Da prezidentki Mieksiki na vulicy pryčapiŭsia mužčyna i pakłaŭ joj ruki na hrudzi VIDEA
Pieršaja ŭ historyi krainy žančyna-prezident Mieksiki Kłaŭdyja Šejnbaum chodzić pa vulicy tolki ŭ supravadžeńni pamočnika. Jana zajaŭlaje, što joj treba być bližej da naroda. U vyniku žančyna zaznała seksualnyja damahańni ad vypadkovaha minaka.
Incydent, jaki šakavaŭ hramadstva, ale nie ździviŭ mnohich mieksikanskich žančyn, adbyŭsia ŭ centry Miechika i byŭ zafiksavany na videa. Pra heta piša The New York Times.
Na kadrach, jakija šyroka raspaŭsiudzilisia ŭ sacyjalnych sietkach, bačna, jak prezidentka idzie pa vulicy ŭ histaryčnym centry i vitajecca z prachožymi. Raptam da jaje padychodzić mužčyna, sprabuje jaje pacałavać i kładzie ruki na hrudzi. Mužčyna, jaki supravadžaŭ Šejnbaum, nieadkładna ŭmiašaŭsia.
Mexican President Claudia Sheinbaum was sexually assaulted on Tuesday, while interacting with passers-by on the streets of Mexico City. pic.twitter.com/8K2u1XMJyl
Na nastupny dzień Šejnbaum vystupiła pierad žurnalistami i paviedamiła, što padała zajavu ŭ palicyju jak ab złačynstvie.
«Ja padumała: kali ja nie padam skarhu, to jaki sihnał ja pasyłaju ŭsim mieksikanskim žančynam? Kali takoje moža zdarycca z prezidentkaj, što ŭžo kazać pra maładych dziaŭčat i žančyn pa ŭsioj našaj krainie?» — skazała jana.
Jak paviedamlajecca, zatrymany — 33-hadovy Uryel Ryviera Marcinies. Pavodle ŭładaŭ, jon byŭ mocna pjany i ŭ toj ža dzień damahaŭsia inšych žančyn.
Adnym z klučavych aśpiektaŭ, na jaki źviarnuła ŭvahu Šejnbaum, stała jurydyčnaja niepaśladoŭnaść u zakanadaŭstvie krainy. Niahledziačy na toje, što ŭ Miechika, dzie adbyŭsia incydent, seksualnyja damahańni ličacca złačynstvam, i jana zmahła padać zajavu, na fiederalnym uzroŭni, jak i ŭ niekatorych štatach, takija dziejańni nie kryminalizavanyja.
Prezidentka zajaviła, što budzie patrabavać ad čynoŭnikaŭ pierahladu zakanadaŭstva, kab usie žančyny pa ŭsioj krainie mahli pryciahvać da adkaznaści za damahańni, jak heta zrabiła jana sama.
«Nam treba zrabić heta vidavočnym i skazać: nie — ćviordaje nie», — padkreśliła Šejnbaum. «Asabistaja prastora žančyn nie pavinna parušacca. My pavinny zrabić tak, kab, kali žančyny padajuć skarhi, jany ŭsprymalisia surjozna i kab ich nie prymušali marnavać ceły dzień, što adbivaje ŭ ich žadańnie paviedamlać [pra złačynstvy]».
Jana dadała: «Ja nie chaču, kab heta było pryvilejem prezidenta».
Niahledziačy na niebiaśpiečny incydent, Šejnbaum zajaviła, što nie budzie ŭzmacniać miery biaśpieki i źmianiać svoj styl znosin z narodam. Padčas pres-kanfierencyi jana paćvierdziła, što ŭ momant napadu išła biez achovy i tolki ŭ supravadžeńni adnaho pamočnika.
«Što tyčycca majoj biaśpieki — my nie źmienim našych pryncypaŭ. My nie možam być daloka ad ludziej, — skazała jana. — Izalavacca, jeździć u furhonie — nie isnuje vidavočnaj pahrozy, jakaja b heta apraŭdvała».
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1212
Kamientary