahadžacca na dastaŭku pa novych, bolš vysokich taryfach.
Adnak rost cen na dastaŭku — heta nie adzinaja prablema. Pieranakiravać uvieś patok vielmi składana, bo prapusknaja zdolnaść praź Litvu i Łatviju vielmi nizkaja. Da taho ž ciapier, naprykład, mocna pierahružany mytny łahistyčny centr Navapołacka, jaki nie daje rady tym abjomam hruzavikoŭ, što ciapier tudy nakiravany».
Śpiecyjalist dadaje, što kali situacyja ŭ chutkim časie nie źmienicca, to pavyšanyja taryfy i terminy na dastaŭku zachavajucca jašče na niekalki tydniaŭ i paśla adkryćcia miažy, tamu varta čakać rostu cen na tavary, jakija pastaŭlajuć ź Jeŭropy.
«Skazali — čakajcie»
«Praviły vydumlajuć. Padstaŭ nijakich niama. Skazali — čakajcie, kali miažu adkryjuć. Kiroŭcy mohuć jechać, kali chočuć, a mašyny zastajucca ŭ ich. Chutka prydumali novy prejskurant za stajanku, i ŭsio, — raskazaŭ «Našaj Nivie» supracoŭnik łahistyčnaj kampanii, jaki paprasiŭ, kab jahonaje imia nie nazyvali. — U Breście zabili mašynami ŭsie čatyry TŁC», — dadaŭ jon.
Kamientary