Lidara apazicyjnaj partyi «Narodny Front Azierbajdžana» Ali Kierymli aryštavali na dva z pałovaj miesiacy pa abvinavačańni ŭ padrychtoŭcy da hvałtoŭnaha zachopu ŭłady. Jamu pahražaje termin ad 12 hadoŭ da pažyćciovaha źniavoleńnia.
Sabailski rajonny sud Baku ŭ paniadziełak, 1 śniežnia, aryštavaŭ na dva miesiacy i 15 dzion staršyniu nacyjanał-demakratyčnaj partyi «Narodny Front Azierbajdžana» (PNFA) Ali Kierymli i člena kiraŭnictva PNFA Mamieda Ibrahima. Im vystaŭlenyja abvinavačańni ŭ zmovie z metaj hvałtoŭnaha zachopu ŭłady. Palitykam pahražaje termin ad 12 hadoŭ da pažyćciovaha źniavoleńnia, piša Deutsche Welle.
Kierymli byŭ zatrymany 29 listapada. Pavodle danych dziaržaŭnych ŚMI Azierbajdžana, padčas vobšuku ŭ apazicyjaniera byli znojdzieny niejkija listy za aŭtarstvam Ramiza Miechcijeva, byłoha kiraŭnika administracyi prezidenta. U kastryčniku sud pastanaviŭ adpravić 87‑hadovaha Miechcijeva pad chatni aryšt na čatyry miesiacy pa šerahu abvinavačańniaŭ, uklučajučy sproby dziaržaŭnaha pieravarotu i dziaržaŭnuju zdradu.
Kjerymli admaŭlaje suviaź ź Miechcijevym
Ułady Azierbajdžana abvinavačvajuć Kierymli ŭ atrymańni finansavańnia z boku Miechcijeva. Lidar PNFA adkidvaje vystaŭlenyja jamu abvinavačańni i ličyć ich palityčna matyvavanymi, paviedamiŭ Reuters advakat apazicyjnaha palityka.
Kierymli ŭznačaliŭ partyju «Narodny Front Azierbajdžana» ŭ 2000 hodzie, paśla śmierci jaje papiaredniaha lidara, eks-prezidenta krainy Abulfaza Elčybieja. Na praciahu 20 hadoŭ Ali Kierymli admaŭlali ŭ vydačy zamiežnaha pašparta. U 2015 hodzie Jeŭrapiejski sud pa pravach čałavieka (JESPČ) pryznaŭ, što takim čynam byli parušanyja pravy Kierymli na svabodu pieramiaščeńnia.
Uzmacnieńnie palityčnych represij u Azierbajdžanie
Azierbajdžanskija pravaabaroncy ličać aryšt Ali Kierymli častkaj chvali represij i patrabujuć jaho vyzvaleńnia. Kolkaść palitviaźniaŭ u krainie, pavodle źviestak sajuza «Za svabodu palitviaźniaŭ u Azierbajdžanie», u kastryčniku 2025 hoda dasiahnuła 392 čałaviek — heta samy vialiki pakazčyk za ŭvieś 22‑hadovy pieryjad prezidenctva Ilchama Alijeva.
Dziasiatki žurnalistaŭ, aktyvistaŭ i palitykaŭ, jakija vystupali z krytykaj azierbajdžanskich uładaŭ, byli vymušanyja pakinuć krainu. U červieni sud u Baku vynies abvinavaŭčyja prysudy žurnalistam vydańnia Abzas Media, jakoje apublikavała rasśledavańnie ab biznesie Ilchama Alijeva, a taksama reparcioru miedyjokarparacyi «Radyjo Svabodnaja Jeŭropa / Radyjo Svaboda» (RSIE/RS). Siem supracoŭnikaŭ ŚMI byli prysudžanyja da pazbaŭleńnia voli na terminy ad 7,5 da 9 hadoŭ.
Ciapier čytajuć
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy133133
Kamientary