Palityčnyja kułuary, adnosiny z byłymi i siońniašnimi — Nasta Rahatko napisała debiutnuju knihu. I źniałasia dla vokładki aholenaj
Eks-hałoŭnaja redaktarka Kyky.org i eks-kiraŭnica kamunikacyj ofisa Śviatłany Cichanoŭskaj Nasta Rahatko napisała zbornik apaviadańniaŭ u žanry aŭtafikšn, ad jakich, jak abiacaje aŭtarka, «zachočacca žyć».
Debiutnaja kniha Nasty nazyvajecca «Nasi z saboj». Heta zbornik z 12 (z pałovaj) raskazaŭ — aŭtafikšn, u jakim čytač znojdzie apoviedy pra emihracyju, stasunki z byłymi i siońniašnimi blizkimi, palityčnyja i žurnalisckija kułuary, siabroŭskija i seksualnyja ŭzajemaadnosiny, vajnu i pošuk ułasnaj identyčnaści ŭ situacyi, kali kraina, dzie aŭtarka naradziłasia (Rasija), bambić krainu jaje dziacinstva (Ukraina) z terytoryi krainy, u jakoj jana vyrasła (Biełaruś). Pry hetym tyja, chto ŭžo mieŭ mahčymaść pahartać knihu, kažuć što jana čytajecca lohka.
«U mianie było try pryčyny napisać hetu knihu, — raskazvaje Nasta. — Pieršaja — tak ja pieraadolvaju svoj ułasny ekzistencyjny kryzis, šukaju novyja sensy zamiest tych starych, što vyčarpali siabie. Dumaju, šmat kamu znajomy hety stan, bo śviet akazaŭsia značna bolš krochkim, čym my dumali».
«Druhaja pryčyna — ja chacieła nie zabyć pra važnyja dla siabie pačućci i adkryćci», — praciahaje tłumačyć aŭtarka. «Pamiać niaŭchilna budzie zaciahvać usio tumanam, i mnie chaciełasia paśpieć zapisać samu ideju, što ŭ hetym časie było šmat i kachańnia taksama. Jakaja ironija: va ŭmovach cenzury vydumka moža stać adzinym sposabam raskazvać praŭdu.
Treciaja pryčyna — paśla pracy ŭ Ofisie Cichanoŭskaj u mianie źjaviłasia viečnaja fonavaja złość na toje, što śviet kaža pra Biełaruś i naš rehijon čyimi zaŭhodna hałasami, aproč našych. I ŭvieś čas spraščaje našu situacyju, kab było zručniej. Tak Biełaruś pieratvaryłasia ŭ krainu Šrodynhiera: ci to kraina-achviara, ci to kraina-ahresar. Ja chacieła napisać knihu pra toje, što zaŭsiody zastajecca pamiž radkoŭ, vyrazajecca z pramovaŭ i źnikaje z zahałoŭkaŭ.
Tamu častka zaroblenych hrošaj pojdzie na pierakłady sempł častak dla adpraŭki mižnarodnym litaraturnym ahientam. U hetym dla mianie hałoŭny ekśpierymient».
Ź jakich častak składajecca kniha?
- Časam Biełaruś pieratvarajecca ŭ žart
- A jak vy zapomnili pieršy dzień vajny? (ciažkaja častka, zatoje karotkaja)
- Byvaje ž takoje — pra samaje ŭraźlivaje zahavoryš ź nieznajomym mužykom u kalidory traŭmatałohii
- U Biełarusi jość dva ideałahičnyja kancerny: «Žyvie Biełaruś» i «Kvitniej, Biełaruś»
- Jak my niaśpiešna robimsia adzin adnamu pryvidami (emihracyjny łou-faj)
- Ludzi adnolkava jaduć na pachavańniach i viasiellach
- Chaču
- Pra što my bałbatali z Patryjarcham Kiryłam
- Paškadujcie babuśku (censored)
- Heta jak razmova ź siabram dziacinstva ŭ try hadziny nočy na kuchni (i jon voś-voś skaža niešta, što ciabie vykryje i tym samym adpuścić)
- Na žarhonie śpičrajtaraŭ hetu častku nazvali b ślozahon
- Chiba vam nikoli nie chaciełasia prydumać sabie inšaha siabie?
- Usio (kančatkova)
Usia kniha rabiłasia rukami aŭtarki — to bok, heta samvydat. Kaštuje kniha 20 jeŭra, i zakazać jaje možna z dastaŭkaj na śpiecyjalna stvoranym sajcie. Taksama kniha ŭžo dastupnaja afłajn u kramie «Bukinistka» ŭ Varšavie, i chutka pačnie źjaŭlacca ŭ inšych punktach prodažy Jeŭropy i ZŠA.
Nasta Rahatko vyrasła ŭ Biełarusi, naradziłasia ŭ Rasii (h. Novarasijsk) i praviała dziacinstva va Ukrainie (h. Załatanoša). U žniŭni 2020‑ha razam z redakcyjaj Kyky.org pakinuła Minsk paśla zatrymańnia suzasnavalnika. Kyky paźniej pryznali ekstremisckim farmavańniem. Vosieńniu 2020‑ha Nasta ŭ Vilni dałučyłasia da kamandy lidara demakratyčnych sił Śviatłany Cichanoŭskaj u jakaści kiraŭnika kamunikacyj. Paśla sychodu z Ofisa ŭ 2023 hodzie była suzasnavalnicaj ahienctva stratehičnych kamunikacyj StratcomLab. Ciapier žyvie ŭ Varšavie.
Kamientary
Nie ŭsio toje litaratura, što ŭ knizie.