Najbujniejšuju sietku fastfudu ŭ Biełarusi adkryŭ vychadziec z KDB
Suzasnavalnik sietak restaranaŭ KFC i kaviarniaŭ Cofix u Biełarusi — były supracoŭnik KDB. Jak vyśvietliła «Lusterka», da pačatku karjery ŭ hramadskim charčavańni pradprymalnik jak minimum dzieviać hadoŭ słužyŭ u centralnym aparacie śpiecsłužby, a ŭ restaranny biznes pryjšoŭ nieŭzabavie paśla zvalnieńnia. Jaho partniorami stali svajaki viadomych biznesmienaŭ z rejtynhaŭ najbahaciejšych ludziej krainy.
Top-mieniedžar ź niepubličnym minułym
U 2015 hodzie ŭ Minsku pačaŭ pracu pieršy restaran KFC. Adkryćcio nazyvali «fiejeryčnym»: nad Kamiennaj Horkaj tady źjaviŭsia viertalot, ź jakoha spuściŭsia čałaviek u kaściumie zasnavalnika amierykanskaj sietki — pałkoŭnika Sandersa.
Pierad uvachodam u restaran pierarezali čyrvonuju stužku. Kavałačak tady adrezaŭ i Siarhiej Ducin — hiendyrektar kampanii «Bieł Fud Servis». Mienavita jana pieršaj vyjhrała vializny konkurs na pracu pa suśvietna viadomaj franšyzie KFC u Biełarusi. U publikacyjach taho času pisali, što ŭ prajekt ukłalisia bujnyja biznesmieny. Inviestycyi ŭ pieršy restaran aceńvali na ŭzroŭni adnaho miljona dołaraŭ. A voś čym raniej zajmaŭsia dyrektar — publična nie paviedamlałasia.
Siarhiej Ducin — były supracoŭnik KDB. Z danych aficyjnych rejestraŭ, dastupnych «Biełpoł», vynikaje, što jon značyŭsia ŭ centralnym aparacie arhanizacyi z 2005 hoda, to bok z 18 hadoŭ. Paralelna z hetym — z 2006 pa 2011 hod — jon vučyŭsia ŭ rasijskim MDU pa śpiecyjalnaści «kryptahrafija», havorycca na jaho staroncy ŭ LinkedIn. U 2014 hodzie Ducinu było 27. Jon pakinuŭ słužbu i ŭznačaliŭ novuju kampaniju «Bieł Fud Servis», jakaja ŭ dalejšym zaniałasia raźvićciom KFC u Biełarusi. Ducin byŭ zapisany jaje dyrektaram ź pieršaha dnia pracy.
Były śpiecsłužbist staŭ davoli publičnym kiraŭnikom: adkryvaŭ restarany ŭ rehijonach, niekalki razoŭ davaŭ intervju, udzielničaŭ u žury prafiesijnych premij. A jašče raz na hod stanaviŭsia za kasu restarana i sam absłuhoŭvaŭ klijentaŭ. U adnym ź intervju pradprymalnik kazaŭ, što za čas pracy ŭ KFC «navučyŭsia ŭsiamu» i prajšoŭ «nie adzin vitok transfarmacyj». U žniŭni 2019 hoda Ducin atrymaŭ dolu ŭ «Bieł Fud Servis». Pradprymalnik kiravaŭ kampanijaj da kanca 2023 hoda.
Pavodle danych na červień 2025 hoda, Siarhiej Ducin «časova nie pracuje». Jon zastajecca členam Savieta dyrektaraŭ kampanii i jaje saŭładalnikam — jamu naležyć 11,15% u statutnym fondzie.
Chto inšyja saŭładalniki?
Bolšaja častka «Bieł Fud Servisa» (kala 72%) naležyć rodnym zasnavalnikaŭ handlovaha doma «Ždanovičy» — pamierłych Michaiła Prakapoviča i Jaŭhiena Šyhałava.
Vydańnie «Ježiednievnik» uklučała ich abodvuch u rejtynhi najbahaciejšych ludziej krainy.
Tak, u dziaciej Jaŭhiena Šyhałava Siarhieja i Dzijany (u jaje padvojnaje proźvišča Šyhałava-Kuryła) pa 18,37%, u jaho ziacia Vitala Kuryły — 17,14%. Udava ž Michaiła Prakapoviča Maryja vałodaje 17,73%.
Jašče 17,14% — u Alaksandra Šuško.
Ciapier pa franšyzie KFC u Biełarusi pracujuć dźvie kampanii — «Bieł Fud Servis» i «Juniter». U pieršaj užo 58 restaranaŭ pa ŭsioj krainie, sietka druhoj składajecca z 33 punktaŭ. Zhodna z dakładam inviestycyjnaj kampanii «Juniter», apublikavanym u studzieni 2025 hoda, KFC staŭ najbujniejšym hulcom rynku restaranaŭ chutkaha charčavańnia ŭ Biełarusi pa kolkaści abjektaŭ i pasadačnych miescaŭ.
Kavavaja historyja
U 2019 hodzie źjavilisia naviny pra toje, što na biełaruskim rynku budzie dziejničać «majstar-franšyza» na izrailski brend kaviarniaŭ Cofix. Ich asablivaść — fiksavanaja ekstremalna nizkaja cana na napoi i desierty. Uładalnikam franšyzy nazyvali Siarhieja Ducina, na toj momant užo viadomaha kiraŭnika biełaruskaha KFC.
Mienavita Ducin u lipieni 2019 hoda zasnavaŭ kampaniju «Urban Sneki», jakaja ŭ dalejšym zaniałasia raźvićciom sietki Cofix u Biełarusi, vynikaje z danych Adzinaha dziaržaŭnaha rejestra jurydyčnych asob. Paźniej u tym ža hodzie ŭ skład ułaśnikaŭ, akramia Ducina, uvajšli taksama i astatnija ŭdzielniki «Bieł Fud Servis». Kaviarny prajekt chutka vyras: u 2024 hodzie ŚMI stavili Cofix na treciaje miesca pa kolkaści ŭstanoŭ siarod usich sietak hramadskaha charčavańnia ŭ Biełarusi. Ciapier pad izrailskim brendam pracuje bolš za 50 kropak u Minsku i Hrodnie. Ducinu naležyć 15,77% hetaj kampanii.
Darečy, heta nie ŭsie prajekty pradprymalnikaŭ. U 2017 hodzie ŭ Biełarusi pačali źjaŭlacca restarany finskaha brendu Hesburger, adnak u 2022 hodzie paśla pačatku poŭnamaštabnaha ŭvarvańnia brend abviaściŭ pra vychad ź Biełarusi i Rasii. Na miescy zakrytych punktaŭ u Babrujsku i Minsku adkrylisia restarany pad padobnaj nazvaj — Yes! Burger. Ich raźvivajuć tyja ž ludzi, što stajać za Cofix i KFC. Ciapier pracujuć try «impartazamiaščalnyja» burhiernyja: u Minsku, Babrujsku i Mahilovie.
Ciapier čytajuć
Zasnavalnik dabračynnych fondaŭ dla dapamohi dzieciam Łysiankoŭ dabiehaŭsia — jaho zatrymaŭ DFR2
Zasnavalnik dabračynnych fondaŭ dla dapamohi dzieciam Łysiankoŭ dabiehaŭsia — jaho zatrymaŭ DFR
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ99
Kamientary