Eŭrapiejskija lidary praviali kansultacyi pa vynikach sustrečy Trampa i Zialenskaha
Jeŭrapiejskija lidary paśla čarhovaha etapu pieramoŭ, pryśviečanych vajnie va Ukrainie, zajavili, što źjavilisia prykmiety ruchu da miru i aściarožnyja padstavy dla nadziei.
Fiederalny kancler Hiermanii Frydrych Mierc paviedamiŭ, što adbylisia novyja kansultacyi z udziełam jeŭrapiejskich krain i Kanady. Pavodle jaho słoŭ, mirny praces pastupova prasoŭvajecca, adnak ciapier ad usich bakoŭ, u tym liku ad Rasii, patrebnyja adkrytaść i ščyraść.
Premjer-ministr Polščy Donald Tusk taksama adznačyŭ stanoŭčyja sihnały. Jon vykazaŭ mierkavańnie, što vajna moža zaviaršycca chutčej, čym čakałasia. Pry hetym Tusk padkreśliŭ, što havorka idzie tolki pra nadzieju, a nie pra harantavany vynik, i zaklikaŭ nie paddavacca praźmiernamu aptymizmu.
Jeŭrapiejskija lidary praviali kansultacyi paśla sustrečy prezidenta Ukrainy Uładzimira Zialenskaha z prezidentam ZŠA Donaldam Trampam, jakaja adbyłasia 28 śniežnia ŭ Fłarydzie i była pryśviečana mirnamu ŭrehulavańniu kanfliktu. Paśla pieramoŭ stała viadoma, što nie ŭsie pytańni, u pryvatnaści situacyja vakoł Danbasa, udałosia całkam uzhadnić. U toj ža čas ZŠA zajavili pra peŭnyja sastupki z boku Maskvy adnosna Zaparožskaj AES. Pavodle ŭdzielnikaŭ sustrečy, pytańnie harantyj biaśpieki dla Ukrainy amal całkam uzhodniena, a mirny płan hatovy prykładna na 90% pracentaŭ.
Taksama Tramp abviaściŭ pra namier stvaryć śpiecyjalnuju hrupu z vysokapastaŭlenych pradstaŭnikoŭ ZŠA, jakaja budzie vieści pieramovy z Rasijaj. Zialenski paviedamiŭ, što kančatkovaje ŭzhadnieńnie abmierkavanych u ZŠA pytańniaŭ čakajecca ŭžo na nastupnym tydni, a ŭ studzieni płanujecca vizit ukrainskaj i jeŭrapiejskaj delehacyj u Vašynhton.
Paśla sustrečy ŭ Fłarydzie Zialenski i Tramp abmierkavali jaje vyniki ź jeŭrapiejskimi lidarami. Staršynia Jeŭrakamisii Ursuła fon der Lajen adznačyła, što padčas hetych kantaktaŭ byŭ dasiahnuty dobry prahres.
Kamientary