Nacyjanalny bank Biełarusi 12 maja źniziŭ staŭku refinansavańnia na 0,5 pracentnaha punkta da 12% hadavych.
«Najaŭnaja ekanamičnaja situacyja, nievysokaja intensiŭnaść inflacyjnych pracesaŭ, rost terminovych rublovych układaŭ nasielnictva ŭ bankach, stabilnaja situacyja na najaŭnym valutnym rynku dazvalajuć praciahvać praktyku, skiravanuju na pavyšeńnie dastupnaści kredytnych resursaŭ bankaŭ. U suviazi z hetym pryniata rašeńnie ab čarhovym źnižeńni staŭki refinansavańnia», — zajavili va ŭpraŭleńni infarmacyi hałoŭnaha banka krainy.
Varta adznačyć, što raniej Nacbank
płanavaŭ vyjści na ŭzrovień staŭki refinansavańnia ŭ 12% hadavych da 1 lipienia hetaha hoda.
«U 2010 hodzie my mianiajem svajo staŭleńnie da pracentnaj palityki i pastupova vychodzim na ŭzrovień pracentnych stavak, jaki byŭ da kryzisu», — paviedamiŭ kiraŭnik Nacbanka Piotr Prakapovič 27 studzienia na pres‑kanfierencyi. Heta značyć, skazaŭ jon, što staŭka pa novych depazitach sfarmirujecca na ŭzroŭni staŭki refinansavańnia, a staŭka pa kredytach budzie vyšej za hety ŭzrovień nie bolš jak na 3%. U vyniku ŭzrovień stavak pa novych rublovych kredytach składzie 12—15% hadavych.
«Staić zadača nie zaciahvać z hetym da kanca hoda. My płanujem zaviaršyć hetuju pracu da kanca pieršaha paŭhodździa. Dumaju, da hetaha terminu nam udasca spakojna vyjści na zhadanyja pakazčyki pracentnaj palityki», — padkreśliŭ tady kiraŭnik Nacbanka.
Nahadajem, 19 krasavika hetaha hoda staŭka refinansavańnia Nacbanka była źnižana z 13 da 12,5% hadavych.
Kamientary