Strachavyja kampanii niezadavolenyja rascenkami na ramont elektramabilaŭ
Biełaruskija strachoŭščyki sutyknulisia ź niečakanaj prablemaj. Košt ramontu elektramabilaŭ akazvajecca značna vyšejšym, čym strachavyja ŭznosy, što źbirajucca na ich strachavańnie.
Akramia taho, u Biełarusi šmat prablem ź jakaściu ramontu i zapasnymi častkami dla takich mašyn. Pra heta havaryłasia za kruhłym stałom, jaki adbyŭsia z udziełam strachoŭščykaŭ i aŭtadyleraŭ u Biełaruskim biuro pa transpartnym strachavańni, piša Office Life sa spasyłkaj na vydańnie «Strachavańnie ŭ Biełarusi».
Pavodle statystyki Biełaruskaj asacyjacyi strachoŭščykaŭ (BAS), strachavańnie elektramabilaŭ, pa sutnaści, źjaŭlajecca stratnym.
Za apošnija paŭhoda siaredni strachavy ŭznos uładalnikaŭ «elektryčak» pa kaska skłaŭ 2642 rubli, a siaredniaja vypłata im ža — 4138 rubloŭ.
Asnoŭnaja prablema, pavodle słoŭ pradstaŭnikoŭ strachavych kampanij, źviazanaja z faktyčnaj adsutnaściu cyvilizavanaha rynku zapasnych častak. Jak kažuć śpiecyjalisty, «sistema cenaŭtvareńnia na zamiennyja častki elektramabilaŭ absalutna chaatyčnaja».
Byvaje, što pry niaznačnych paškodžańniach košt ramontu elektramabila moža być roŭnym abo navat pieravyšać jaho rynkavy košt. Asabliva šmat pytańniaŭ uźnikaje pry ramoncie abo zamienie batarej.
U adnoj sa strachavych kampanij raskazali, što ŭ 2025 hodzie zamiena batarei Voyah Free abyšłasia biełaruskamu strachoŭščyku ŭ 115 tysiač rubloŭ. Pry tym što novaja batareja kaštavała 70 tysiač, a novy ceły aŭtamabil — ad 78 da 120 tysiač.
Ciapier strachavym vypadkam pa batarei źjaŭlajecca jaje paškodžańnie ad vonkavaha ŭździejańnia. Ale z ulikam ciapierašniaj praktyki ŭ mnohich strachavych kampanijach užo chočuć całkam vyklučyć batarei z damovaŭ strachavańnia. Praŭda, pakul heta tolki prapanova, ale ŭsio moža być.
Akramia taho, strachoŭščyki kažuć, što mnohija dylery nie majuć techničnych mahčymaściaŭ abo śpiecyjalistaŭ dla asobnych vidaŭ ramontu, asabliva pa pracy z prahramnym zabieśpiačeńniem elektramabilaŭ. A jašče daloka nie ŭsie kampanii hatovy ramontavać «svaje» marki, ale ŭviezienyja ŭ krainu nie aficyjnym dyleram.
U vyniku ŭ strachoŭščykaŭ nazapašvajucca straty. Miž tym, kali ŭ 2022 hodzie ŭ Biełarusi było zarehistravana ŭsiaho 3,6 tysiačy mašyn ź zialonymi numarami, to ciapier ich užo ŭ 10 razoŭ bolš. A ŭrad stavić metu pavialičyć ich kolkaść da 300 tysiač.
Pavodle statystyki, kala 50% «zialonych» mašyn siońnia zarehistravana ŭ Minsku i Minskaj vobłaści. Pavodle danych BAS, 23% z najaŭnych «elektryčak» zastrachavanyja pa polisach kaska.
Kamientary
Elektryčnyja aŭta vielmi darahija u ramoncie i absłuhoŭvańni. Heta viadoma daŭno. Kali batareja raptam złomicca, to praściej mašynu za 40 tys dalaraŭ pradać na zapčastki čym ramantavać akumulatar.